Túrkistandyq qyzdyń janaıqaıy: Qujatta - óli, ómirde - tiri (vıdeo)

–Túrkistan oblysynyń turǵyny tiri ekenin dáleldeı almaı júr. Túrkistan oblysyndaǵy Otyrar aýdanynda 12 jasar qyz qujat boıynsha óli bolyp shyqqan dep habarlaıdy Qamshy.kz aqparat agenttigi KTK telearnasyna silteme jasap.

Aıjan Amanjoldyń ata-anasy qyzyna qatysty bul derekti byltyr kezdeısoq bilipti. Sodan beri aýdandaǵy quzyrly mekemelerge shaǵymdanǵanymen, Aıjannyń tiri ekenin qujat boıynsha rásimdeı almaı álek. Jaýapty mamandar bolsa, bul máseleniń jaqyn arada sheshiletinin endi ǵana aıtyp otyr.

7-synypty bitirgen Aıjan demalys kezine berilgen tapsyrmany oryndap ta qoıypty. Resmı túrde mektepke baryp, medbaqylaý kezinde ekpe alyp júrgen qyz 5 jyldan beri tiriler qatarynda joq. Onyń o dúnıelikterdiń sanatynda ekenin byltyr anasy qyzyn aýrýhanaǵa aparǵanda bir-aq bilipti. Aıjannyń shaqalaq kúninde shetinegen egiziniń syńarymen shatasqan bolýy kerek degen joramal da joqqa shyqqan.

""О́ldi" dep shyqqan kompıýterden. Sińlimniń egizi bar, sonymen shatasty dep oıladym. 2014-te dep qaıtys bolǵan dep tur. Qyzymnyń qujatyn durystap berse deımin", - dedi Janat Súleımenova (Aıjannyń anasy)

Tiri qyzynyń 2014 jyldan beri óli ekenin bile sala qujattaǵy aqaýdy rettemek bolǵan jaqyndary Otyrar aýdanyndaǵy quzyrly mekemelerdiń tabaldyryǵyn tozdyrýmen júr. Aýdan ákimine aıtaıyn dese, "oǵan da jolatpaıdy" deıdi.

–Jekemenshik aýrýhanaǵa kórsetip jatyrmyn. Basy aýyrady deıdi. Emdelmese, erteń ózinen – ózi sóıleı beretin bir túrli aýrýǵa shaldyǵýy múmkin eken, - dedi ashynǵan ana.  

"Mańyna jolatpaıdy" degen sheneýnikter, alaıda, búgin ózderi keldi. Aýyl ákiminen bastap, aýdandyq jumyspen qamtý bóliminiń basshylary kelip, sabyrǵa shaqyrýmen álek. Sózderine sensek, qate tehnıkadan ketken. Al, bir jyldan beri bar atqarylǵan is – aýdan sheneýnikteriniń bári jabylyp elektrondyq úkimettiń shuǵyl jelisine habarlasqany eken.

"QR jedel aqparattyq júıesine telefon shaldyq. Endi ol jerde bizdiń ótinishti qabyldap aldy. 21 kún aralyǵynda másele sheshiledi dedi. Sol Ishki ister mınıstrliginiń bazasynan qate ketip tur", - dedi Otyrar aýdandyq jumyspen qamtý jáne áleýmettik baǵdarlamalar bóliminiń basshysy Qalzıra Kızbaı.

5 jyl buryn ketken qatege kimniń jaýap beretini beımálim. Jáne byltyrdan beri nelikten nátıje shyqpaǵanyn aıtyp berer jaýapty sheneýnik aýdanda joq. Dese de, bir jyldan beri sheshilmegen máseleni bir qońyraý arqyly ary ketse 20 kúnde sheshemiz dep otyr. "О́zge de qujattaryna kómektesýge daıynbyz" dep, qulshynystary da artyp tur. Tek Aıjanyń otbasy mundaı sózge senýden qalǵan.