Malaızııa eks-premeriniń "mıllıondaryna" Qazaqstannyń qandaı qatysy bar?

Qazaqstannyń tuńǵysh prezıdenti Nursultan Nazarbaevtyń týǵan inisi Bolat Nazarbaev sońǵy ýaqyttarda ártúrli janjaldardyń belsendi qatysýshysyna aınaldy. Elbasynyń inisine qatysty bul jolǵy daýly másele alystaǵy Malaızııa elimen baılanysty bolyp otyr.

Bolat Ábishuly 2001-2011 jyldar aralyǵynda Maıra Qurmanǵalıevamen nekede bolǵan. Sol kezde ol áıeliniń birinshi nekeden qalǵan balasy Danııar Kesikbaevty óz tárbıesine aldy.

Al 2012 jyldyń sáýirinde Nıý-Iork shtatyndaǵy manhettendik Joǵary sot bólimshesine Bolat Nazarbaevtan aryz tústi. Aryzynda ol Maıra Qurmanǵalıeva balasymen birge alaıaqtyqpen onyń "Plaza" qonaq úıindegi páterin tartyp aldy" dep jazǵan. Elbasynyń inisi páterdi 20 mıllıon AQSh dollarǵa baǵalady. Sonymen qatar ol burynǵy áıelin 75 mıllıon dollar turatyn asyl áshekeıler men Nıý-Iorkte ornalasqan taǵy 4 mıllıonǵa baǵalanǵan 2 páterdi ıemdenip aldy dep aıyptaǵan. Sonymen Maıra Qurmanǵalıeva óziniń burynǵy kúıeýi Bolat Nazarbaevqa jasaǵan materıaldyq shyǵyny 100 mıllıon dollardan asty.

2015 jyly Bolat Nazarbaevtyń burynǵy "ógeı balasy" Danııar Kesikbaev Malaızııa premer-mınıstriniń qyzyna úılendi. Sodan beri Maıra Qurmanǵalıeva balasymen birge Malaızııadaǵy eń qýatty otbasylardyń biriniń qorǵaýymen ómir súrdi. BIraq Qurmanǵalıeva men onyń balasy úshin ertegi uzaqqa sozylmady. 2018 jyldyń mamyr aıynda Nadjıb Razak óziniń premer-mınıstr tuǵyrynan túsip qaldy. Onymen qosa, onyń ústinen qylmystyq is qozǵaldy. Jemqorlyqtan bólek, Razak pen onyń jubaıy terrorızmdi qarjylandyrý men aqshanyń aǵylýy boıynsha aıyptaldy. Nadjıb Razaktyń úıine tintý jasaý kezinde polıseıler aqsha men asyl zattar tolǵan 72 chemodan, ataqty brendterdiń 284 sómkesin tárkiledi.

Qazirge kezge deıin Nadjıb Razak óziniń mıllıardtyq qarajaty týraly túsindire almady. Jýyrda Malaızııanyń eks-premeri Facebook arqyly  osy jaǵdaı týraly túsinik berdi. Razaktyń aıtýynsha, aqsha men asyl zattar tolǵan chemodandar oǵan tıesili emes. Olar onyń qyzy - Danııar Kesikbaevtyń áıeline tıesili eken. Sonymen qatar Rızak óz túsiniktemesinde "kúıeý balasynyń anasy Maıra Qurmanǵalıeva Qazaqstannyń eń baı adamdardyń biri – Bolat Nazarbaevtyń áıeli bolǵan" dedi. Dálel retinde ol burynǵy erli-zaıyptylardyń arasyndaǵy sot isi týraly siltemeni salyp qoıdy. Osyndaı qımylymen Nadjıb Razak oǵan qarsy ashylǵan qylmystyq iske Bolat Nazarbaevty da qosyp otyr.

Endi malaızııalyq quqyq qorǵaý organdary Nadjıb Razak aıtqan aqparattyń anyq-qanyǵyn teksermek. Bul jaǵdaı boıynsha Bolat Nazarbaev ádettegideı úndemeı otyr. Eger Nadjıb Razak óz degenine kóndirse, Elbasymyzdyń inisi Malaızııadaǵy qylmystyq istiń qatysýshysy bolyp ketedi. Malaızııa polısııasy Bolat Ábishulynan kúdiktense, ony Interpol jelisimen halyqaralyq qylmysker retinde izdeıdi.