Qytaılyq kásipkerler qazaqtyń kıizine qyzyǵa bastady

Qytaıdyń saýda kompanııalary kıizben jumys isteıtin qazaqstandyq qolóner sheberlerimen tyǵyz baılanys ornatpaqshy dep habarlaıdy Qamshy.kz aqparat agenttigi sputniknews.kz saıtyna silteme jasap. 

20-26 mamyr aralyǵynda Qytaıdyń mádenıet pen týrızm aptalyǵy ótedi. Oǵan osy eldiń ártisteri, qolónershileri, ýshý sheberleri men saýdagerleri keledi.

Aptalyqqa Qytaıdyń iskerlik toptary da keledi. Olar Qazaqstanda joǵary dárejeli týrıstik aımaqtardy qurýǵa qatysty óz usynystaryn jasaıdy. Al "Astana Arbat" aımaǵynda qytaılyq batbyraýyqtar shoýy men jármeńke uıymdastyrylady. Ol jerde jibek, sháı, zergerlik buıymdar, kıim-keshek jáne taǵy basqa zattar satylady.

Qytaıdyń mádenıet jáne týrızm mınıstrliginiń Nur-Sultandaǵy ókildiliginiń basshysy Van Shýlınniń aıtýynsha, qazir qytaılyqtar arasynda kıizden jasalǵan buıymdarǵa suranys artyp keledi. Osyǵan baılanysty bul eldiń kásipkerleri saýda baılanystaryn ornatýǵa múddeli.

"Sońǵy kezderi qytaılyq kásipkerler men týrısterge Qazaqstanda kıizden jasalǵan taýarlar qatty unap júr. Sebebi osy jerdiń sheberleri bárin óz qolymen jasaıdy. Aptalyq aıasynda saýda kompanııalary da keledi. Olar kıizben jumys jasaıtyn sheberlermen jaqyn tanysýdy kózdeıdi. Árıne, saýda-sattyqpen aınalysatyn kompanııalar aldymen jergilikti naryqty zertteıdi. Odan keıin qolóner sheberlerimen baılanys jasaıdy", - deıdi Shýlın.

Al "Kazakh Tourism" ulttyq kompanııasy basqarma tóraǵasynyń orynbasary Tımýr Dúısenǵalıevtiń sózine qaraǵanda, Eýropanyń týrısteri barǵan jerdiń tabıǵaty men salt-dástúrin zerttep, jańa emosııalardy izdese, qytaılyq týrıster zattardy satyp alýdy jaqsy kóredi.

"Búginde Qazaqstan arqyly ushatyn qytaılyq týrıster úshin 72 saǵattyq vızasyz rejım bar. Biz osy múmkindikti barynsha paıdalanýymyz qajet. Máselen, qytaılyqtar tanymal brendterdi izdeıdi. Sol úshin Dýbaı, Parıj ben Mılanda aıaldaıdy. Ondaı brendter bizde de satylady. Mine, kıizge de qyzyǵýshylyq oıandy. Demek, qazaqstandyq shokolad, bal men konıaktan basqa da dúnıeler bar", - dep atap kórsetti Dúısenǵalıev.

Nur-Sultanda ótetin Qytaıdyń mádenıet pen týrızm aptalyǵy aıasynda 72 saǵattyq vızasyz rejımmen bir top qytaılyq týrıst keledi.

Usynǵan: Maqpal Sembaı