Qoqystan tabylǵan mıllıoner qyz – "Uly dalanyń sandalbaıy"

Jańbyrly kún. Qolymda qolshatyrym joq. Búgin tórt adammen kezdesýim qajet. Jospar boıynsha. Uldana – birinshisi. Kútip otyrmyn, kútip otyrmyn. Esik jaqqa qarap qoıamyn. Ol keshikti... Birde kún sııaqty jarqyraǵan sap-sary syrt kıimin sheship, qarama-qarsy betke kelip jaıǵasty. Janaryna qaraımyn. Kitap muqabasynda aǵyl-tegil kóz jasyna erik berip, betindegi boıaýy aqsa da kóziniń ótkirligi taımaǵan qyz dál qazir kúlip-jaınap otyr. Ol – qoqystan tabylǵan mıllıoner qyz. Aty-jóni – Uldana Erqasym.

Ol bir qyzyq adam. Qatal taǵdyr silkilep, myń synasa da, tynshymaǵan. 17 jasynda mıllıoner atanyp, 22 jasynda kitap shyǵarǵan óziniń sózimen aıtsaq, «uly dalanyń sandalbaıy» Uldana Erqasymmen halýa qosylǵan kofe ishe otyryp qurǵan áńgimemizdi bólshek-bólshekke bólip oqyrman nazaryna usynamyz.

Ol – Ardaq emes

Ár adamnyń ómirinde bir pendege aıtýǵa batyly barmaǵan syry bolady. Muny ádette shkafqa jasyrǵan súldemiz dep jatamyz. Ústimizdegi jyldyń 24 sáýirinde tusaýy kesilgen «Qoqystan tabylǵan mıllıoner qyz» kitaby motıvasııa izdegenderge arnalmaǵan eken. «Batyldyqtyń sımvolyna arnalsyn» degen nıetpen jaryqqa shyqqan týyndy 23 jasqa endi tolǵan arýdyń 22 jylǵy ómiriniń qysqasha bıografııasy. Taǵdyrdan asqan sıýjet joq degen sózderdi uran etken kitaptyń 150 beti qazaqsha, 150 beti oryssha jazylǵan. Aǵylshynsha nusqasy da pýblıkasııaǵa daıyn.

Kitaptyń tipti treıleri bar. Sapasy syn kóteretin beıne kadrlaryn kóre otyryp dene titirkenedi. Vıdeosy osyndaı sumdyq bolsa, kitap betinen qandaı shyndyq oqımyz degen oı shyndyǵynda maza bermedi. #Shyndyqtan qashyp qutylmaısyń deıdi jastar Jastar jylynda... Ol qandaı shyndyq?! Almatyda shalqyp júrgende ol Uldana bolsa, aýyr-aýyr zattar tasyp, taýar satqanda ol Ardaq.

Ol – alaıaq emes

«Bul kitap qalaı dúnıege keldi?» degen meniń suraǵyma kúlip otyryp Uldana Erqasym bylaı dep jaýap qatty:

«Kitap negizi osy oqıǵadan bastaý alady. Shetel kórgisi kelgen qazaq qyzdaryn bastap, Sharm-ál-Sheıh qalasyna ushyp kelgenbiz. Bul Jańa jyl qarsańy bolatyn. Bári sátti bastalǵanymen aıaǵy daý-damaıǵa ulasty. Qonaqúıdiń sýy óship qalǵandyǵyna yzalanǵan qyzdar meni bárine kinálaı tústi. Tipti aryzdanyp, sottap jibergileri keletindikterin jasyrmady. Jańa jyldyń túninde kóp jyladym. «Alaıaq», «aramza», «jezókshe» degen qaýesetten sharshaǵan men bar shyndyǵymdy aıtyp, kitap jazatyn kún jetkenin túsindim. Túsindim de, Alla Taǵalaǵa «sol kitabymdy jazyp beretin redaktordy jibere qoıshy» dep jalbaryndym. Qudaı qabyl etti.

