"Qurbaqa jegizý" tásili: ózińe unamaıtyn isten qalaı nátıje shyǵarýǵa bolady?

Kúndelikti ómirde jaqsy qarajat tabý úshin murynyńnan shanshylyp jumys jasaý qajet emes. Tek qana qyzmettiń kózin taba bilý qajet. Rob Mýr esimdi Ulybrıtanııalyq avtordyń "Tabys tabý qaǵıdalary" atty kitabynda osylaı qyzmet jasaýdyń joldary tolyǵynan talqylanyp, oqyrmanyna túrli usynystar men paıdaly keńester beredi. Kitapta jaqyndaryńa, ózińe ýaqyt bóle bilý týraly, qalaı úlken maqsattar qoıa bilý týraly, óz armandaryńyzdy qurban etpeı kózdegenińe jetý joldary týraly taraýlar bar. Endeshe, kitapty basty nazarǵa ala otyryp, ózińe unamaıtyn isti qalaı aıaqtaýǵa bolatyny týraly aıtyp kórelik.

Emosııańyzdy qolda ustaı alsańyz, siz bızneste de, jeke ómirde de biraz jetistikterge qıyndyqsyz jetesiz. Ashý men shekten tys qýaný - kásip salasynda kóptegen dúnıelerge kedergi bolatyn faktorlar. Tómende jetistikke jetip úlgergen adamdar qoldanatyn qaǵıdalar týraly aıtpaqpyz.

Aldymen eń mańyzdy tapsyrmany oryndańyz

Kúndelikti turmysta, qyzmette mańyzdy jumys bolǵanymen, sizdiń ony oryndaǵyńyz kelmeıtini, ony oryndaǵan ýaqytty bosqa zaıa ketirdim dep oılaýyńyz – úırenshikti jaǵdaı. Degenmen, eger ol is sizge belgili bir mólsherde paıda alyp keletin bolsa, onda siz ony oryndaýǵa tıistisiz. О́ıtkeni, sol isti júzege asyrý arqyly sizdiń jetistikke jol ashatyn múmkindikter kútip turýy ábden kádik.

Zaýqyń soqpaǵan isti de sapaly túrde atqaryp shyǵýǵa bolady. Ol úshin jumystyń aıaǵyna qaramaı, belgili bir bóligin oryndaǵanǵa deıin shaǵyn mejeler qoıyp otyryńyz jáne jıi-jıi az ýaqyttyq demalys jarııalap otyryńyz. Bul ádisterdiń sizge paıdasy tıeri sózsiz.

О́zińizdiń is-áreketterińizdi baqylaýda ustańyz

Adam ózin-ózi baqylaýda ustap, shalys basyp júrgenin sezgen ýaqytynda tezge salyp, túzelip otyrsa, úlken qıyndyqtarǵa, keleńsizdikterge uryna qoıýy ekitalaı. Mysaly, siz mańyzdy bir sharýamen shuǵyldanyp otyrǵanda, elektrondy poshtańyzdy nemese áleýmettik jelilerdegi jeke paraqshalaryńyzdy tekserip, bir sholyp shyqqyńyz keledi. Osy ýaqytta óz-ózińizge "joq" degen shekteý qoıa alsańyz, siz belgili bir mólsherde ýaqyt únemdeısiz.

О́zińizdi bir ispen shuǵyldanyp jatqan ýaqytta basqa nársege alańdamaýǵa úıretkenińiz abzal. О́ıtkeni, adam oıy bólingennen keıin jasalynyp jatqan sharýanyń nátıjesi shıki bolyp shyǵýy ábden múmkin. Sonymen qatar, bir ýaqytta eki sharýamen aınalysýdyń da jaqsy áser ete bermeıtini bar. Adam mıynda jumys jasap jatqan ýaqytta úlken úderister júrip jatady. Birinshi úderisti toqtatyp qoıyp, ekinshisine kóshý úshin birshama ýaqyt óltiresiz jáne qaı jerge toqtaǵanyńyzdy, qaı sharýa tóńireginde ne oılap turǵanyńyzdy shatastyryp alasyz.

Barlyq nazaryńyzdy bir baǵytqa jumsasańyz, istiń nátıjesi kóńil toltyrarlyqtaı bolyp shyǵary anyq. Al sapaly nátıje, sapaly ónim – sizdiń iskerligińizdiń, eńbek ónimdiligińizdiń dáleli.

Eń qıyn áreketterdi eń birinshi jáne barynsha jyldam oryndaǵan jón

Adamdardyń barlyǵynda ózi jaqtyrmaıtyn, biraq jasaý kerek degen tıptegi dúnıeler, is-áreketter bolady. Olardy barynsha ýaqytynda oryndap, artqa qaldyrmaǵan jón. Naqty sheshim qabyldańyz da, qıyndyq pen jaǵymsyzdyq týdyratyn áreketti oryndap tastańyz.

Braıan Treısı "Baqa jeńder!" dep aıtady. Elestetińiz, sizdiń bir kúnińizdegi eń qıyn ári jıirkenishti nárse – tiri baqany jeý. Eger siz búgin oryndalýy tıis áreketti tańerteńgi ýaqytta júzege asyrsańyz, keshke deıingi ýaqytta eshteńege alańdamaı júresiz.

