As bólmesine qatysty 30 keńes

1.Jumyrtqanyń sapasyn qalaı anyqtaýǵa bolady? Ol úshin bir ydysqa sý quıyp jumyrtqany salyńyz. Buzylmaǵan jumyrtqa sýǵa batyp ketedi, eger buzylyp ketken bolsa sý betine qalqyp shyǵady.

2.Jemis-jıdekti buzbaı saqtaý amaly. Tońazytqyshtaǵy jáshiktiń astyna qaǵaz oramal tóseńiz. Ol artyq ylǵaldy ózine tartyp alady. Sóıtip, kókónister men jemistiń uzaq saqtalýyna, ári kógerip ketpeýine kómektesedi.

3.Ashylǵan sharaptyń saqtalý merzimin uzartý joly. Jartylaı ishilgen sharap nemese shampannyń bótelkesin laqtyryp tastamańyz. Shólmektiń ishine 2-3 túıir meıiz salyp, eki saǵatqa jaýyp qoıyńyz. Meıizdiń quramyndaǵy tabıǵı qant shampan, sharaptyń bastapqy qalpyna kelýine kómektesedi.

4.Lımon keýip qalmasyn deseńiz... 2-3 tamshy lımon shyryny qajet bolsa tutas lımondy ekige bólýdiń qajeti joq. Odan da lımondy tesip, qalaǵanyńyzsha shyrynyn syǵyp alyńyz. Mundaı ádis jemistiń uzaq saqtalýyna ári keýip ketpeýine kómektesedi.

5.Kók-sókti uzaq saqtaý tásili. Eger kók-sókti bir aı boıy saqtaǵyńyz kelse bir býmasyn jýyp, plastık dorbalarda muzdatqyshqa salyp qoıyńyz. Paıdalanar aldynda muzdatqyshtan shyǵarǵan kúıde týrap alyp, tamaqqa qosýyńyzǵa bolady. Birer mınýttan keıin askók erip, tamaqqa dámi sińedi.

6.Úıdegi azyq qoryn saqtaý. Un, jarma, makaron ónimderin saqtaıtyn ydystyń ishine lavr japyraǵynyń birneshe talyn salyp qoısańyz shybyn-shirkeı, qurt-qumyrsqa jolamaıdy.

7.Sańyraýqulaqty shyryshtan qorǵaý. Sańyraýqulaqty tońazytqyshqa qaǵaz oramalǵa orap salyńyz.

8. Irimshikti qalaı qurǵatpaı saqtaýǵa bolady? Irimshik tilimi qurǵap ketpesin deseńiz týralǵan tusyna maı jaǵyp qoıǵan jón.

9. Kókónisterdi qalpyna keltiremiz. Eger shalǵam nemese sábiz bosańsı bastasa muzdaı sýǵa salyp, shıki kartop bólshekterin qosyńyz. Sonda kókónister áp-sátte bastapqy qalpyna qaıta keledi.

10. Pisirilgen toqashtardy saqtaý. Qytyrlaq jáne jumsaq pecheneni birge saqtaýǵa bolmaıdy. Jumsaq pecheneniń quramyndaǵy ylǵal qytyrlaq pechenege sińip ketedi. Sóıtip, óz qundylyǵyn joǵaltyp alady.

11.Banandy saqtaý. Pisken banandy sabaǵynan úzbeı saqtaǵan jón. Sonda uzaq turady.

12. Tuzdy durys saqtaý. Tuz salǵyshtyń túbine azdap kúrish salyp qoısańyz untaq jabysyp, qatyp qalmaıdy. Kúrish artyq ylǵaldy boıyna sińirip alady.

13.Sarymaıdy tońazytý. Sary maıdy muzdatqyshta jarty jylǵa deıin saqtaýǵa bolady. Maıdy birneshe bólikke bólip, germetıkalyq paketterge orap salyńyz. Sonda ol janynda turǵan basqa taǵamdardyń ıisin boıyna tartpaı, jaqsy saqtalady.

14. Qyshqyl sút ónimderin qalaı saqtaý kerek? Irimshik nemese qaımaq salynǵan ydysty tóńkerip qoıý kerek. Tóńkerilgen ydysta turǵan suıyq zattyń áserinen vakýým paıda bolyp, taǵamdy buzatyn bakterııalardan qorǵaıdy.

15. Qantqa aınalǵan bal. Qoıýlanyp qalǵan baldy tastaı salmańyz. Baldy 30 sekýnd boıy mıkrotolqyndy peshte ortasha qýatta qyzdyrý kerek. Sonda bal óz qalpyna keledi.

16. Irimshikti tońazytý. Maılylyǵy joǵary jumsaq irimshikti tońazytýǵa bolady. Qalǵan irimshikti aýa ótkizbeıtin germetıkalyq dorbaǵa nemese konteınerge salyp muzdatý qajet. Muzdatylǵan irimshikti dastarqanǵa qoımasan bir kún buryn tońazytqyshta ustaǵan jón.

