• USD 468.56

  • EUR 497.56

  • RUB 7.3

  • CNY 67.18

29 Naýryz, 15:38:06
Almaty
+35°

27 Naýryz, 2019 Dástúr

Glýbokoe kentinde Naýryz meıramy aıryqsha atalyp ótti

Elbasynyń «Uly dalanyń jeti qyry» maqalasymen baılanystyryp, sımvolıkalyq máni bar shara uıymdastyrdy.

Shyǵys Qazaqstan oblysyndaǵy Glýbokoe aýdanynyń jurtshylyǵy Ulystyń uly meıramyn erekshe atap ótti. Kóktem kelip, kúnniń jylyp, adamdardyń jadyrańqy kóńil kúıine dóp keletin naýryz qazirgi ýaqytta bar jurtshylyqtyń asyǵa kúter merekesine aınaldy.

Aýdan ortalyǵynda ǵana emes, naýryz sharasy  Glýbokoe aýdanynyń aýyldyq okrýgterinde de erekshe ótti.  Ejelden jańartý men jasampazdyqtyń bastaýy, yrys pen berekeniń arqaýy bolǵan áz - Naýryz kópshilikke  sóıtip, merekelik kóńil kúı syılady.

Glýbokoe kentinde Naýryz meıramyna arnalǵan "Kóktem arýy" atty saıys ta ótti. Jeńimpazdar marapattaldy, júldeler taratylyp berildi. Halyq shat-shadyman kúıge bólendi.

Glýbokoe kenti naýryz

Eń bir aıryqsha atap óterligi, Glýbokoe aýdanynyń ákimshiligi naýryz meıramyndaǵy merekelik sharalardy Tuńǵysh Prezıdentimiz, Elbasynyń «Uly dalanyń jeti qyry» maqalasymen baılanystyryp, sımvolıkalyq máni bar shara uıymdastyrdy.

Osyǵan baılanysty aýdan ortalyǵyna arnaıy  7 kıiz úı tigildi. Olarǵa «Atqa miný mádenıeti», «Uly daladaǵy ejelgi metallýrgııa», «Ań stıli», «Altyn adam», «Túrki áleminiń besigi», «Uly Jibek joly», «Qazaqstan – alma men qyzǵaldaqtyń otany» degen ataý berildi. 7 atqa mingen jigit sherýdi bastap, ortaǵa shyqty. Otyzdan astam etnos ókilderi mekendeıtin aýdan turǵyndary 7 kıiz úıdi aralap, qazaq halqynyń salt-dástúrlerimen tanysty. Ártúrli ulttyq taǵamdardan dám tatty. Án saldy, bı bıledi. Altybaqan tepti. Ártúrli sporttyq sharalar ótti. Qysqasy, ejelden kele jatqan naýryz meıramy aýdan turǵyndaryna mereke syılady.

–Naýryz 5 myń jyldyq tarıhy bar jer júzindegi eń kóne meıramdardyń biri. Shyǵys halyqtary Naýryz merekesin qalaı qarsy alsań, jyl solaı ótedi dep yrymdaıdy. Kóktem merekesi ár shańyraqqa shattyq, yrys-yntymaq ákelsin. Bıylǵy jyl Naýryz dastarhanyndaı yrysty, berekeli jyl bolsyn», - dep aq tilegin aıtty  aýdan ákimi Qalıqan Baıǵonysov.

Sondaı-aq,  7 kıiz úıde «Qorjyn ashý», «Besikke bóleý», «Quıryq baýyr asatý», «Betashar», «Qazan jarys», «Tilashar», «Qudalyq» sekildi qazaqtyń ádet-ǵuryptary kelýshiler nazaryna usynyldy.

Sonymen, dostyq pen tatýlyqtyń, yrys-bereke, birliktiń meıramy naýryz shyǵys óńirdegi Glýbokoe aýdanynda osylaı saltanatty jaǵdaıda aıryqsha atalyp ótti.

Erkin Qaldan

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir