«Kóknar-2019» jedel-aldyn alý is-sharasyna daıyndyq júrgizilýde

Aǵymdaǵy jyldyń 1 maýsymynan bastap jyl saıynǵy «Kóknar-2019» respýblıkalyq jedel-aldyn alý is-sharasy bastalady, Ol jabaıy ósetin esirtki ósimdikteriniń zańsyz egistikteri men aýmaqtaryn anyqtaýǵa jáne joıýǵa, esirtkiniń zańsyz taralýyna qatysy bar tulǵalardy ustaýǵa jáne esirtki arnalarynyń jolyn kesýge baǵyttalǵan.

«Kóknar-2019» jedel-aldyn alý is-sharasyn ótkizý qarsańynda Qazaqstan Respýblıkasy Ishki ister mınıstriniń orynbasary,  polısııa general-maıory Mahambet Abısatov Jambyl oblysynyń Shý qalasyna jumys saparymen keldi. Mahambet Qaıyrjanuly Jambyl oblysynyń Polısııa departamenti bastyǵynyń orynbasary,  polısııa polkovnıgi Nurjan Qalmetovpen birge Polısııa departamentiniń «Delta-Dolına» esirtki qylmysyna qarsy is-qımyl jónindegi óńiraralyq bóliminde bolyp, bólimniń jeke quramymen tanysty.  Sondaı-aq qyzmetkerler  qoldanatyn tehnıkalyq quraldar men jabdyqtardy qarap, naqty usynystar berdi.

-Esirtki qylmysyna qarsy is-qımyldyń tıimdiligin arttyrý jáne oblys aýmaǵynan tys jerlerge esirtkini shyǵarýǵa jol bermeý úshin is-sharany júrgizý kezeńinde qazirgi zamanǵy tehnıkalyq quraldarmen jabdyqtalǵan jedel-izdestirý toptary paıdalanylatyn bolady. Arnaıy is-sharalardy ótkizý  úshin shalǵaı ári jetýge joly qıyn aýdandarda avıatehnıkany qoldaný qarastyrylatyn bolady. Sonymen qatar qumǵa jaqyn aımaqtarda arnaıy maqsattaǵy bólinister men qyzmettik ıtterdiń qatysýymen patrýldeýdi júzege asyrý  úshin joǵary ótimdiligi bar avtokólikter jumyldyrylady, - dep atap ótti Mahambet Qaıyrjanuly.

Budan keıin M. Ábısatov respýblıkalyq nusqamalyq keńeske qatysyp, Qazaqstannyń barlyq óńirleriniń esirtki qylmystaryna qarsy is-qımyl jónindegi basqarmalarynyń aǵymdaǵy jyldyń tórt aıyndaǵy  atqarǵan qyzmetiniń qorytyndysyn tyńdady. Kezdesý barysynda  ózekti máseleler talqylanyp, aldaǵy josparlar aıtyldy, sondaı-aq naqty mindetter qoıyldy.

Jalpy, «Kóknar» jedel-aldyn alý is-sharasy Jambyl oblysynyń aýmaǵynda dástúrli túrde jyl saıyn ótip keledi. Mundaǵy maqsat esirtki aınalymynyń jolyn kesýge negildelgen. Bul turǵyda Jambyl oblystyq Polısııa departamenti «Delta-Dolına» esirtki qylmysyna qarsy is-qımyl jónindegi óńiraralyq bóliminiń atqaryp jatqan jumystary da aýqymdy.

Baqyt Jalǵas