Oryn alýy mindetti qıyn árekettiń eń durys sheshimi – ony jyldam ári tez oryndap tastaý. Adam sol qıyn áreketti ýaǵynda oryndamasa, ony oılaı berý arqyly odan ári qıyndata túsedi.

Joǵaryda aıtylǵan mysaldaǵy baqany tańerteń jep qoıǵan sekildi ózińiz úshin qıyn dep esepteıtin áreketti erte oryndap úlgerseńiz, siz jeńildikti sezinesiz. Sondaı-aq, sizdiń mıyńyz endorfındermen, baqyt gormonymen tolyǵyp, kóńil-kúıińizdiń kóterińki júrýine áser etedi.

О́zińiz qalamaǵan isti atqarý qajettiligi týyndaǵanda, sol áreketti júzege asyrǵannan keıingi seziletin jeńildik týraly oılańyz. Bul sizge qıyn áreketti oryndaýǵa kómekteseri anyq.

 О́z ýaqytyńyzdy qadaǵalańyz jáne ózgelerdiń sizdiń sheshimderińizge bılik júrgizýine jol bermeńiz

О́mir óz ýaqytyn josparlamaǵandarǵa, jalpy adam balasyna tosynnan jaǵymsyz jaıttar syılaýy múmkin. sol jaǵymsyzdyqtardan qashý úshin siz óz ýaqytyńyzdy mańyzdyraq dúnıelerdi iske asyrýǵa josparlap otyryńyz. Sondyqtan, adamdardyń barlyq usynystary men ótinishterine ıile ketpeı, qajetsiz dep esepteıtin áreketterden sypaıy bas tartýdy úırenińiz.

Eger sizdiń jeke josparlaryńyz bolmasa, ózge adamnyń bóligine aınalatynyńyzdy túsinińiz. Eń bastysy, ózgeler úshin qolaıly adam bolmaý kerek.

Siz bireýge shuǵyl qajet bolǵan jaǵdaıda da barlyǵyna birdeı senim artýdyń qajeti shamaly. О́ıtkeni, siz jospardan tys bir áreketke barý arqyly keleńsizdikke urynýyńyz ábden múmkin.

Ýaqyt – sizdiń qaıta aınalyp kelmeıtin eń qymbat qundylyqtaryńyzdyń biri. Sondyqtan, ony tıimdi ári paıda alyp keletin áreketterge ǵana jumsaǵan jón. Eń birinshi jaqsylyqty da, paıdany da ózińizge jasańyz.

Tapsyrmalardy oryndaý barysynda óz-ózińizge adal bolyńyz

О́z-ózińdi aldaý – adamılyqqa jat ári úlken qylmys. Kez-kelgen adam qıyndyqtan qashý úshin, tekke ýaqyt óltiretin dúnıelerdi jasaý úshin óz-ózin óz ótirigimen sendire alady jáne óziniń sol áreketin aqtap ala alady. Biraq túsinińiz jáne senińiz: "erteń" degen sóz "eshqashan" degen sózben birdeı. Sonymen qatar, sizdi "aýyr jumys jasadyń" dep kóndiretin, jalqaýlyqqa jeteleıtin ishki daýysyńyzǵa kóp qulaq asa bermegen jón. Al shyn mánisinde, siz ary ketse 5-6 saǵat qana eńbek ettińiz. Senińiz, siz ózińizdiń erik-jigerińizdi qamshylap otyrsańyz, budan da ónimdirek jumys jasaýǵa qabilettisiz.

Siz belgili bir jetistikke jetýdi qalasańyz, sol jolǵa maqsattar qoıyp, jospar jasap, sol boıynsha áreket etip kele jatsańyz, ózgeniń sizdiń jetistik shyńyna jeter jolyńyzdy kesýine jol bermeńiz. О́ıtkeni, sizdiń maqsatyńyz ózgelerdiń kóńiline qaraǵanda áldeqaıda mańyzdy.

О́zińizdi jigerlendiretin dúnıelerdi anyqtap, solardy kúndelikti jasaýdy daǵdyǵa aınaldyryńyz. Mysaly, tańerteńgilik bir shyny aıaq kofe ishý arqyly, bir áýen tyńdaý arqyly, bir dosyńmen sóılesý arqyly, jattyǵý jasaý arqyly árkim árqalaı jigerlenedi. О́z jolyńyzdy anyqtap, sol áreketti kún tártibine engizińiz.

Sizdi jetistikke jetý jolynda alańdatatyn dúnıelerden arylyńyz. Olar sizge jaǵymsyz kóńil-kúı syılaýy múmkin. Mysaly, artyq salmaqtan arylǵysy kelgen adamdarǵa tońaztqyshtan nemese sóreden tábet shaqyratyn taǵamdardy alyp tastaý kádimgideı úlken kómek beredi.

О́z-ózińizdi basqara alsańyz, qajetsiz nemese bosqa ýaqyt óltiredi dep esepteletin dúnıelerden bas tarta bilseńiz, sizde tulǵalyq ósý úderisi júre bastaıdy. Al adamnyń tulǵalyq bolmysy ósken saıyn jetistikke jeter joldary kóbeıedi.