Júkembaevtyń jarqyn jeńisi (vıdeo)

18 mamyrda qazaqstandyq kásipqoı boksshy Batyr Júkembaev  meksıkalyq Lýıs Hesýs Vıdaleske qarsy jekpe-jekte jeńiske jetti, dep habarlaıdy Qamshy.kz aqparat agenttigi. 

Kanadanyń Monreal qalasyndaǵy "Montreal Casino" oıyn-saýyq kesheninde ótken boks keshinde birinshi jartylaı orta salmaqta (63,5 kg) judyryqtasatyn Batyr Júkembaev pen Lýıs Hesýs Vıdalestiń  arasyndaǵy jekpe-jek 10 raýndtqa josparlanǵan bolatyn. Alaıda, kásipqoı boksta "777" laqap atymen tanylyp kele jatqan Júkembaev qarsylasyn birinshi raýndta-aq  nokdaýnǵa túsirip, tehnıkalyq nokaýtpen jeńiske jetti. 

"Kotto" laqap atymen belgili meksıkalyq Lýıs Hesýs Vıdales 30 jasta. Ol 2011 jyldan beri kásipqoı boksta júr. Bir kezdesýden basqasynyń bárin Meksıkada ótkizgen. Al Júkembaev sońǵy jekpe-jegin dál osy Monreal qalasynda ótkizip, meksıkalyq Hılberto Mesany (10-5-1, 6 KO) tóreshilerdiń sheshimimen jeńgen edi.

Esterińizge sala keteıik, bul - Batyr Júkembaevtyń kásipqoı rıngtegi 16 jeńisi. Shýlyq boksshy 13 jekpe-jekte qarsylastaryn merzimen buryn utqan. Dál qazir ol kásipqoı boksshylardyń reıtıngin jarıalap otyratyn boxrec.com saıtynyń tiziminde óz salmaǵyndaǵy 1690 boksshynyń arasynda 27 orynda kele jatyr.