17. Tuzy ótkin sorpanyń dámin qalaı keltirýge bolady? Taǵamnyń tuzy ashy bolyp ketse oǵan shıki kartop nemese alma qosýǵa bolady. Ol artyq tuzdy boıyna sińirip alady. Ol úshin sorpaǵa kartop ne bolmasa almany salyp 10 mınýt qaınaǵannan keıin súzip alasyz. Tamaǵyńyz áli de ashy bolsa bir qasyq qant qosyńyz. Eger ol da kómektespese bir qasyq alma sirke sýyn qosqan jón.

18. Taǵam maıly bolsa… Eger ýaqytyńyz bolsa sorpany jarty saǵatqa tońazytqyshqa qoıyńyz. Betinde tońazyǵan maıdy qalqyp alyp tastaýǵa bolady. Al eger ýaqytyńyz az bolsa sorpaǵa birneshe túıir muz salyp, maımen birge qalqyp alyńyz.

19. Sút kúıip ketse. Ol úshin túbi kúıgen ystyq sútke azdap tuz salyp jiberseńiz kúıiktiń ıisi men dámin alady.

20. Qatty etti jumsartaıyq. Etti pisirmes buryn marınadtap alǵan durys. Ol úshin syra, sirke sýy, ananas shyryny nemese qyzanaq paıdalanǵanyńyz jón. Bulardyń boıynda etti jumsartatyn qyshqyldar men fermentter bar.

21. Shyryn alý. Sıtrýs ónimderin syqpas buryn ústeldiń ústine qoıyp, ary-beri ysqylap alǵan jón. Sonda shyryny kóp shyǵady.

22. Jemis-jıdek tez pissin deseńiz... Eger siz pispegen jemis-jıdek satyp alsańyz ony qaǵaz paketke salyp arasyna 1 alma qosyńyz. Alma ósimdiktiń tez pisýine kómektesetin etılen gazyn bóledi.

23.Taǵam saqtaıtyn konteınerge sińip qalǵan ıisti ketireıik. Tamaq saqtaıtyn ydystardy qansha jýsańyz da jaǵymsyz ıistiń saqtalyp qalatyny ras. Olardyń ishine aq-qara tústi gazetti ýqalap salsańyz ıisti tartyp alady. Paıdalanar aldynda taǵy bir ret jýyp jiberesiz.

24.Taýyqty músheleý. Eń aldymen aıaqtaryn kesip alǵan jón. Odan keıin jambasyn súıekten ajyratyp, qanattaryn kesesiz. Sodan soń tósin tómen qaratyp omyrtqasynan ajyratasyz. Odan ári jumsaq etterin bólshektep týraýǵa bolady.

25. Peshke arnalǵan taba men qaǵazdy qaıda saqtaǵan jón? Bul maqsatqa faıl salýǵa arnalǵan qalypty paıdalanýǵa bolady. Mundaı qalypqa juqaltyr, as oraıtyn úldir, taǵam pisirýge arnalǵan qaǵaz ben taba, plastık formalardy salyp qoıýǵa bolady.

26. Qalǵan kofeni qaıda jiberemiz? Qaınatylǵan kofe ishilmeı qalsa, ony tógip tastamańyz. Ony muz jasaıtyn qalypqa quıyp qatyryp qoısańyz, sýyq kofe daıyndaǵan kezde paıdalana alasyz. Qatyrylǵan kofeniń quramy ózgermeıdi.

27. Qatqan nandy tastaı salýǵa bolmaıdy. Ony kishkentaı bólikterge týrap, qýyryp, sorpaǵa salyp ishýge bolady nemese salatqa qosýǵa bolady.

28. Tot baspaıtyn temirdi qalaı tazalaǵan jón? Ol úshin spırt nemese araq paıdalanýǵa bolady. Maqtany nemese taza shúberekti spırtke batyryp, daq turyp qalǵan oryndardy súrtesiz.

29. Kúıgen qazandy tazartý. Qazannyń túbine kóp mólsherde as sodasyn seýip 4-5 qasyq tuz qosyńyz. Ústine sý quıyp bir túnge qaldyryńyz. Sonda kúıip, jabysyp qalǵan tamaq qaldyqtary tez tazarady.

30. Pisken makaron jelinbeı qalsa, tastamańyz. Aýa ótkizbeıtin plastık paketterge nemese qaqpaǵy bar konteınerge salyp tońazytqyshqa qoısańyz uzaq ýaqyt saqtalady. Dastarhanǵa qoıar aldynda birneshe sekýndqa ystyq sýǵa salyp alsańyz bastapqy qalpyna qaıta keledi.

Derekkóz: syrlasu.kz saıty

Usynǵan: Maqpal Sembaı