QR IIM bas kóterýge qatysty pikir bildirdi: zań buzǵandar jaýapqa tartylady

QR Ishki ister mınıstriniń birinshi orynbasary Marat Qojaev Nur-Sultan men Almatydaǵy mıtıngke oraı pikir bildirdi, dep habarlaıdy Qamshy.kz aqparat agenttigi Inform.kz saıtyna silteme jasap.

"Nur-Sultan men Almaty qalalarynda Qazaqstanda tirkelmegen jáne sot tyıym salǵan QDT estremıstik uıymynyń úndeýimen alańdarǵa birneshe júzdegen adam shyqty. О́zderińizge de belgili bolyp otyrǵandaı, atalǵan uıymnyń qashqyn basshysy saılaý qarsańynda eldegi bılikti dıskredıtasııalaý, kezekten tys prezıdenttik saılaýǵa boıkot jarııalaý boıynsha jappaı nasıhat jumysyn júrgizdi. Saılaý kezeńinde qoǵamǵa qarsy is-áreketter jasaýǵa shaqyrdy. Olardyń destrýktıvti shaqyrýlaryna qaramastan saılaý josparly rejimde ótip jatyr. Halyq ózderiniń qalaýlaryn bildirý úshin saılaý ýchaskelerine barýda", - dedi birinshi vıse-mınıstr Ortalyq saılaý komıssııasynda ótken brıfıngte.

Onyń sózinshe, qazirgi tańda qoǵamdyq tártip pen qaýipsizdikti qadaǵalaý sharalary qabyldanyp jatyr.

"Barlyqtaryńyzǵa belgili, zańnamamyzda kez kelgen beıbit jıyn, sherý, mıtıng  ótkizý tártibi naqty jazylǵan. Zańdy talapty saqtamaǵandar  jaýapqa tartylady", - dedi Marat Qojaev.