Qyrǵyzstan, Belarýs jáne Moldova prezıdentteri Nur-Sultanǵa keldi

Memleket basshysy Qasym-Jomart Toqaev Joǵary Eýrazııalyq ekonomıkalyq keńestiń otyrysyna qatysý úshin Nur-Sultan qalasyna kelgen Qyrǵyz Respýblıkasynyń prezıdenti Sooronbaı Jeenbekovpen, Belarýs basshysy Aleksandr Lýkashenkomen jáne Moldova prezıdenti Igor Dodonmen kezdesti.

Jeenbekovpen kezdesýde eki el arasyndaǵy yntymaqtastyq pen halyqaralyq uıymdar aıasyndaǵy birlesken is-qımyl máseleleri talqylandy.

"Bizdiń elderimizdiń yntymaqtastyǵy artyp keledi. Úkimetaralyq, parlamentaralyq deńgeıde jumys istep kelemiz. Álemdik jáne aımaqtyq uıymdarda da birgemiz. Táýelsizdik jyldarynda qalyptasqan tyǵyz qarym-qatynasty men odan ári damytýǵa bar kúsh jigerimdi salamyn", – dedi Qazaqstan prezıdenti.

Qyrǵyz prezıdenti jyly kezdesýge rızashylyǵyn bildirip, memleketaralyq baılanystardyń dostyq sıpatyn atap ótti.

"Alystaǵy aǵaıynnan jaqyndaǵy kórshini artyq kóretin biz Qazaqstanmen aradaǵy yntymaqtasty odan ári damytýǵa múddelimiz. Búginde úkimetaralyq jol kartasy boıynsha jumystar atqarylýda. О́zińizdi Qyrǵyz Respýblıkasyna saparmen kelýge shaqyramyz", – dedi Sooronbaı Jeenbekov.

Toqaev Belarýs prezıdentimen de kezdesti. Memleket basshysy Aleksandr Lýkashenkoǵa iltıpat bildirdi jáne olardyń bul kezdesýi Qazaqstannyń astanasy Nur-Sultan dep atalǵannan keıin, birinshi ret ótip otyrǵanyn aıtty.

"Biz sizdiń qyzmetińizdi muqııat baqylap, elińizdi damytýdaǵy zor jetistikterińizdi aıtyp otyramyz. Siz Prezıdent laýazymynda uzaq jyldan beri qyzmet etip kelesiz jáne memleketińizdiń bedeli men áleýetin nyǵaıtý úshin bar múmkindikti jasap jatyrsyz", – dedi Qasym-Jomart Toqaev.

Aleksandr Lýkashenko dástúrli túrde jyly qarsy alǵany jáne kezdesýge múmkindik týǵyzǵany úshin Qasym-Jomart Toqaevqa rızashylyq bildirdi.

Belarýs basshysy táýelsiz Qazaqstannyń qalyptasý jolyndaǵy Elbasy Nursultan Nazarbaev pen prezıdent Qasym-Jomart Toqaevtyń rólin erekshe atap ótip, elimizde bolyp jatqan ishki saıası úderisterge oń baǵa berdi.

"Bizdiń qarym-qatynastarymyzǵa keler bolsaq, ol árdaıym jaqsy bolady. Sizdermen birge yntymaqtastyǵymyz naqty baǵyttar boıynsha ilgerileı beretinine kúmánim joq", – dedi A.Lýkashenko.

Taraptar ekijaqty qarym-qatynastardaǵy, óńirlik jáne halyqaralyq kún tártibindegi ózekti máselelerdi talqylady.

Sondaı-aq Qazaqstan basshysy men Moldova prezıdenti Igor Dodon kezdesip, ekijaqty baılanystardy jáne halyqaralyq uıymdar aıasyndaǵy ózara is-qımyldardy talqylady.

"Biz Moldovamen yntymaqtastyqty nyǵaıtýǵa jáne saýda-ekonomıkalyq seriktestikti odan ári keńeıtýge nıettimiz. О́zara qarym-qatynastarymyzdy damytý úshin bizde barlyq múmkindik bar dep oılaımyn", – dedi Qasym-Jomart Toqaev.

Moldova Respýblıkasynyń Prezıdenti jyly qabyldaǵany úshin rızashylyq bildirip, memleketaralyq dıalogtyń jemisti sıpatyn aıtty.

"Elderimiz arasynda dostyq qatynastar ornaǵan. 30-dan astam ekijaqty kelisimderge qol qoıyldy. 12 qujat qaralýda. Moldova úshin Eýrazııalyq ekonomıkalyq odaqpen ıntegrasııalyq úderis mańyzdy sanalady. Bul baǵytta bizdiń aldymyzda aýqymdy jumys tur", – dedi Igor Dodon.

Joǵary Eýrazııalyq ekonomıkalyq keńestiń otyrysyna kimder qatysady

29 mamyrda Nur-Sultanda Joǵary Eýrazııalyq ekonomıkalyq keńestiń otyrysy ótedi, ol eki mereıtoılyq data – Qazaqstannyń tuńǵysh prezıdenti – Elbasy Nursultan Nazarbaevtyń eýrazııalyq ıntegrasııa týraly ıdeıasyna 25 jyl jáne Eýrazııalyq ekonomıkalyq odaq týraly shartqa qol qoıylǵanyna 5 jyl tolýyna oraılastyrylmaq.

Is-sharaǵa Elbasy Nursultan Nazarbaev, memleket basshysy Qasym-Jomart Toqaev, Belarýs prezıdenti Aleksandr Lýkashenko, Qyrǵyzstan prezıdenti Sooronbaı Jeenbekov, Reseı prezıdenti Vladımır Pýtın, Armenııa premer-mınıstri Nıkol Pashınıan qatysady.

Moldova prezıdenti Igor Dodon EAEO janyndaǵy baqylaýshy - memleket basshysy, Tájikstan prezıdenti Emomalı Rahmon men TMD atqarý komıtetiniń tóraǵasy Sergeı Lebedev qurmetti qonaq retinde qatysady.