Mıllıarder óz qupııasymen bólisti: Az jumys jasa, kóp aqsha tap!

Kásipkerlik – zaýqyń soqsa qyzmet etip, qalaǵan ýaqytyńda demalatyn sala emes. Kásippen aınalysqan tulǵa árqashan damý men izdenis ústinde, ónimdi eńbek etý úderisinde bolýy shart. Eger bul "tártipke" kónýden bas tartsa, alǵa basqan bir qadamy keıin ketip, eń aqyrynda quldyraý men daǵdarystyń qurbandyǵyna aınalady. Qazirgi naryq talaptary eńbekti eki eseleýdi talap etedi. Olaı jasamaǵan kásipker básekelestikte utylyp, óz óniminiń jemisin kórý turmaq, shyǵynyn óteý barysynda qıyndyqtarǵa tap bolady. "Zamanyń túlki bolsa, tazy bop shal" degen halyq sózi osy jerde týra keletin ispetti.

Qamshy.kz aqparat agenttigi azamattarǵa bir paıdasy tıer degen oımen álemdik arenada jetistik shyńyn baǵyndyrǵan áıgili tulǵalardyń keńesterin, olardyń jetistikke aparar jol dep eseptegen qaǵıdalaryn usynyp keledi. Búgin de sol baǵytymyzdan aınymaı, Djordj Sorostyń óz tájirıbesinde daǵdyǵa aınaldyrǵan 15 keńesin usynýdy jón kórip otyrmyz.

17 jasynda týǵan jerin tastap, batysqa jónelgen, sonda daıashy, baqshada qatardaǵy jumysshy bolyp qyzmet etken Soros qandaı keńes bermek? Bilgińiz kelse, ári qaraı oqyńyz.

"Men ómirdiń zańdylyǵymen júrgennen góri ol erejelerdi ózgertken durys dep esepteımin"

Adam bir zańdylyqqa ózin baǵyndyrǵannan góri múmkindigi jetse, óz taqymyna dóp keletin erejelermen júrgeni abzal. Bul arqyly "oıyńa ne kelse, sony iste" degen úgit-nasıhat júrgizbekshi emespiz. О́z quzyryń bar jerlerde barlyǵy ónimdi eńbek etýi úshin keı nárselerdi ózgerte bilgen abzal ekenin jetkizý – maqsat.

"Men ózime jáne ózgelerge synı kózqarasta qaraıtyn adammyn"

Syn – qatelikterdi kórýge jáne olqylyqtardyń orynyn der shaǵynda toqtata bilýge kómektesetin tamasha qasıet. Ataqty mıllıarder ózine eshqashan ótirik esep bermeýdi, qatelikterin shynymen moıyndaı bilýdi jón dep esepteıdi. Onyń paıymdaýynsha, osy arqyly adam óz boıyndaǵy kemshilikterin ýaqytynda uǵyp, ony túzetý úshin áreket etedi.

"О́zgeler qatelesýge uıalady, al men úshin óz qatelikterimdi seziný – lázzatty dúnıe"

Qatelesý adamzat balasyna tán nárse. Biraq qateni ýaqytynda túsinip, ony qalpyna keltirý úshin áreket etý, kelesi joly atalǵan qatelikterdi qaıtalamaýǵa tyrysý barlyǵyna birdeı berilgen qasıet emes. Adamdar qateleskennen keıin ony túzetý arqyly óziniń shalys qadamyn ózgeler kóredi dep qysylǵandyqtan eshteńe jasamaıdy nemese qateligin ózi moıyndaı almaı júre beredi. Soros óz qateligin ýaqytynda tanı bilý túsingen adamǵa lázzat syılaıtynyn aıtady.

"Qaýip pen táýekel bar jerde qyzmetke degen qulshynys, ónimdilik bolady"

Kásip salasynda bolsyn, ózge baǵytta bolsyn, adamdar materıaldyq jáne rýhanı turǵyda daǵdarysqa túsýden qashady. Bul – dáleldengen qaǵıda. Demek, ózińizdi eńbekke ıtermeleı túsetin osynaý bir osal tusyńyzdy myqtap paıdalanǵanyńyz jón. Birinshi deńgeıge bir-aq túsiretin qaýpi bar nemese táýekel etý qajet árekettermen aınalysyńyz. Bir nársege mán bergenińiz abzal. Siz qaýipke bas tikken nemese táýekel etken dúnıeniń josparly túrde oryndalǵan ýaǵynda ózińizge tabys ákeletin bolýyn esten shyǵarmaý qajet.

"Men jumys istegendi unatpaımyn. Tek qana sheshim qabyldaýǵa qajetti eń tómengi shektegi tapsyrmany oryndaımyn"

Adamdar kóp jumys jasaý jetistikke jetkizedi dep oılaıdy. Shyn máninde múlde olaı emes. Adam aqylmen jumys jasap, barlyǵyn josparly túrde oryndaǵan kezde ǵana jetistikke jete bastaıdy. Demek, barlyǵyn maqsatyńyzǵa oraı, aqyldy túrde jasaýǵa bet buryńyz.

"Qajet kezinde bar kúshimdi sarqyp jumys jasaımyn"

Kez-kelgen adamda qulshynys artyp nemese tómendeıtin ýaǵy bolady. Adamnyń qulshynysy eńbek ónimdiligine tikeleı áser etedi. Biraq kúndelikti standartty jumys jasaý eshqandaı paıda ákelmeýi múmkin. óz ýaqytyńyzdy tıimdi paıdalanyp, qulshynysyńyz artyp turǵan mezgilde ónimdi jumys jasaýǵa daǵdylanyńyz. Bul arqyly siz óz salańyzda jetistikke jetýge baǵyt alasyz.

