"Adamnyń haıýannan aıyrmashylyǵy – aqylynda"

***

- Tynysh. Kamera  tur!

- Qaıda?

- Áne, kórmeı tursyń ba? Boldy endi, túk kórmegendeı jaltaqtama! Qoı deımin! Aýyldan keldi eken dep qalady. Shaınańdamaı, ár jerińdi bir shuqymaı, taltańdamaı jóndep júr!

 ***

-Jyldamdyqty azaıt!

- Nege?

- Kamera tur degen belgili kórmeı tursyń ba?

- Aaaa...

 ***

- Jumystasyń ba?

- Iá.

- O, jaqsy boldy. Men jumystan shyqtym. Saǵan baryp áleýmettik jelidegi  poshtalarymdy tazartyp alaıynshy, hattarǵa tolyy-y-yp ketipti.

- Ol endi múmkin emes...

- Nege?

- Kabınetime kamera ornatyp tastady. Sen emes, ózim de kire almaı otyrmyn áleýmettik jelilerge...

 ***

Zamanaýı qurylǵylarmen jabdyqtalǵan qandaı ǵımaratqa kirseń boldy, sol ǵımarattyń ishinde: buryshtarynda, bizge málim emes tasa jerlerde, tóbelerge ilingen kishkentaı jarty shar tárizdi nemese qalpaq kıgen jalǵyzkózdi dáýdeı «qara kózdi» kóresiń. Kóresiń de, seniń árbir áreketińdi «bireýdiń» baqylap turǵandyǵyn sezesiń.

Iá, móldiregen «qara kóz» kamera bizdiń ár is-áreketimizdi baqylap, oǵash qylyq jasamaı, dál sol ózi ornalasqan ǵımaratqa saı tártipke baǵynyp turǵan-turmaǵanymyzdy ǵana qadaǵalap, bastyǵyna jadysyna jazyp alǵan aqparatpen esep beredi. Onyń da ózindik paıdasy bar. Degenmen...

Al, sol bizdi baqylap turǵan «kózdi» baqylap turǵan «Qudyretti» she? Ony sezemiz be? Ol «Qudyret» bizdi tolyqtaı, shashymyzdan tyrnaǵymyzǵa deıin, oıanǵannan uıyqtaǵanǵa, uıyqtaǵannan oıanǵanǵa deıin, iship-jegenimizdi, júrgenimizdi, sóılegenimizdi, t.b. bárin-bárin óz nazarynda ustap tur emes pe?! Eger, «Ol» bizdi az ýaqytqa nazarynan tys qaldyryp, birneshe mınýt aýa berýdi umytyp ketse, bul jalǵanmen qoshtasa berýge bolady. Dál sol Qudyretten qoryqpaı «О́mir» degen ǵımaratta tyıym salynǵan qanshama dúnıelerdi istep, tártibine baǵynbaı júrsek te, sol Qudyret bizdeı opasyz, qadirsizderge óz meıirimin, qamqorlyǵyn sezdirýde. Sonshalyqty múmkindikti, túzelýge dep berilgen ýaqytty durys paıdalanbaı, taırańdap júrgen bul júrisimiz  sondaı qorqynyshty...

Qara kózdi kamera ornalasqan ǵımaratty tastap shyqqanda, erkinsip, bizdi úzdiksiz baqylap turǵan Jaratýshynyń kúshin sezinbeı, qumyrsqanyń ıleýin baqylaǵanymyzdaı bizdi de baqylap turǵan Ieniń qaharynan seskenbeı, meıirimine tánti bolmaı, áıteýir ótken bir kúnimizge rıza bolyp, búgingimen ǵana ómir súrip júrgendeımiz... "Adamnyń haıýannan aıyrmashylyǵy – aqylynda" degen emes pe?! Endeshe, nege sol «syıdy» tıimdi paıdalanyp, ómir-ǵımarattyń da talap-tilekteri men qoıǵan sharttaryn oryndap, tyıymdarynan tyıylyp, kórsetken jolymen júrmeske? Áste, ol qolymyzdan keletin is emes pe? «Qurylǵynyń kózinen» emes «Qudyrettiń ózinen» qoryqqanymyz abzalyraq bolar...