Halyqtyń Jákishevti "joqtaǵanyna" 10 jyl boldy

Muhtar Jákishevtiń tar qapasta otyrǵanyna 10 jyl boldy. 

Ol 2009 jyly mamyrda ustalǵan soń sybaılas jemqorlyq qylmysyn jasady dep aıyptalyp, 14 jylǵa sottalǵan. Ol jazasyn óteýge aldymen Almaty oblysyndaǵy Zarechnyı kentindegi túrmege jiberilgen, keıin Qaraǵandy oblysynyń Dolınka kentindegi qatań rejımdegi AK-159/6 kolonııasynda boldy. 2015 jyly týystary, advokaty men quqyq qorǵaýshylardyń ótinishiniń arqasynda ol Dolınkadan qaıta Zarechnyıǵa jiberilgen. Biraq 2017 jyly UQK-niń burynǵy tóraǵasy Nartaı Dútbaevtyń isine qatysty tergeý isine qatysý úshin Astana qalasynyń ızolıatoryna etappen jiberilgen. Tergeý isi aıaqtalǵan soń mamyr aıynda Dolınkaǵa, al shilde aıynan beri Semeı qalasyndaǵy qatań rejımdegi kolonııada jazasyn ótep jatyr.

Eske sala ketsek, «Qazatomprom» eks-basshysynyń advokaty Nurlan Beısekeev sońǵy medısınalyq tekserilýden soń onyń bas mı júıesinde aqaý bar ekeni anyqtalǵanyn aıtqan bolatyn.  Keıin byltyrǵy jyldyń 17 shildesinde Jákishovti Qaraǵandy oblysyndaǵy kolonııadan ShQO-oblysy Semeı qalasyndaǵy qatań rejımdi kolonııaǵa aýystyrdy. Osynyń sebebinen Muhtar Jákishevtiń densaýlyǵy taǵy da nasharlaı tústi.

Al jazda onyń jaǵdaıy múldem asqyna bastady. Jákishev úshinshi toptaǵy múgedek qataryna qosylyp, jumys jasaý qabiletiniń 50 paıyzynan aıyryldy. Sonymen birge Muhtar Jákishevtiń joǵary qan qysymnyń kesirinen kózdiń ishki tor qabyǵy jarylyp ketken. Kúz  mezgilinde Qaraǵandy qalasynda Jákishevtiń kózine operasııa jasaldy. 

Bul az bolǵandaı, qyrkúıek aıynda Muhtar Jákishevtiń anasy qatty syrqattanyp qaldy. Jákishev hál ústinde jatqan naýqas anasymen kezdesýine ruqsat berýin surap, ótinish jazdy. Alaıda 18 qyrkúıekte Muhtar Jákishevtiń anasy qaıtys boldy. Keıin qaraly habardy estigen Muhtar Jákishev anasyn sońǵy saparǵa shyǵaryp salýdy surap, ótinish jazdy. Biraq oǵan mundaı múmkindik berilmedi. 

Bıyl 21 mamyrda Jákishovtiń túrmede otyrǵanyna 10 jyl boldy. Osyǵan qatysty áleýmettik jeli qoldanýshylarynyń pikirin Qamshy.kz aqparat agenttigi oqyrman nazaryna usynady. 

Dosym Sátpaev: "Muhtar Jákishevtiń tar qapasta otyrǵanyna 10 jyl. Osy jyldar aralyǵynda onyń densaýlyǵy kúrt nasharlady. Alaıda ony sot merziminen buryn bosatýdan bas tartty. Degenmen bul quqyqty ekstremıstik áreketi úshin sottalǵan azamattardyń ózi qoldana alady. Al bılik olardan (ekstremısterden Red.) aýrýy asqynǵan adamdy qaýipti dep sanaıdy. Prezıdenttikke kandıdattardyń kópshiligi saıası tutqyndar týraly sóz qozǵamaýynyń ózi túsinikti jaıt. Kandıdattar bul týraly sóz qozǵamaýǵa tyryssa da, bul taqyryp óz mańyzyn joǵaltqan joq". 

Roza Turdymuratova: Júreginde ar-ojdany bar ár azamat onyń bostandyqqa shyqqanyn qalaıdy. Ol óz balalaryna qajet. Ol Qazaqstanǵa qajet. Bizdiń maqsatymyz – bul máseleniń ózektiligi men mańyzdylyǵyn kórsetý, sumyraılardyń kúndelikti "bas aýrýyna" aınaldyrý. Munyń ońaı emes ekenin bilemin. Alaıda múmkin emes dúnıe joq! 

Gúlmıra Tykıbaeva: Patrıot bolǵany úshin 10 jyl abaqtyda otyr. Onyń qazirgi jaǵdaıy óte aýyr. Oǵan medısınalyq kómek qajet. Muhtar Jákishov bostandyqqa shyqsyn!

Kópshilik prezıdent saılaýynan keıin el Jákishevtiń bostandyqqa shyǵatynynan úmitti. 

Oqı otyryńyzdar: 

♦Jákishev anasyn joqtasa, halyq Jákishevti "joqtaýda"