"Bizdiń súıikti dáriger" fılminiń jalǵasy túsiriledi

Sh.Aımanov atyndaǵy "Qazaqfılm" kınostýdııasynda "Bizdiń súıikti dáriger - 2" atty jańa fılm QR Mádenıet jáne sport mınıstrliginiń tapsyrysy boıynsha óndiriske jiberiledi dep habarlaıdy Qamshy.kz aqparat agenttigi kınostýdııanyń baspasóz qyzmetine silteme jasap. 

Fılmdi Sh.Aımanov atyndaǵy "Qazaqfılm" AQ "Bissembin Film" birlesip túsiredi.

QR Mádenıet jáne sport mınıstri Arystanbek Muhamedıuly "Bizdiń súıikti dáriger" kórkem fılmi qazaqstandyq kórermender úshin aıtýly kartına jáne qazaq kınematografııasynyń altyn qoryna engendigin aıta otyryp, túsirilim tobyna úlken mindet qoıylǵanyn jetkizdi. 

"Bárimiz súıip kóretin bul kartınany jasaýǵa sol zamandaǵy qazaq óneriniń úzdik ókilderi qatysqan. Ony Bıbigúl Tólegenova, Iýrıı Pomeransev, Ermek Serkebaev, Múlik Súrtibaev, Hadısha Bókeeva jáne Sháken Aımanov jasap shyqqan. Fılmniń jalǵasyn óndiriske jiberer aldynda fılmniń rejısserine Sháken Aımanovtaı joǵary deńgeıde túsir dep tapsyrdym. Asqar Bısembınniń qolynan jaqsy fılm shyǵady dep senemin", - dedi Arystanbek Muhamedıuly is-shara barysynda.

"Bul fılmdi túsirý – úlken jaýapkershilik. Bárimiz de osy týyndyny kórip óstik emes pe. Bala kezimde bul fılmdi jıi kóretinmin. Biz rımeık túrisýdi kózdep otyrǵan joqpyz, bul sol oqıǵanyń jalǵasy ǵana", - degen edi  rejısser Asqar Bısembın.

Komedııanyń jalǵasyna birinshi bólimdegi dáriger Iýrıı Pomeransev túspek. Sondaı-aq, «Golos. Detı-4. Ýkraına» baıqaýynyń jeńimpazy Danelııa Týleshova túsirilimge qatysady.

- Osy fılmge túsetinime óte qýanyshtymyn. «Bizdiń súıikti dáreger» fılmin otbasymyzben birge jıi kóremiz. Sondyqtan da, bul fılmniń jalǵasy ár túrli jastaǵy kórermenderge qyzyqty bolady dep oılaımyn, - dedi Danelııa Týleshova.

«Bizdiń súıikti dáriger-2» fılmi – 1957 jyly Sháken Aımanov túsirgen tanymal mýzykalyq fılmniń jalǵasy. 

Usynǵan: Marjan Sábet