29 Mamyr, 2019 Aımaqtar
Mektep qabyrǵasyndaǵy – medıasııa
Bul baǵytta «Qoǵamdyq kelisim» mekemeleri de eleýli ister atqaryp keledi.
Elbasy «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyn sot ústemdigin arttyrýmen qatar, daý janjaldardy mámile túrinde sheshýdi basa tapsyrǵany belgili. Osyǵan oraı, búginde elimizdegi sot prosesterinde medıasııa júıesi keń qoldanylýda. Bul baǵytta «Qoǵamdyq kelisim» mekemeleri de eleýli ister atqaryp keledi.
Jambyl oblysy ákimi apparatynyń «Qoǵamdyq kelisim» mekemesi óskeleń urpaq arasynda sheksiz ortany damytý maqsatynda óńirdiń mektepteri men kolledjderinde birqatar is-sharalar uıymdastyrýda. Daýlar men janjaldardy sheshýge medıatıvtik tásildi qoldaný týraly quqyqtyq túsindirý jumysyn oblystyq Assambleıa medıatorlary jáne Analar keńesteriniń ókilderi júrgizýde.
Oblystyq kámeletke tolmaǵandardyń isteri jónindegi mamandandyrylǵan aýdanaralyq sotymen yntymaqtastyq týraly memorandýmyn is júzinde júzege asyrý maqsatynda medıasııa kabıneti sýdıalarmen birlese №10 S. Nurmaǵanbetov atyndaǵy orta mektepte tálimdik shara ótkizdi. Onda daýlar barysynda týyndaǵan áleýmettik-psıhologııalyq máselelerdi sheshý algorıtmi tańdaldy.
«Mektep medıasııasy» kabınetinde 11 synyp oqýshylaryna arnalǵan «Medıasııa negizderi» atty alǵashqy keńestik - ádistemelik sabaq ótti. Dáriste medıasııa kabınetiniń meńgerýshisi N.Dosybıeva qatysýshylardy medıasııa prosedýrasymen, onyń qaǵıdattarymen, quraldarymen jáne qoldaný salasymen tanystyrdy. О́z sózinde ol janjal, daýly jaǵdaılar ár adamnyń ómirinde bolatyndyqtan, alaıda oryn alǵan shıelinisten shyǵa bilý mańyzdy ekenine toqtaldy.
QHA medıatorlar keńesiniń tóraǵasy L.Safonova bolsa, qatysýshylardy medıasııany ómirde qoldanýdyń praktıkasy negizinde óz tájirıbesinen mysal keltire otyryp túsindirdi. Oqytý barysynda shaǵyn-dárister, praktıkalyq jattyǵýlar, róldik oıyndar, mıǵa shabýyl, dıskýssııalar jáne jeke baılanysy bar ımıtasııalyq medıasııa qoldanyldy. Budan bólek, 11 synyp oqýshylaryna daýly jaǵdaılar jáne ony sheshý kezinde medıasııany qoldaný sharttary qoıyldy. Oqýshylar usynylǵan jaǵdaıdy deldaldyq jáne kelissózder arqyly sátti sheshti.
Mektep oqýshylaryna arnalǵan mundaı oqý sabaqtary aldaǵy ýaqytta da jalǵasyn tappaq. Sebebi dárister medıasııa ınstıtýtyn mektep qabyrǵasynan bastap maqsatty túrde damytyp, óskeleń urpaqty daýdy nemese janjaldy sheshýge medıatıvtik kózqaraspen qaraýǵa úıretedi.
Jaıdar Azamat
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir