Kım Chen Yn sátsiz kelissóz júrgizgen qyzmetkerlerin atyp tastady

KHDR-niń AQSh isteri jónindegi Memlekettik Keńesiniń arnaıy ókili Kım Hıok Chhol Hanoıdaǵy sammıtke qatysqan Soltústik Koreıa Syrtqy ister mınıstrliginiń tórt qyzmetkerimen birge jazalandy dep habarlaıdy Qamshy.kz aqparat agenttigi. Bul týraly Ońtústik Koreıanyń  Chosun Ilbo basylymy jazdy.

Basylymnyń málimetine sáıkes, Soltústik Koreıa kóshbasshysy Kım Chen Yn dıplomattardy AQSh pen KHDR basshylary arasyndaǵy ekinshi sammıtte prezıdent Donald Tramppen oń nátıjeli kelisimge kele almaǵany úshin jazalaǵan.

Derekkózderdiń habarlaýynsha, bes laýazymdy tulǵa  Phenıandaǵy Mırım áýejaıynyń aýmaǵynda "AQSh tyńshysy" degen aıyppen atyldy. Sondaı-aq soltústik koreıalyq lıderdiń birinshi orynbasary Kım En Chol túrme jumystaryna jegilgeni týraly da aıtylǵan.

Basylym Hanoıda Kım Chen Ynnyń qasynda birge bolǵan qaryndasy Kım Io Chjonnyń sammıtten keıin úshti-kúıli joq bolyp ketkenin de jazdy.

Esterińizge sala ketsek, 2019 jyldyń aqpanynda AQSh pen KHDR-diń eki el basshylarynyń qatysýymen ekinshi sammıt ótken. Atalmysh sammıt barysynda eki jaqty  kelisimge qol qoıylmady. AQSh prezıdenti Tramp pen Soltústik Koreıa kóshbasshysy Kım Chen Ynnyń birlesken baspasóz máslıhaty da bolmaı, kezdesý merziminen buryn  nátıjesiz aıaqtalǵany belgili.

Aýdarǵan: Dáýren Sybanbaı

Oqı otyryńyz:

♦ Kım Chen Yn týraly 10 qyzyqty derek : ol dárethanaǵa barmaıdy