Nursultan Nazarbaev: Azamattar el Prezıdentin ǵana emes, óz bolashaǵy men taǵdyryn tańdaıdy

Nursultan Nazarbaev Elordadaǵy Oqýshylar saraıynda Qazaqstan Respýblıkasynyń Prezıdentin saılaý rásimine qatysyp, daýys berdi dep habarlaıdy Qamshy.kz aqparat agenttigi Aqordaǵa silteme jasap. 

"Búgin azamattarymyz saılaýǵa qatysyp, daýys berip jatyr. Saılaý naýqany barlyq elde jáne árdaıym halyq úshin tarıhı sát sanalady. Azamattar el Prezıdentin ǵana emes, sonymen qatar óz bolashaǵy men taǵdyryn tańdaıdy", – dedi Nursultan Nazarbaev.

Elbasy, sondaı-aq, bıylǵy prezıdent saılaýynyń ereksheligine toqtaldy.

"Bıylǵy saılaýdyń ereksheligin bilesizder. Men prezıdenttik ókilettigimdi toqtatyp, jastarǵa jol berdim. Bul – durys sheshim. Tóńiregimiz túgel damyp keledi. Qazaqstandy jańa beleske bastaý úshin el basshylyǵyna ozyq oıly jańa býyn kelýi kerek. Prezıdenttik ókilettigimdi toqtatý jónindegi sheshimim búkil álemde túsinistikpen qabyldandy. Men kóptegen eldiń kóshbasshylarynan hat aldym. Olar Qazaqstanda bılikti berý prosesiniń beıbit jaǵdaıda ótip jatqanyn joǵary baǵalaýda", – dedi Qazaqstannyń Tuńǵysh Prezıdenti.

"Siz Qazaqstannyń qandaı bolashaǵy úshin daýys berdińiz?" - degen jýrnalısterdiń saýalyna da jaýap berdi.

"2050" strategııalyq baǵdarlamasynda barlyǵy tolyq jazylǵan. Iаǵnı, 2050 jylǵa deıin Qazaqstan osy baǵdarlamaǵa sáıkes damıtyn bolady. Túpki maqsat - elimizdiń álemniń damyǵan 30 eliniń qataryna qosylýy. Munda Qazaqstannyń damýy da, jastar da, áleýmettik te, ekonomıkalyq ta, halyqaralyq damý da kiredi", - dep jaýap berdi Nursultan Nazarbaev.