Ushaqqa otyrsam, jýrnalıst Zarına Mýslımdi baıqap qaldym. Tek qana Zarına hanym osy kitapty jazyp shyǵa alatynyna senimdi edim. О́zimdi tanymaıtyn bógde jannyń qasyna barǵyzyp, «qasyma otyryńyzshy» dep kóndirip, óz ómirimnen syr shertkizýge bel býdym. Oılaǵanym iske asty. Zarına Mýslım Qazaqstanǵa túsken boıda kezdesý belgiledi. 30 saǵattyq áńgime dıktofonǵa jazyldy. 15 kún, 15 túnniń ishinde men armandaǵan, maǵan erkindik syılaıtyn, ózgeler úshin batyldyq sımvolyna aınalatyn bolashaq bestseller kitaby dúnıege keldi. Menimen psıholog Aıda О́temisova da jumys jasady. Kitap dızaıny – Aslan Toılanındyki. Búginde kitap Melomanda óz oqyrmanyn kútip jarqyrap tur. Baǵasy – 5880 teńge. Nýmerologııa boıynsha eki segizdik sáttilik alyp keledi eken. Muny sáıkestik emes, taǵdyr dedim».

Ol – júk tasýshy

«Saýda jasap júrgende «Ardaqpyn» dep ótirik aıtqan. Oqýǵa grantqa túspegende «tústim» deı salǵan. 22 jasymda baspanaly bolyp, avtosalonnan temir tulpar satyp alyp, grýppalastaryn tań qaldyrǵan. Olarǵa da ótirik aıtqan. «Nemen shuǵyldanasyń?» degen kúdikke toly suraqtaryna «sandalbaımyn» dep qysqa qaıyryp otyrǵan. Oqý oqymaı, kúndiz-túnin mańdaıdan aqqan terdi súrtýmen ótkizgen qaısar qyz. Tipti búgin túnde kóz shyrymyn almaǵanyma qaramastan suhbatqa alyp-ushyp kelgen bir qyzyq adam. Uldananyń bir apta boıy uıyqtamaı jumys isteıtin kezderi jıi bolady eken. Biraq sharshamaıtyn deıdi... О́tirikterden ǵana ábden mezi bolǵanyn ashyq aıtty. «Osy sen qandaısyń?», «Józekshe emespisiń?», «Bireýdiń ashynasy sııaqtysyń» degenderge kitap arqyly aýyzdaryna qaqpaq bolýdy jón sanapty. Qanshama jyldar boıy bárin ishten tyndyrǵan qyz búginde azat.

J: Sonymen, Uldana, alǵashqy mıllıonǵa qalaı qol jetkizdińiz?

U: Saýda jasadym.

J: Júk tasýshymyn dep qaldyńyz.

U: Mıllıonnyń taýaryn kózge elestetińizshi. Qanshama qorap. Bir gazelge syıǵyzý, ony kóterip, ekinshi núktege jetkizip berý, ornalastyrý – qara kúshti qajet etetin jumys. Qolym kús-kús, kıimim kir-kir bolyp mıllıon ret osylaı júk tasýshy boldym. Syrt kóz meni tipti qyz dep oılamaıtyn shyǵar. Túrim ádette adam shoshyrlyqtaı bolady.

J: Búgin siz kimsiz?

U: Búgin men Allany aýzynan tastamaıtyn azat adammyn. Dream Trip kompanııasynda jumys isteımin.

J: Erteń kim bolmaqsyz?

U: Úsh tilde jaryq kórip, oqyrmannyń júregin jaýlaǵan bestseller kitap «Qoqystan tabylǵan mıllıoner qyzdyń» avtory bolmaqshymyn. Kitabym boıynsha túsirilgen kınony úlken ekrannan tamashalap otyratyn baqytty jan bolmaqshymyn. Jarty júregin taýyp, ul-qyzdy dúnıege ákelip, baı-qýatty ómir keshetin arý ana bolmaqshymyn.

