Aqtaýdaǵy Nazarbaev zııatkerlik mektebi CIS akkredıtasııasyn aldy

Aqtaý qalasyndaǵy hımııa-bıologııa baǵytyndaǵy Nazarbaev Zııatkerlik mektebi Halyqaralyq Mektepter keńesiniń (CIS) akkredıttelýinen ótti.

Halyqaralyq akkredıtteý boıynsha CIS dırektory Stıýart Makleı mektepke quttyqtaý hatyn joldap, ujymnyń bilim men tárbıedegi umtylystaryn joǵary baǵalaǵan. 

• Aqtaý qalasyndaǵy hımııa-bıologııa baǵytyndaǵy Nazarbaev Zııatkerlik mektebi qazirgi sátten bastap Halyqaralyq mektepter keńesiniń (CIS) akkredıtasııasynan ótkendigin habarlaǵanyma qýanyshtymyn. Sizge jáne sizdiń qyzmetkerlerińiz ben búkil mektep ujymyna eń jyly tilekterimizdi joldaı otyryp, jetistikterińizben quttyqtaımyz, -  deıdi ol hatynda.

Sáýir aıynyń basynda keńestiń sarapshylarynan quralǵan jumys toby óńirdegi mekteptiń halyqaralyq standartarǵa sáıkestigin baǵalaý maqsatynda kelgen edi. Avstralııa, Rýmynııa, Fransııa, Belgııa, Taıland, BAÁ, О́zbekstan elinen kelgen táýelsiz sarapshylar bes kún boıy uıymnyń tynys-tirshiligmen tanysyp, ákimshilik ókilderi, pedagogtarmen, oqýshylar jáne ata-analarmen kezdesip, bilim berý júıesine baqylaý júrgizdi. CIS komandasy bilim berý prosesi men mektep ómiriniń uıymdastyrylýyna da baǵa berdi. Sarapshylar sabaqtarǵa, úıirmelerge, sport seksııalaryna qatysyp, balalardyń tamaqtaný jáne medısınalyq kómek alý múmkindikterin óz kózderimen kórdi. Mamandar tótenshe jaǵdaıdaǵy balalar men ujym qaýipsizdigine basa nazar aýdaryp, birneshe sıtýasııalyq jaǵdaılardy da baqylady.

Baǵalaýshy tarap halyqaralyq keńestiń  «Mekteptiń mıssııasy, kózqarasy men qundylyqtary», «Oqytý jáne oqý», «Basqarý jáne kóshbasshylyq», «Oqytýshylar men qyzmetkerlerge qoldaý kórsetý», «Oqý jáne oqytýǵa qoljetimdilik», «Mektep mádenıeti» jáne oqytý úshin seriktestik», «Operasııalyq júıeler» atty standarttaryna sáıkes qurylǵan jumys toptarymen tildesti.

Keńes quramyna ený mektep túlekterine úzdik ýnıversıtetterge túsý barysynda kómegin tıgizip, ustazdardyń akkredıttelegen mekteptermen ózara tájirıbe almasýyna, halyqaralyq deńgeıde myqty mamandarmen jumys isteýge múmkindik beredi.

• Halyqaralyq mektepter keńesinen akkredıttelýinen ótý mektebimizge úzdiksiz damýǵa tamasha múmkindikter ashady. Bul oqý ornynyń únemi joǵary bilim sapasyna umtylysynyń dáleli jáne bizge úlken jaýapkershilik júkteıdi, - dedi mektep dırektory Ermek Paızov.

Halyqaralyq mektepter keńesi (CIS) - bul mektepterdi akkredıtteýge jáne jetildirilgen oqytý ádisterin damytýǵa arnalǵan halyqaralyq bilim berý uıymy, ol álemniń 735 mektebin jáne 116 elden ýnıversıtetter men kolledjderdi qamtıdy. Aqtaýdaǵy Nazarbaev Zııatkerlik mektebi NIS  júıesindegi akrredıtasııadan ótken 18-shi mektep bolyp otyr.