Jańa japon ımperatory týraly: jataqhanada turǵan jáne súıiktisi eki ret betin qaıtarǵan

Japon ımperatory – batys saıasatynda aty kóp atala bermeıtin fıgýra bolǵanymen, onyń sózi atalǵan memlekette aıtarlyqtaı baǵalanady jáne onymen sanasady. Ol jańalyqtar men shýly oqıǵalarda kóp atalmaıdy. Konstıtýsııalyq shekteýlerge qaramastan, onyń salmaǵy barshylyq bul elde.

30-sáýir kúni ımperator taǵynan Heıseı óz erkimen túsip, jolyn muragerlik saltymen uly Narýhıtoǵa berdi. Jańa ımperator týraly qandaı derekter bar? Birge saraptap kórelik.

Narýhıto 1960 jyly 23-aqpanda Tokıo qalasynda dúnıege kelgen. Akıhıtonyń úlken uly bala kezinen bastap taq murageri retinde daıyndyqtan ótti.

Alǵashqy erekshelik

Ol – birneshe ǵasyrdan beri jalǵasyp kele jatqan dástúrdi buzǵan ımperator. Ǵasyrlar boıy Japonııa ımperatorlary ózderine jar etip Qytaı ımperııasynan qalyńdyq alyp kelgen. Biraq Narýhıto bul sanatqa jatpaıdy.

Narýhıtonyń anasy – ómir boıy katolıktik senimde kele jatqan qarapaıym japon áıeli. Qazirgi ýaqyttyń ózinde shyǵystyń aıtýly baspasózderinde jańa ımperatordyń tegi jóninde túrli áńgime tarap jatyr. Qytaı hanshaıymnan týmaǵan ımperator bul elde teksiz sanalady eken-mys.

Jańa ımperator – "órmekshi adam"

Narýhıto bala kezinen taýǵa órmeleýmen, vıolonchelde oınaýmen jáne beısbolmen áýestengen. Ol «Iomýrı Alyptary» klýbyna jankúıerlik etedi.

Mektep jasynda jańa ımperator fılosofııany tereńdete oqyp, keıinnen osy baǵyt boıynsha joǵary bilim alady. Onyń dıplomdyq jumysy arheologııalyq qazba jumystary barysynda ózi tapqan eski tarıhtyń izderine baǵyttalǵan. Tarıhty jandandyrý men damytý – Narýhıtonyń ǵylymı taqyryby.

Oksfordtyń oǵlany

Oqýyn tereńdete túsý úshin bolashaq ımperator Ulybrıtanııaǵa keledi. Oksfordtyń kolledjinde eki jyl oqyǵan Narýhıto "Temza jáne men. Oksfordtaǵy jyldardan estelik" atty kitap jazyp shyǵady. Atalmysh týyndysynda ol Brıtanııadaǵy jyldaryn, ómiriniń baqytty sátterin sýretteıdi. Bilim alý barysynda ol eshqashan tegimen kókirek qaqpady, tipti, qyzmetshiler de ustamady. Basqa stýdentter sekildi Narýhıto da birneshe jigitpen birge jataqhananyń bólmesinde turǵan.

Bolashaq ımperatordyń júregin jaýlaǵan kim?

80-jyldardyń ortasynda Narýhıto Tokıoǵa qaıta oraldy. Kele sala ımperatorlyq áýlettiń túrli sharalaryna belsendi túrde qatysa bastaıdy. Osyndaı sharalar kezinde ol Oksford pen Garvardtyń túlegi, dıplomatııalyq qyzmetpen júrgen Masako Ovadany kezdestirip, oǵan ǵashyq bolady. Ekeýi sol ýaqyttan beri bir sátke de ajyramaı, qol ustasyp birge kele jatyr. Degenmen, Ovada jaýapkershilikten qorqyp, Narýhıtonyń usynysynan eki ret bas tartqan. Sóıtken Masako kúni erteńnen bastap Japonııanyń ımperatrısasy atanbaq. Mine, joly boldy degen – osy.

Jańa ımperatordyń murageri kim?

2001 jyly juptardyń arasynda Aıko atty qyz bala dúnıege keledi. Biraq japon zańy áıel adamǵa taqqa otyrýǵa ruqsat bermegendikten, Narýhıtoǵa báribir taq murageri kerek edi. Qazirge deıin bolashaq ımperatordyń balasy jalǵyz. Narýhıtonyń inisi Fýmıhıtonyń uly Hısakıto búginde taq murageri retinde sanalýda. Ul balanyń jasy qazir 13-te.

Sý resýrsynyń "sultany"

2000 jyldardan bastap, Narýhıto eldegi sý resýrsynyń paıdalaný úrdisine qatty shúılikti. Ol atalmysh máselege baılanysty álemdik uıymdardyń músheliginde bolyp, tipti, úshinshi Halyqaralyq sý forýmynyń prezıdenti atandy.

2009 jyly narýhıto Vetnamǵa issaparmen keldi. Imperator áýletinen bul eldi kommýnıstik kúshter basyp alǵannan keıin kelgen alǵashqy ókil retinde tarıhta qaldy. 2012 jyly oǵan ımperator qyzmetin atqarý baqyty buıyrdy. Bul ýaqytta onyń ákesi otadan keıingi qalpyna kelý em-sharalaryn qabyldap jatqan. Degenmen, ımperatorlyq qyzmetindegi eki aptalyq jumysynda Narýhıto eshqandaı mańyzdy sheshim qabyldaǵan joq.

Jańa ımperator óziniń tarıhı qyzmetine 1-mamyrdan bastap, ıaǵnı, búginnen bastap kirisedi.