"Aqordanyń emes, ákem men sheshemniń jobasymyn"

Áleýmettik jeliler arqyly tikeleı efırge shyǵyp, dál osylaı málimdegen Ámirjan Qosanov Qazaqstan prezıdentine úmitker retinde tirkelgen sátten bastap ózin synaı bastaǵandarǵa jaýap berdi dep habarlaıdy Qamshy.kz aqparat agenttigi.

20 jyldan beri ózin oppozısııa ókili dep esepteıtin saıasatker basqa-basqa emes ózin synaýshylardyń basym bóligi bir kezderi dostyq qarym-qatynysta bolyp, bir múdde jolynda júrgen zamandastary ekenine nalıtynyn da jasyrmady.

«О́kinishke qaraı jaý jaǵadan alǵanda, bóri etekten deıdi. Men týraly «Aqordanyń adamy, bıliktiń jobasy» degen alyp-qashpa áńgimeler shyǵyp jatyr. Men osy sózdi bılikten, bıliktiń jandaıshaptarynan estımin be dep edim, bul sózdi oppozısııada, demokratııa qatarynda birge júrgen azamattardan estip jatyrmyn. Soǵan men nalımyn, kimdermen men dos boldym, kimdermen birge júrdim, kimdermen birge osy rejımge qarsy kúrestim dep. Endi solarǵa jaýap berip keteıin. Men Aqordanyń emes, ákem men sheshemniń jobasymyn. Meniń artymda eshqandaı olıgarh nemese saıası qurylym turǵan joq» dedi.

Sonymen qatar Qosanov ózine nege dál osyndaı pikirler aıtylyp jatqanyna da toqtalyp ótti. Onyń oıynsha, synap júrgender bul jaǵdaıdy óziniń  20 jyl boıy oppozısııada júrse de, saıası qýǵynǵa ushyramaı, elde turyp jatqanymen baılanystyrady eken. Biraq Qosanovtyń aıtýynsha 1997 jyly oppozısııaǵa ótken sátten bastap, ol bılik tarapynan kóptegen qysym kóripti.

«1997 jyly oppozısııaǵa ótkennen keıin 1998 jyly meni aıaǵy aýyr áıelimmen birge sabap ketti. Sol kezde áıelimniń qursaǵyndaǵy náreste úshin qatty alańdaǵan edim. Alaıda ol aman-esen ómirge kelip, osy kúnge jetti. Shúkir. Sondaı-aq, men ústimnen is qozǵalyp, sottalǵanmyn. 2003 jyly prezıdenttiń (red. N.Nazarbaev) úlken kúıeý balasy Rahat Álıev quzyrly organdardy basqaryp otyryp, meniń ústimnen qylmystyq is qozǵady. Meni naqty sottaıtyndaı boldy. Biraq halyqaralyq uıymdar jáne Djon Makkeın sııaqty senator arasha tústi. Budan bólek úıimniń esigin betondap, terezesinen tas atqan kezder de bolǵan. Tipti meniń jerleý rásimimdi tólep, meniń úıime jerleý agenttiginiń qyzmetkerleri kelip, maǵan Qosanovty qaı din boıynsha jerleımiz degen. Meniń Keńsaıda jatqan qaryndasymnan «Əmirjan, seni izdep otyrmyn» dep jedelhat uıymdastyrǵany taǵy bar. Men onyń bárin kórdim. Men bıliktiń mundaı quıtyrqy áreketterinen qoryqpaımyn» dep aıtty.

Qosanov basynan ótken bul jaǵdaılardyń barlyǵyn ózine «bıliktiń adamy» dep jala jaýyp jatqandarǵa jaýap retinde aıtylǵanyn tilge tıek etti.

«Men bıliktiń adamy bolsam, dál osyndaı teperishti kórer me edim? Kezinde Zamanbek, Altynbek, Batyrhandy eske alǵan mıtıngterdi  de, Jańaózendegi narazylyq aksııalaryn da men júrgizdim, sol úshin 15 táýlikten eki ret abaqtyǵa jabylyp, ashtyq jarııalaǵan qazaqpyn. Sondyqtan maǵan dál bulaı «bıliktiń adamy» dep  jala jabý negizsiz» dep málimdedi.