Nagata esebin sheshken matematık Túrkistanda óz mektebin ashady

Áıgili Nagata esebin sheshken  belgili matematık Ýalbaı О́mirbaev Túrkistan qalasynda óz mektebin ashady dep habarlaıdy Qamshy.kz aqparat agenttigi. Bul týraly Túrkistan oblysynyń ákimi О́mirzaq Shókeevpen kezdesýde málim boldy. Basqosýda óńir basshysy QR Memlekettik jáne Amerıka matematıka qoǵamynyń joǵary dárejeli «Mýr» syılyqtarynyń ıegeri Ýalbaı Útmahanbetulyna otandyq ǵalym retinde álemdik ǵylymǵa qosqan úlesi úshin alǵys bildirdi.

«Ekonomıka, óndiris salalary matematıka ǵylymymen tyǵyz baılanysta damıdy. Ǵalymdardyń ǵylymı jańalyqtarynyń arqasynda ónim artady. Nagata, Kon syndy áıgili matematıkterdiń esebin sheshken ózińizdeı álemge tanymal ǵalymdardyń elden shyǵyp, álemge kúlli Qazaqstandy tanytyp jatqandyǵy bizdi qýantady. Endi týǵan jerge tý tigip, Túrkistan oblysynda, onyń ishinde Túrkistan qalasynda óz mektebińizdi qalyptastyryp, aýyldan shyqqan talantty balalarymyzdy qoldaýymyz qajet», - dedi О́mirzaq Estaıuly.

О́z kezeginde sóz alǵan Ýalbaı Útmahanbetuly usynysqa qoldaý bildirip, aldaǵy ýaqytta óńir oqýshylaryna udaıy ınteraktıvti júıemen matematıka sabaǵyn júrgizetinin aıtty. Sondaı-aq, ǵalym Túrkistan qalasynan arnaıy joǵary matematıkalyq mektep ashýǵa nıetti ekendigin jetkizdi.  

Ýalbaı О́mirbaev – QR UǴA korrespondent múshesi, fızıka-matematıka ǵylymdarynyń doktory, professor. 1977-1982 jyldary Novosibir memlekettik ýnıversıtetiniń aspırantýrasynda bilim alǵan. Álemdegi ozyq joǵary oqý oryndarynda dáris oqyp keledi. 1972 jyldan beri sheshimin tappaı kele jatqan japon ǵalymy M.Nagatanyń esebin 2001 jyly, aǵylshyn matematıgi P.Konnyń esebin 2004 jyly sheshti. Búginde AQSh-ta Detroıt shtatynyń Ýeın ýnıvesıtetinde dáris beredi.

Usynǵan: Jazıra Baıdaly