"Men árqashan tuıyq boldym. Bul maǵan qarjylyq áleýetimdi kóterýge kómektesti"

Tulǵanyń minezi ashyq bolýy nemese barlyǵyn ózgelermen bóliskisi kelip turatyn qasıeti keıde onyń damý jolynda kedergi bolatyny bar. Soros ózin biraz nárseni qupııa ustaýǵa, josparlaǵan isin oryndalmaıynsha eshkimge aıtpaýǵa daǵdylanǵanyn aıtady. Onyń paıymdaýynsha, dál osy "tuıyqtyq" adam damýyna birshama jaqsy áser etedi.

"Aldymen jaqsy ómir súrýge sosyn paıda tabýǵa umtyldym"

Qazirgi qoǵamda birinshi orynda el qatarly ómir súrý turady. Úlken qalalarda jeke baspanańnyń bolýy, jeke kóligińniń bolýy sekildi qajettilikterge qol jetkizý arqyly esh ýaıymsyz paıda tabý jolyna túsýge bolady. Oılanyńyz. Siz aı saıyn páteraqy tólep, taksımen júrip-turatyn bolsańyz, qor jınaýǵa múmkindigińiz bolady ma? Árıne, joq. Sondyqtan, ózińizdiń turmystyq qajettilikterińizdi tolyqtyryp qoıýǵa tyrysyńyz.

"Adam ómirindegi qatelikter bıologııadaǵy mýtasııa jáne evolıýsııa úderisi sekildi"

Joǵaryda da aıtyp óttik, qatelik adam damýyna áser etetin birden-bir faktor. Álemdik arenada jetistik shyńyn baǵyndyrǵandardyń kópshiligi ómirinde júzdegen qatelikterge urynǵandaryn, sonan soń týra joldy tapqandaryn aıtady. Demek, qatelesýden qoryqpaý qajet. Tek qana týra joldy tabýǵa umtylmaq shart.

"Men ózgeler usynǵan erejelerdi qabyldamadym. Eger solaı jasaǵanda, ómir súrmes edim"

Jer betinde qansha adam bolsa, árbiriniń eshkimdikin qaıtalamaıtyn óz joldary bar. Sol jolda jetistik shyńynyń qaı taraýda jatqanyn da eshkim bilmeıdi. О́ıtkeni, ol ir adamda ártúrli toraptyń tórinde ornalasqan. Túrli keńesterden tek qana tájirıbe jınaýǵa bolady. Biraq týra bireýdiń keńesi arqyly júrý – qate baǵyt. О́zińizdiń tájirıbeńiz ben ózgelerdiń pikirlerin tyńdaı otyryp, óz jetistigińizge aparar dańǵyldy tapqanyńyz abzal.

"Men rızashylyq pen laıyqty bolýdy kóp shatastyrdym"

Álemdegi kez-kelgen kisiniń rızashylyq pen maqtaýǵa, marapattaýǵa qýanatyny anyq. Olar kóp jerde ózine laıyq marapat alyp jatyrmyn dep oılaıdy. Degenmen, qazirgi qoǵamda kóp adam óziniń dárejesine laıyq emes maqtaýlarǵa ıe bolyp jatady. Bul – kúndeý nemese kórealmaýshylyq emes. Tek qana osy jaǵdaı adam damýynyń keri ketýine tikeleı áser etetinin umytpaý kerek. Marapattan bas tartpańyz, dese de, onyń býyna urynyp, ózińizdiń qarqynyńyzdy joǵaltyp almaǵanyńyz abzal.

"Men aqshany bylaı taptym: tek qana qarjy naryǵynda bolyp jatqan ózgeristerdi mezgilinde túsinýge tyrystym"

Soros osylaı deıdi. Bul qaǵıda tek qana qarjy naryǵynda emes, barlyq salada qyzmet jasaıdy. О́z baǵytyńyzdaǵy jańashyldyqtardy jedel tanýǵa umtylyp, solardy óz paıdańyzǵa ońtaılaı tússeńiz, nur ústine nur. Jańashyldyqtar dáýirinde árbir ózge nárseniń suranysqa ıe bolatyny, al suranystyń artynda qyrýar qarajat jatqany aıtpasa da túsinikti nárse.

"Jetistikke jetý úshin túrli adamdarmen sóılesetin bos ýaqyttardyń kóp bolǵany jaqsy"

Qazirgi qoǵamda adamdardyń kópshiligi jumystan bas almaı, aýyr grafıkpen qyzmet etedi. Bulaı jumys jasaý adamnyń damý múmkindikterin shekteıdi jáne ózge baǵyttardy synap kórýden aıyrady. Sorostyń keńesine qulaq túrsek, ol adamdarmen kóp sóılesý, ózińe jańa bir orta ashý arqyly ǵana jetistikke jedel jetýge bolady eken.

"Aqsha – jetistikke jetý jolyndaǵy bir ǵana qajettilik. Aqshanyń keı jaǵdaılarda paıda ǵana emes, zııan da tıgizetin kezderi bolady"

Aqsha barlyq kedergini sheshetin qudiret emes. Esińizde bolsyn, barlyǵy aqshaǵa kelip tirelmeıdi. Aqsha – qajettilik. Orynymen taýyp, orynymen jumsaý qajet.

"Seniń durys nemese burys ekeniń túk te mańyzdy emes. Mańyzdysy – qansha paıda tapsań duryssyń, qansha dúnıe joǵaltsań, qate joldasyń"

Sorostyń bul sózi kóp nárseni aıqyndap beredi. Ol qatelikter men durys joldyń saǵan ákeler materıaldyq hám rýhanı paıdasymen esepteletinin bir aýyz sózge tamasha syıdyra bilgen. Bul – ómir shyndyǵy.