Jas kásipkerlerge keleli kómek

Memleket basshysy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda shaǵyn jáne orta kásipkerlikti damytýǵa aıryqsha kóńil bóldi. Bul baǵytta búginde baǵdaryn taýyp jatqan sharýalar az emes. Sondaı-aq baıandy bastamaǵa alys-jaqyn aýdandarda da ún qosýda.  Mine, sondaı eldi mekenniń biri -    T.Rysqulov aýdanynda  Jas kásipkerler mektebi ashylyp,  kásip ashamyn degenderge kómek kórsetýde.  

Aýdan ákimdiginiń ishki saıasat bóliminiń «Jastar resýrstyq ortalyǵy» mekemesi jáne aýdandyq kásipkerler palatasymen birlese otyryp ashqan tyń baǵyttaǵy mektep el ıgiligine jastardyń eńbegi men qabiletin arnaýdy kózdeıdi. Munda tabysty kásipkerler aýdannyń jas azamattaryna is bastaýdaǵy tıimdi joldy kórsetip, semınar-trenıngter, sheberlik klasstaryn ótkizedi. Jyl basynda qurylǵan mektep alǵashqy kezdesýin aqpan aıynda oblysymyzdyń maqtanyshy, «Qazaqstannyń Eńbek Eri» tósbelgisiniń ıegeri Saırambaı Dónenbaevpen ótkizgen bolatyn. Sol jıynda Eńbek Erine biraz jastar kókeıindegi saýaldaryn qoıyp, iskerliktegi tabystyń kilti nede ekenin suraǵan.

–Eńbekpen eseıgen adam ómirdiń eshbir qıyndyǵynan qashpaıdy, qoryqpaıdy, kezkelgen kedergilerdi buzyp-jaryp ótedi. Muraty bıik azamattyń almas qamaly joq. Sender naǵyz kúsh-qýaty tasyǵan shaqtasyńdar. Bul – qaıtyp oralmaıtyn ýaqyt. Osy ýaqytty tıimdi paıdalanyp, bolashaqtaryńa jarqyn jol salyńdar. Adam istegen isimen abyroı tabady. Ádemi sóılep, isiń kerisinshe shyqsa, eń úlken uıat – sol. Qazir jastar «jumys joq» degendi kóp aıtady. Tirshilik bolǵan jerde jumys ta kóp, tek shyn nıet bolsa. Máselen, qazir kóptegen sharýa qojalyqtar aýyl sharýashylyǵy mamandaryn tappaı júr. Solardyń biri ózimmin. Árıne, kóbimiz taza da jyly kabınette otyryp, aqsha tapqymyz keledi. Al, onyń arǵy jaǵynda úlken qarbalas jumys jatqanyn eskere bermeımiz. Shyntýaıtynda, mal babyn tapqanǵa bitedi. Qanshalyqty kresloda otyratyn basshy bolǵyń kelse de ter tókpeıinshe qurmetke bólene almaısyń. Al, aýyl sharýashylyǵy mol násiptiń qaınar kózi. Jalqaýlyqqa jar bermeı, «týǵan elime ne bere alamyn?» degendi únemi qaperlerińde ustańdar! –dep aǵalyq aqylyn aıtyp, óziniń tájirıbesimen bólisken edi.

Aýdandyq Jastar resýrstyq ortalyǵy dırektorynyń orynbasary Baqtııar Asqar aýdandaǵy múddeli mekemelerdiń qatysýymen aýdandaǵy kásipkerler men kásip ashýǵa nıeti bar jastardyń basyn qosyp, taǵy bir paıdaly jıyn ótkizilgenin aıtady.

–Kezdesýde jastar kásipkerlerligin qoldaý maqsatynda memleket tarapynan kórsetiletin jeńildikter jaıynda sóz qozǵaldy. Birqatar zamandastarym sol jerde óziniń jańa isiniń josparyn da jasap aldy. Shyndyǵynda memlekettik baǵdarlamalar qanshalyqty nasıhattalsa da aımaqtarda áli de habarsyz kisiler kóp. Jıynda jastarǵa memleket tarapynan jasalatyn qamqorlyqtar jóninde keń maǵlumat berildi. Endi aldaǵy ýaqytta aýdanymyzdyń belgili kásipkerleri Pazyl Súleımenov, Shəmshihan Iskakov, Qonysbaı Saǵynbek syndy aǵalarmen kezdesýler, semınarlar uıymdastyramyz dep josparlaýdamyz. Árıne, óz kásibin ashyp, isin dóńgeletip otyrǵan jastarymyz da joq emes. Olardy da kezdesýlerge shaqyryp, tabyskerliktegi tásilderin surap, tájirıbelerimen bólisip otyratyn bolamyz, -deıdi.

Jastardyń kásipkerlikke degen qulshynysyn arttyrýdy kózdegen mektep talaı paıdaly istiń erkin qanat jaıýyna yqpal etip, bastama bolaryna senemiz.

Tuńǵysh Prezıdent Nursultan Nazarbaev Jastar jylynyń ashylý saltanatynda «Jumys, bul – adam ál-aýqatynyń negizgi kózi. Jastar saıasatynyń negizgi máselesi jumyspen qamtý bolyp qala beredi. «Feısbýkti» Mark Sýkerberg 19 jasynda, «Maıkrosofty» Bıll Geıts 20 jasynda, «Apple» kompanııasyn Stıv Djobs 21 jasynda qurǵan. Bul kompanııalar júzdegen myń adamdy jumyspen qamtyp qana qoımaı, bıýdjetke qyrýar qarjy túsirip otyr. Olar óz bıznesin bastaǵanda aýqymdy qarjy resýrstaryna nemese úkimet qoldaýyna súıengen joq. Halqymyzdyń «Aqyl – jastan, asyl – tastan» degen naqyl sózi beker aıtylmaǵan. Bizdiń jastarymyzdyń boıynda mundaı qasıetter bar» degen edi. Qadamyn endi basqan Jas kásipkerler mektebinen Nursultan Ábishuly ataǵandaı álemge tanymal, tabysker kásipkerlerdeı iskerlerdiń baǵyt alyp shyǵarynan úmittimiz.

Jaıdar Azamat