Mańǵystaý - tarıhy tereń, shejiresi baı ólke

Oblys ákimi Eraly Toǵjanov Memlekettik rámizder kúnine arnalǵan merekelik sharanyń qutyqtaý sózinde Mańǵystaý ataýynyń myń jyldyǵyna oraı, aımaqta júzdegen is shara uıymdastyrylatynyn málimdedi. Elimizde týǵan jerge degen otanshyldyq ıdeıasyn qalyptastyryp, birligimiz ben yntymaǵymyzdy nyǵaıtatyn memlekettik rámizderdiń mereıli merekesin jyl saıyn atap ótý dástúrge aınalǵan. 

Taǵlymy mol «Mańǵystaýdyń myń jyldyǵy» ataýly datasyn resmı túrde jarııalaý memlekettik rámizder kúnimen tuspa-tus kelýi kezdeısoqtyq emes dedi óńir basshysy. Eraly Toǵjanov: «Biz Birlik pen tatýlyqtyń arqasynda Táýelsizdigimizdi tuǵyryna qondyryp, Máńgilik El qurdyq. Memlekettik tý, Eltańba, Gımn – táýelsizdiktiń sımvoly, eldiktiń nyshany bolsa, «Mańǵystaýdyń myńjyldyǵy» ólkemizdiń sımvoly, túp-tamyrymyz tereń ekendiginiń aıshyqty dáleli. Memlekettik rámizderde ata-babalarymyzdyń ótken joly men tarıhy kórinis tapsa, sol tarıhty tereń taný, óskeleń urpaqqa nasıhattaý bizdiń, aǵa býynnyń asyl paryzy»,- dep atap ótti. 

О́ńirde Mańǵystaýdyń tarıhyn júıeleý maqsatynda oblys ákiminiń tapsyrmasyna sáıkes keshendi ǵylymı zertteýler, halyqaralyq deńgeıde ekspedısııalar men konferensııalar iske asqan bolatyn. Nátıjesinde tarıh betinde 1000 jyl buryn Mańǵystaý ataýynyń paıda bolǵany dáleldendi. 
Bir jyl alty aı ishinde 7 eldiń 70-ke jýyq ǵalymdarynyń Mańǵystaý muralaryn zertteýdegi keshendi jumystarynyń nátıjesinde «Mańǵystaý ataýynyń myń jyldyǵy» naqtylandy.

Ataýly data aıasynda oblysymyzda «Tarıh tolqyny: Mańǵystaýdyń myń jyldyǵy» halyqaralyq ǵylymı konferensııasy uıymdastyrylyp, Uly Jibek jolyndaǵy Altynqazǵan, Qaraqabaq, Qyzylqala, Ketikqala qalashyqtaryna keshendi arheologııalyq qazba jumystaryn júrgizý, jer asty meshitteri men tańbaly tastaryn ǵylymı zertteý, olardy qorǵaýǵa alý sharalaryn qabyldaý is-sharalary josparlanýda. Sonymen qatar, tarıhı - arheologııalyq eskerkishterge qyzyǵýshylyq tanytqan dúnıejúzilik National Geographic jáne fransııalyq Pernel Media kompanııalar oblysymyzda derekti fılmder túsiredi.