"Saılaýǵa boıkot" dep urandaǵan nur-sultandyq sotqa tartylyp jatyr (vıdeo)

О́tken aptanyń sońynda óz úıiniń balkonynan "saılaýǵa boıkot" dep aıqaılaǵan "Nur-Sultan" qalasynyń turǵyny Darhan О́mirbaevty polısııa ustap áketken dep jazady Qamshy.kz aqparat agenttigi. 

Bul týraly 20 mamyrda Azattyq radıosynyń " AZAT NEWS" baǵdarlamasynda aıtyldy. 

Oqıǵa 17 mamyr kúni bolǵan. Sol kúni ataýly áleýmettik kómek alý úshin tórt balasynyń qujatyn ótkize almaı ashynǵan Darhan О́mirbaev úıiniń balkonynan aldaǵy kele jatqan saılaýǵa qatysty birneshe urandy aıqaılap aıtyp, aýlaǵa kórshileri jınalǵanda saılaý týraly pikirlerin suramaq bolǵan. Kóp uzamaı, ony polısııa qyzmetkerleri "qoǵamdyq tártipti buzdy" dep ustap, ertesi kúni oǵan "bılik ókiline baǵynbady" degen aıyp taqqan.

Alaıda, Darhan О́mirbaevty ustap alyp bara jatqanyn vıdeoǵa túsirgen sol mańdaǵylar quzyrly organ ókilderi oǵan kúsh qoldanǵanyn aıtyp otyr. Darhan О́mirbaevtyń zaıyby Dınara О́mirbaeva Azattyq tilshisine polısııa ókilderi kúıeýi ekeýiniń kózine gaz balon shashyp, olarǵa (kúıeýi ekeýine) qarsy elektroshok qoldanǵanyn aıtqan. Rasynda, kýágerler túsirip alǵan vıdeoda da olarǵa qarsy polısııa kıimindegi adamdardyń elektroshok qoldanyp júrgenderi anyq baıqalady.

Al búgin osy oqıǵaǵa baılanysty Nur-Sultanda sot otyrysy bastaldy. Biraq Darhan О́mirbaev óziniń qorǵaýshysynyń bolmaýyna baılanysty sýdıadan sotty keıinge shegerýin suraǵan. Al sýdıa oǵan qorǵaýshy tabýyna tek úsh saǵat qana berip, tústen keıin sot otyrysy qaıta ótetinin aıtqan. Alaıda tústen keıin Darhan О́mirbaev sotqa kelmegen. Sot bolsa, ony kúshtep alyp kelýge buıryq bergen.