Saǵyntaev, Saparbaev, Sultanov kelgen analardyń narazylyǵy áli jalǵasyp jatyr (vıdeo)

Nur-Sultanda bılikten baspana máselesin sheship berýdi talap etken kóp balaly analardyń narazylyǵy áli de jalǵasyp jatyr dep jazady Qamshy.kz aqparat agenttigi. 

Bılikke narazylyqtaryn 10.00-de bastaǵan analar Aqordanyń aldyndaǵy ashyq alańda ashtyq jarııalaǵan bolatyn. Narazy analardyń talabyn tyńdaýǵa kelgen qala ákimi Baqyt Sultanov, Eńbek jáne áleýmettik qorǵaý mınıstri Berdibek Saparbaev, premer-mınıstrdiń orynbasary Gúlshara Ábdihalyqova analardy ákimdik ǵımaratyna kirip sóılesýge shaqyrdy. Biraq analar bılik ókilderiniń bul usynysyna kelise qoıǵan joq. Olar «Ákim men mınıstrdiń ýádesinen sharshadyq» dep otyr.

"Bizdiń basty máselemiz – baspana"

Narazy analar: "Bizdiń bir ǵana máselemiz bar. Ol – baspana. Baspanamyz bolsa, bizden baı, bizden baqytty adam joq. Biz tegin baspana suramaımyz. Bizge aıyna 30-40 myń teńge tóleıtindeı etip úı berińder" dedi.

"Biz esh jerde turmaımyz, dalada júrmiz"

Analardan bólek, alańda baspana surap balalar da júr. Jýrnalısterge ózin Januzaq Berikpin dep tanystyrǵan jasy 10-11-ler shamasyndaǵy ulbala otbasynda 10 bala baryn, qazir úısiz, kúısiz, týysqandaryn panalap júrgenderin aıtyp, kóz jasyn tókti.

"Biz esh jerde turmaımyz, dalada júrmiz. Kúnde ár jaqa baramyz. Bizge úı berińizdershi, basqa esh nárse suramaımyz», - degen ol anasynyń qurbysynyń úıinde turyp jatqanyn aıtty.

Saǵat 10.00-de jınalǵan analar jeti saǵatqa jýyq ýaqyt Aqordanyń aldynada turyp aldy. Olarǵa basqa da kóp balaly analar kelip qosylyp jatty. Biraq arnaıy polısııa jasaǵy analar turǵan aýmaqty qorshap, basqa adamdardy ótkizbeýge tyrysty. Biraq kóptegen adamdar kelip, alańda turǵan analarǵa sý jáne tamaq ákelip jatty.

Saǵyntaev sabyrǵa shaqyrdy

Alańnan ketpeı turyp alǵan analarǵa saǵat 17.00 shamasynda Qazaqstan prezıdenti ákimshiliginiń jetekshisi Baqytjan Saǵyntaev kelip sabyrǵa shaqyrdy. "Sabyr saqtaı almaımyz" dep Saǵyntaevtyń sózine qulaq aspaǵan analar aqyry máseleni Úkimet úıinde otyrap talqylaýǵa kelisti. Qazir Saparbaev, Sultanov, Saǵyntaev úsheýi Úkimet úıiniń ishinde analardyń árqaısynyń aryzyn tyńdap otyr.