• USD 378.65
  • EUR 430.07
  • RUB 6
  • CNY 55.1
22 Qyrkúıek, 12:36:52
Kekilbaevqa arnalǵan kesh

22 Mamyr, 2019 Saıasat

Rınat Zaıtov: Saılaý ádiletsiz ótse, halyq alańǵa shyǵatynyna kepildik beremin (vıdeo)

Eger bılik osy joly da saılaýdy ádiletsiz ótkizse, halyq saılaýdyń ertesi kúni alańǵa shyǵyp ketetine kepildik beremin

Aıtysker aqyn Rınat Zaıtov Adyrna ulttyq portalyna suhbat berdi dep jazady Qamshy.kz aqparat agenttigi. 

Suhbat barysynda Rınat Zaıtov qazirgi qoǵamda bolyp jatqan ózekti máseleler tóńireginde aıtty. "Shyndyqtan qashyp qutyla almaısyń", "Ádil saılaý úshin", "Meniń óz tańdaýym bar" degen túrli bannerler arqyly óz oıyn bildirip, qamalǵan belsendilerdi qoldaıtynyn aıtqan ol alda kele jatqan kezekten tys prezıdent saılaýy týraly pikirin bildirdi.

Aqynnyń aıtýynsha, alda kele jatqan saılaý – Qazaqstan qoǵamyn sananyń serpilip, qoǵamnyń bir silkinýine ákeletin saılaý.

"Bul saılaýdan úlken ózgeris kútemin. Bul saılaý - Qazaqstanda sananyń serpilýine, qoǵamnyń bir silkinýine ákeletin saılaý. О́ıtkeni bizdi 30 jyl bılegen basshy aýysqannan keıin qoǵamnyń óz tańdaýy ózine berildi. Sondyqtan bul saılaýǵa mindetti túrde qatysýymyz kerek. Buǵan deıingi saılaýlarda bizdi ótirikpen áldılep, ózderi kimge daýys bergizgisi kelse bergizip, óz degenin istep kelgen úkimet endi osy saılaýda olaı isteı almaıtyn shyǵar dep oılaımyn. Isteımiz dep oılap ta otyrǵan shyǵar múmkin. Biraq qarasha halyq qazir oılandy, oıandy. Túgeldeı bolmasa da halyqtyń basym bóliginiń oıanǵanyn ańǵarýǵa bolady aınaladan",- degen Rınat Zaıtov alda kele jatqan saıası doda týrasynda shyǵarǵan sý jańa óleńin de oqyp berdi:

"Qazaqstan turaq emes bir kúndik,

Otan úshin biz bıikke umtyldyq.

Oıan, qazaq, kóter basty, esti jı!

Osy saılaý eń aqyrǵy múmkindik.

Bizdiń tańdaý – kók baıraqty qulatpaý,

Bizdiń tańdaý – ultqa qaryz suratpaý.

Bizdiń tańdaý – balalardy óltirmeý,

Bizdiń tańdaý – analardy jylatpaý.

Bizdiń tańdaý – jerimizdi satqyzbaý,

Jazyqsyzdy abaqtyǵa japqyzbaý.

Bizdiń tańdaý – qazaqtardy qul qylmaý,

Nájisterden náresteler tapqyzbaý.

Bizdiń tańdaý – terezeni teń qylý,

Elimizdi erteńine sendirý.

Bizdiń tańdaý – jemqorlyqty kisendeý,

Bizdiń tańdaý – ultymyzdy el qylý, 

Bizdiń tańdaý – týysqandy talamaý,

Bizdiń tańdaý – qazynany tonamaý. 

Bizdiń tańdaý – jurttyń jıyp-tergenin 

Jelkesinen syǵyp alyp qanamaý.

Ketpesin dep týys tozyp, dos aryp,

Saılaýǵa óz únimizdi qosalyq.

Bizdiń tańdaý bolashaǵy qazaqtyń,

Mendik tańdaý – ol – Ámirjan Qosanov", - degen Zaıtov alda kele jatqan saılaýda "Ult taǵdyry" qozǵalysy usynǵan kandıdat Ámirjan Qosanovty qoldaıtynyn jasyrmady. Esterińizde bolsa, Rınat Zaıtov buǵan deıin de óziniń Youtube arnasynan tikeleı efırge shyǵyp, 9 maýsymda ótetin kezekten tys prezıdent saılaýy týraly oıyn bildirgen jáne sol kezde de ol Ámirjan Qosanovty qoldaıtynyn ashyq aıtqan. Biraq aqyn tek bul óziniń ǵana jeke pikiri ekenin jáne Qazaqstan azamaty retinde ony ashyq aıta alatynyn aıtty.

Buǵan deıin óz oıyn aıtys sahnasynda da, túrli suhbattarda da ashyq aıtatyn Rınat Zaıtov qazirgi Qazaqstan bıligine kóńili tolmaıtynyn hám bul bılik júıesine túbegeıli qarsy ekenin bul joly da aıtyp ótti. 

"28 jyl bılik qurǵan partııa ("Otan", "Nur-Otan") 28 jyldyń ishinde halyqty aldaýmen ǵana keldi. 28 jyldyń ishinde aıtqan ýádesinde turǵan joq. Onyń bireýin de halyq umytqan joq áli. Keshegi Hrapýnovty ákim qylǵan kim? Taǵy osy júıe. Keshegi jemqorlarǵa búkil qazynany bólip bergen kim? Taǵy osy júıe. "Oıbaı, sender 2020 jylǵa deıin 20 mıllıon bolasyńdar" dep urandap, qazir kóp balaly analardy zar jylatyp jatqan kim? Taǵy da osy úkimet. Dollar qymbattamaıdy dep Ulttyq banktiń tóraǵasyn teledıdardan sóıletip, bir aıdan keıin halyqty qan jylatyp dollar baǵasyn aspandatqan kim? Taǵy osy júıe. Búkil qymbatshylyqty alyp kelgen osy júıe. Búkil aýyl sharýashylyqty toqtatyp qoıyp, búkil aqshany bir qalaǵa salyp jatqan taǵy da osy júıe. Qazir ashyǵyn aıtqanda, bul júıe halyqty sharshatty. Sondyqtan óz oıym saılaýǵa qatysyp, óz kandıdatymyzǵa daýys berýimiz kerek. Qudaı betin aýlaq qylsyn, biraq bılik osy joly da halyqty oıynshyqqa aınaldyrsa, óz degenin istese, halyq shydamnyń sheginde tur. Osy joly da saılaýdy ádiletsiz ótkizse, halyq saılaýdyń ertesi kúni alańǵa shyǵyp ketetine kepildik beremin. Ony eshkim uıymdastyrmaıdy da, qarapaıym halyqtyń kózqarasy sondaı qazir", - dedi Zaıtov.

Sonymen qatar, Rınat Zaıtov qazaq jastarynyń elde jumys tappaı, jappaı shetelge ketip jatqany,  Qazaqstandaǵy dinniń nasıhaty, óner adamdarynyń ult taǵdyryna ún qosa almaı júrgendigi týraly ashylyp, ashyq aıtty. 

Vıdeo Adyrna ulttyq portalynyń Youtube paraqshasynan alyndy

Daıyndaǵan: Mııat Káshibaı

♦Oqı otyryńyzdar: Rınat Zaıtov: "Toqaevty óz erkimen oılanyp otyrǵan adam dep oılamaımyn"

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir