Sottalýshy sot zalynda kúre tamyryn kesti

16 mamyrda Qaraǵandy oblystyq sotynyń ǵımaratynda eki jylǵa sottalǵan Balqash qalasynyń turǵyny Aleksandr Gıt apellıasııalyq alqa sot sheshimin oqyǵan soń sotqa qatysýshylardyń kózinshe kúre tamyryn kesti. Sottalýshy osylaısha alǵashqy ınstansııanyń úkimin ózgerissiz qaldyrǵan sot sheshimine narazylyq bildirgen dep jazady Qamshy.kz aqparat agenttigi Azattyq radıosyna silteme jasap.

Aleksandr Gıtke aýrýhanada medısınalyq kómek kórsetilgen soń polısııa bólimshesine alyp ketken. Oqıǵany óz kózimen kórgen ekinshi sottalýshy Evgenıı Glazkov bylaı dedi:

"Aleksandr ekeýimiz apellıasııalyq sot ádil sheshim shyǵaratyn shyǵar dep úmittengen edik. Ekeýimiz de aıyptaý sıpatyndaǵy úkimmen kelispeımiz, sebebi kináli emespiz. Biz janar-jaǵar maı urlaǵan joqpyz. Oǵan dálel bar. Al endi nátıjesinde biz sottalyp, jumysymyzdan jáne jep otyrǵan nanymyzdan aıryldyq. Alty mıllıon teńge turatyn kóligimdi de kámpeskelep aldy, - deıdi.

Alenksandr Gıt pen Evgenıı Glazkov osy jyldyń naýryz aıynda "qyzmettik ókiletin paıdalanyp, senip tapsyrylǵan múlikti ıemdený" baby boıynsha eki jylǵa sottalyp, múlikteri tárkilengen.

Sottalýshylardyń advokaty sot úkimine qaıta shaǵym túsiretinin aıtyp, aıyptalýshylardyń urlyǵy dáleldenbeginin aıtty.

"Sot prıstavtary men qorǵap otyrǵan azamattyń taǵy da óz-ózine qol jumsamas úshin shara qoldandy, áıtpese ol taǵy da moıyn tamyryn kespek bolǵan. Jedel járdem kóligi ony alyp ketti, oǵan medısınalyq kómek kórsetti. Sodan soń polısııa bólimshesine apardy, onda odan suraq-jaýap alyndy. Materıaldy tirkep, ''óz-ózine qol jumsaýǵa tyrysý" faktisi boıynsha sotqa deıingi tergeý júretin shyǵar. Prosessýaldyq sheshimniń qalaı bolatyny ázirge belgisiz. Biraq qqalaı bolǵanda da úkim jáne apellsııalyq ınstansııa sheshimimen kelispeımiz jáne kassasııaǵa shaǵymdanamyz", - dedi sottalýshylar advokaty Sergeı Galko.

Qaraǵandy oblystyq soty oqıǵaǵa baılanysty bylaı dep túsinikteme bergen:

"Apellıasııalyq ınstansııanyń isti zertteýine jetkilikti ýaqyty boldy. Alqa úkimdi ózgerissiz qaldyrdy. Sot sheshimi oqylǵan soń apellıasııalyq ınstansııa sheshimimen kelispegen sottalýshy Gıt lezvıemen ózin jaraqattaǵan. Apellıasııalyq ınstansııa boıynsha sot aktisine shaǵymdaný tártibi sottalýshylarǵa túsindirilgen edi. Sottalýshyǵa ýaqytynda medısınalyq kómek kórsetildi", - dedi sýdıa Roza Nurmahanova.

Usynǵan: Mııat Káshibaı