Almatyda "Kompozıtor" kórkem fılminiń saltanatty tusaýkeseri ótti

Almatydaǵy Respýblıka saraıynda alǵashqy qazaq-qytaı birlesken jobasy - "Kompozıtor" kórkem fılminiń saltanatty tusaýkeseri ótti dep habarlaıdy Qamshy.kz aqparat agenttigi  "Qazaqfılm" baspasóz qyzmetine silteme jasap. 

Kartınany Sh.Aımanov atyndaǵy "Qazaqfılm" kınostýdııasy men qytaılyq Shinework Pictures kompanııasy jasap shyqqan.

Rejısserleri Qazaqstan atynan - Sábıt Qurmanbekov, al Qytaı tarapynan - Sherzat Iаkýb.

Aıtýly aqyn, jazýshy, qoǵam jáne saıasat qaıratkeri Oljas Súleımenov jáne basqa da kóptegen tanymal otandyq mádenıet jáne kıno qaıratkerleri tusaýkeserdiń qurmetti qonaǵy boldy.

Fılm Sıan Sınhaıdyń ómiri men shyǵarmashylyǵy týraly baıandaıdy. Onyń Keńes odaǵy kezinde, Almatyǵa evakýasııalanǵan shaǵyn, qazaq kompozıtory Baqytjan Baıqadamovpen dostyǵyn kórsetedi.

Kórsetilim aldynda fılmniń Qazaqstan tarapynan bas prodıýseri, Sh.Aımanov atyndaǵy "Qazaqfılm" AQ birinshi vıse-prezıdenti Serik Jubandyqov pen qytaılyq prodıýser, Shinework Pictures" kompanııasynyń prezıdenti Djonatan Shen jáne QHR Almatydaǵy bas konsýly Chjen Veı myrza kórermenderge shyqty.

"Biz úsh jylǵa jýyq túsirgen fılmimiz "Kompozıtordy" sizderge usynǵanymyzǵa qýanyshtymyz. Bul qazaq-qytaı birlesken alǵashqy fılmde qazaqtyń kompozıtory Baqytjan Baıqadamov pen qytaılyq kompozıtor Sıan Sınhaıdyń arasyndaǵy dostyǵyn kórsetý arqyly, eki eldiń dostyǵyn kórsetkimiz keldi", - dedi Serik Jubandyqov.

"Bul tusaýkeser kóńilimdi tolqytty. Osydan 70 jyl buryn qıyn jaǵdaıǵa tap bolǵan qytaı kompozıtory Sıan Sınhaı Almatyǵa kelip, qazaqtyń tanymal kompozıtory Baqytjan Baıqadamovpen tanysady. Baıqadamovpen onyń otbasy oǵan rııasyz kómek kórsetedi.

Mine, 70 jyl ótken soń, Qazaqstan men Qytaı kınemtografısteriniń arqasynda, kópshilik bile bermeıtin jáne áserli oqıǵa úlken ekranǵa jol tartty", - dedi bas konsýl Chjan Veı.   

Fılmniń tómendegi quramy da kórermender aldyna shyqty: rejısser Sábıt Qurmanbekov, prodıýser Qýanysh Ahmetov, Qalamqas Arıslanovanyń rolin somdaǵan kishkentaı aktrısa Dilnaz Nurseıit, qoıýshy operator Lý Hýnı (QHR), qoıýshy rejısser Lý Iýelın (QHR), jáne atqarýshy prodıýser Iаo Chýngýan (QHR). Kórsetilimnen soń kórermender nazaryna Qalamqas Arıslanova men Sıan Sınhaıdyń qyzy Nınanyń Qytaıda kóriskeni týraly qysqa derekti fılm usynyldy.

Dý qol shapalaqpen sahnaǵa Qalamqas Arıslanova jáne Baqytjan Baıqadamovtyń qyzdary: Baldyrǵan Baıqadamova, Aıgúl Baıqadamova jáne Alýa Baıqadamova kóterildi. Olar Baqytjan Baıqadamov pen Sıan Sınhaıdyń dostyǵy týraly aıtyp berdi. "Sıan Sınhaı - maǵan baqytty balalyq shaq syılaǵan adam", - dep tolqı sóıledi Qalamqas Arıslanova. 

Sonymen qatar, is-shara aıasynda BAQ jáne qonaqtarǵa Qalamqas Arıslanovanyń "Qytaı halqynyń kompozıtory Sıan Sınhaı. Qazaqstandaǵy ómiri" atty kitabynyń tusaýy kesilip, avtordyń qatysýymen avtorgraf-sessııa ótti. Tusaýkeser aldynda fılmniń shyǵarmashylyq tobymen birge baspasóz otyrysy ótti.