Onyń sponsory – Alla Taǵala

«Melomanda" kitabyńnyń turýy maqtanysh sezimin týdyrady eken. Sebebi qazaqsha jazylǵan kitaptarǵa arnalǵan nebári 7-aq sóre bar. Solardyń arasynda endi 22 jastaǵy qyzdyń qoljazbasy da tur. «Bul kitaptyń sponsory kim?» degen suraq týyndap jatyr. Men bárine «meniń sponsorym – Alla Taǵala» dep jaýap beremin. Siz meni qııalı dep oılap qalýyńyz ǵajap emes. Biraq bul shyndyq. Kitapty oqı otyryp, oǵan kózińiz jetedi. Sebebi meniń únemi janymnan tabylatyn jalǵyz dosym bar, ol – Alla Taǵala.

Qıyndyqta janymnan tabylyp, demeý kórsetken qurbym bolǵan emes. Sátsizdikpen, aýrý-qaıǵymen, ashý-nalamen de Jaratqanǵa jalbaryna otyryp kúrestim. Osy kitaptyń jazylý barysynda sýısıd jaıly oı da keldi. Muny da bir synaq dep bildim. О́z-ózimdi áreń jeńdim. Mundaı jaǵdaı ómirimde birinshi ret boldy. Qansha qıyndyq kórsem de moıymaǵan men «tómenge quldyraı salsam» degen oımen alystym. «Uldana, esińdi jı!» dep óz-ózime aıta berdim. Oıymdy aýzymdaǵy sózim jeńdi. Men jalpy sózdiń kúsh-qudyretin moıyndaǵan janmyn. Sondyqtan da qandaı jaǵdaıǵa qaramastan «bári jaqsy bolady», «qaıyrlysy bolady» dep ishteı kúbirlep aıtyp otyrýdy ádetke aınaldyrǵanmyn.

Alla Taǵala ekeýmizdiń aramyzda názik bir baılanys bar. Kishkentaı kezimnen bastap jatyp alyp Jaratqannan jaqyndaryma amandyq, baılyq, jaqsylyq tileıtinmin. Tipti alystaǵy men kórmegen bireýdiń jaqynyn da duǵama qosatynmyn.

Kúlip otyryp jylap, jylap otyryp kúle salatyn ádetim bar. Tipti kitaptyń muqabasynda jylap otyrmyn. Nege? О́z fotosessııama keshiktim. Josparymnyń kúl-talqany shyqty. Vızajıstim ketip qaldy. Sondyqtan eriksiz jyladym. Muqabadaǵy foto qandaı shynaıy bolsa, kitap ta sondaı».

Ol – motıvator da emes

Kishkentaı kezinde tutyǵyp sóıleıtin qyz qazir meniń aldymda kósilip, sheshen sóılep otyr. Onyń bul aýrýdan aıyǵýyna sebepker bolǵan ádebıetten sabaq bergen ustazy Baǵdat Syrymqyzy eken. Mánerlep oqý baıqaýynda jeńiske jetýiń kerek degen ustazy osylaısha Uldananyń taǵdyryn ózgertken. О́mirinde birde-bir semınar, trenıngke bas suǵyp kórmegen mıllıoner qyz bul kitaby arqyly ótirik bet-perdemizdi sheship, shynaıy bet-júzimizdi kórsetýimizge shaqyryp otyr. #Shyndyqtan qashyp qutyla almaısyń degen jazý úshin 15 táýlikke qamalǵan jastardy kóre otyryp, betimiz búlk etpegen biz kitapty oqı otyryp ózimizdi tanı alamyz ba, úlken suraq. Qalaı degenmen, jastardyń áldenege umtylýy, áldeneni ańsaýy ózgeristerdiń bastalǵanyn bildirse kerek. Qoqystan tabylǵan mıllıoner qyzdyń shynyaıaqtaǵy kofesi taýsyldy. Meniń kofesiz otyrǵanym qaı zaman...

(Jalǵasy bar)

Suhbattasqan Jazıra Baıdaly