Qansha baılyq berseń de, saýabymmen bólise almaımyn

Bir baı adam meshitke kirip, namaz oqypty. Namazdan soń duǵa etip jatyp, qasynda otyrǵan bir dárýishtiń duǵasyn qulaǵy shalady. Dárýish bylaı dep duǵa qylýda edi:

- AllaHym! Qarnym óte ash. Maǵan mynadaı taǵam, mynadaı táttiler jetkizip bershi!

Baı adam ishinen "Bul dárýish meni estisin dep ádeıi daýysyn shyǵaryp duǵa jasady. Sony ózime kelip aıtsa da bolar edi ǵoı. Osy istegeni úshin oǵan eshnárse bermeımin" dep oılapty. (Nápsi degen mine osyndaı, ár jerge murnyn suǵa qoıady).

Dárýish duǵasyn aıaqtap, ornynan turady da, sosyn meshittiń esik jaǵyna otyryp, jantaıady. Birazdan soń meshitke bir adam qolynda sebetimen birge kirip keledi. Ol tup-týra dárýishtiń janyna baryp, sebetti onyń aldyna qoıa salady. Dárýish sebettiń ústin ashyp qarasa, duǵasynda suraǵan taǵam men táttiler turǵan eken. Bul kórinisti kóz almaı qaraǵan baı, otyrǵan jerinde ań-tań bolady.

Dárýish taǵamnan, táttilerden ózi toıǵansha jep, qalǵanyn sebetti ákelgen adamǵa qaıtaryp beripti. Álgi adam úndemeı sebetti kóterip, meshitten shyǵyp ketedi. 

Baı ornynan atyp turyp, sebet kótergen adamnyń artynan júgiredi. Jetken boıda ony toqtatyp, suraıdy:
- Siz kimsiz?
- Bir paqyrmyn.
- Bul nárselerdi kim jiberdi?
- Eshkim. О́zim alyp keldim. 
- Siz álgi dárýishti tanısyzba?
- Joq, tanymaımyn.
- О́zińiz tanymaıtyn, bilmeıtin adamǵa nege sonsha azyq kóterip keldińiz?

Paqyr kisi kúlip qoıyp, bylaı deıdi:
- Men bir qarapaıym jaldanbaly jumysshymyn. Adamdardyń júgin tasyp kún kóremin. Búgin bir baıdyń júgin tasyp bergen edim, ol maǵan kóbirek aqsha berip jiberdi. Qýanyp, bazarǵa bardym, basqa ýaqyttarda balalaryma áperip, jegize almaǵan taǵamdardy alyp, úıime bardym. Qatty sharshaǵan ekenmin, áıelim tamaq ázirleımin degenshe uıyqtap qalyppyn. Túsimde Paıǵambarymyzdy (s.a.ý) kórdim. Ol (s.a.ý) maǵan bylaı dedi:
- Myna meshitte bir ýálı adam otyr. Ol qazir ǵana seniń úıińdegideı taǵamdardy surap, Allaǵa duǵa qyldy. Sen oǵan taǵamdaryńnan, táttilerińnen alyp baryp, jegizgin. Ol ózi qalaǵansha toıyp jesin. Qalǵanyn alyp ketip, bala-shaǵańmen birge jeseń, seniń otbasyńa bereket bolady. Osylaı jasasań, jánnatqa kirýińe ózim kepil bolamyn!"

...Men oıandym da, taǵamdarymdy alyp, meshitke júgirdim. Bary osy. Qalǵanyn ózińiz kórdińiz. 

Baı odan "Osy bazarlyǵyńa qansha qarajat ketti?" dep surady. Paqyr qansha qarajat jumsaǵanyn aıtty. 
- Osy qarajatyńnyń on esesin beremin. Qarymy úshin saýabyńnyń bir bóligin maǵan ber! - depti baı. 
- Bolmaıdy, - deıdi paqyr.
- Jıyrma esesin beremin.
- Bolmaıdy.
- Elý ese!
- Joq.
- Júz!!!

Basyn shaıqaǵan paqyr baıǵa qarap, bylaı degen eken:
- Bekerge áýrelenbeńiz. Qansha berseńiz de, saýabymdy sizben bólise almaımyn. О́ıtkeni Paıǵambarymyz (Oǵan Allanyń ıgiligi men sálemi bolsyn!) maǵan osy bir isim úshin jánnatty ýáde etti. Siz maǵan búkil baılyǵyńyzdy berseńiz de, men sizge bul nyǵmetti bermeımin!...

Usynǵan: Maqpal Sembaı