Toqaev moratorıı jarııalady

Qazaqstan prezıdenti Qasym-Jomart Toqaev jańa memlekettik kompanııalar qurýǵa moratorıı jarııalady, dep habarlaıdy Qamshy.kz aqparat agenttigi Aqordanyń deregin negizge alyp.

"Qıyn-qystaý zamanda memleket ekonomıkalyq ósimdi qoldaýdyń aýyrtpalyǵyn árqashan óz moınyna aldy. Ekonomıkanyń júıeli básekege qabilettiligi jeke bıznes esebinen qalyptasatynyn esten shyǵarmaǵan abzal. Dál osy sebepten memlekettiń ekonomıkadaǵy úlesin EYDU elderiniń standarttaryna deıin jetkizý mindeti qoıyldy. Bul jeke ınvestısııalar men shaǵyn jáne orta bıznestiń damýyna serpin beredi", - dedi Toqaev ulttyq ınvestorlar keńesiniń otyrysynda.

Memleket basshysy úkimetke 1 qyrkúıekke deıin memlekettik kompanııalar úshin ruqsat etilgen barlyq qyzmet túrine revızııa júrgizip, olardy qysqartýǵa qatysty usynystar engizýdi tapsyrdy.

"Búgin ekonomıkada jańa memlekettik kompanııalar qurýǵa moratorıı jarııalaımyn", - dedi prezıdent.

Aıta ketsek, búgin Qazaqstan prezıdenti Qasym-Jomart Toqaev Ulttyq ınvestorlar keńesiniń otyrysyn ótkizdi. Jıynǵa Ulttyq ınvestorlar keńesiniń músheleri, prezıdent ákimshiligi men memlekettik organdardyń basshylyǵy, "Atameken" ulttyq kásipkerler palatasy prezıdıýmynyń músheleri, ulttyq kompanııalar men elimizdiń bıznes ókilderi qatysty.

Otyrys taqyryby "Kásipkerlikti damytý – el ekonomıkasyn jańǵyrtýdyń negizi" dep ataldy.

Usynǵan: Ásel Bolatqyzy