Medısınalyq saqtandyrý júıesi ne úshin engiziledi, qanshalyqty tıimdi?

Qazirgi ýaqytta, kópshilikke belgili, elimizdiń densaýlyq saqtaý salasynda mindetti áleýmettik medısınalyq saqtandyrý júıesi kezeń-kezeńmen engizilýde. Mindetti medısınalyq saqtandyrý paketi halyq úshin 2020 jyldan bastap qoljetimdi bolady. Áleýmettik medısınalyq saqtandyrý qorynyń osy baǵytta alǵa qoıǵan mindetteriniń biri – emdeý mekemelerindegi medısınalyq qyzmettiń qoljetimdiligin, turǵyndarǵa ýaqytyly sapaly medısınalyq qyzmet kórsetilýin qamtamasyz etý bolsa, ekinshisi – halyqty aqparattandyrý.

Mindetti áleýmettik medısınalyq saqtandyrý qorynyń Astana qalasy boıynsha fılıaly medısınalyq saqtandyrý júıesine engiziletin ózgerister jaıynda Halyqqa qyzmet kórsetý, eńbekpen qamtý ortalyqtarynda, jumys oryndarynda,  t.b. belgilengen ýaqyt aralyǵynda túsindirý jumystaryn júrgizedi. Sonda baıqaǵanymyz, jumys berýshilerdiń, jumyskerlerdiń, bir sózben aıtqanda turǵyn halyqtyń basym bóligi «Medısınalyq saqtandyrý júıesi ne úshin engiziledi?», «Qanshalyqty tıimdi?», «Qazirgi medısınalyq qyzmet júıesinen qandaı artyqshylyǵy bar?», «Qandaı ózgerister bolady?» degen saýaldardy jıi qoıady. Sondyqtan, osy jáne basqa da saýaldarǵa Qamshy.kz aqparat agenttigi "Áleýmettik medısınalyq saqtandyrý qory" KEAQ Astana qalasy boıynsha fılıalynyń baspasóz qyzmetiniń usynǵan aqparatyna súıene otyryp, nazar aýdartýdy jón kórdi.

 

Medısınalyq saqtandyrý júıesi ne úshin engiziledi, qanshalyqty tıimdi?

 «Jańa tıimdi densaýlyq saqtaý júıesin qalyptastyrý qajettiligi,  kórsetiletin medısınalyq kómektiń tıimdiliginiń tómen ekendigi burynnan aıtylyp keldi. Saqtandyrý medısınasy azamattyń tapqan tabysyna, ol úshin aýdarylǵan  jarna kólemine qaramastan medısınalyq kómektiń barlyq túrlerin alýyna múmkindik beredi. Onyń ishinde josparly stasıonarlyq kómek te, dári-dármekpen qamtý da, joǵary mamandandyrylǵan medısınalyq qyzmet túrleri men ońaltý da, dıagnostıkalyq-konsýltasııalyq kómek te, medbıke kútimi men pallıatıvtik kómek te bar», - deıdi «Áleýmettik medısınalyq saqtandyrý qory» KEAQ Astana qalasy boıynsha fılıalynyń dırektory Nurlybek Qabdyqaparov.

Birinshiden, mindetti áleýmettik medısınalyq saqtandyrý arqyly Qazaqstan aýmaǵynda Siz ózińiz tańdaǵan kez kelgen emhanadan medısınalyq kómek ala alasyz. Bul jaǵdaıda, emhananyń shyǵyndaryn tolyǵymen Qor óteıdi;

Ekinshiden, tegin medısınalyq kómektiń kepildendirilgen kólemi jáne mindetti áleýmettik medısınalyq saqtandyrý  paketteri sheńberinde qarastyrylǵan medısınalyq kómekke jumsalatyn qosymsha tólemderdiń barlyq túrinen bosatylasyz;

Úshinshiden, Siz úshin medısınalyq uıymdarda kórsetilgen qyzmetterge, Áleýmettik medısınalyq saqtandyrý qoryna aýdarylǵan jarnalar týraly aı saıyn aqparat alýǵa múmkindigińiz bar;

Tórtinshiden,   sapasyz qyzmet kórsetilgen nemese mindetti áleýmettik medısınalyq saqtandyrýǵa  qatysýshy retinde quqyqtaryńyz buzylǵan jaǵdaıda Qor saqtandyrylǵan azamattardyń quqyqtary men múddelerin qorǵaıdy.

Besinshiden, MÁMS júıesin engizý kórsetiletin medısınalyq kómektiń sapasyn jaqsartýǵa múmkindik beredi.

 

Qazirgi medısınalyq qyzmet júıesinen qandaı artyqshylyǵy bar?

Mindetti áleýmettik medısınalyq saqtandyrý júıesiniń artyqshylyǵy – jarnany árkim múmkindigine qaraı tólep, qajetine qaraı medısınalyq qyzmet kórsetiletindiginde. Iаǵnı, MÁMS aıasynda qyzmet kórsetetin medısınalyq uıymnan qajettiligińizge qaraı, syrqatyńyzdy qansha ýaqyt emdeý kerek bolsa, sonsha medısınalyq kómek alýǵa quqylysyz, biraq  alatyn medısınalyq kómek kólemi dárigerdiń taǵaıyndaýyna baılanysty. MÁMS paketine kiretin qyzmetter tolyq kórsetiledi jáne qosymsha aqy tóleýdi qajet etpeıdi. 

Sapaly medısınalyq kómek kórsetý, qajetti dári-dármektermen qamtamasyz etý, sondaı-aq, elimizdegi úzdik klınıkalarda tıimdi emdelý jáne qymbat baǵaly operasııalar jasatý múmkindigi jumys isteıtin ár azamattyń densaýlyǵyn saqtaýǵa, eńbekke jaramsyzdyq qaǵazdarynyń merzimin qysqartýǵa jáne jumys berýshilerdiń shyǵyndaryn azaıtýǵa yqpal etedi.

 

Qandaı ózgerister bolady?

«Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» 2018 jylǵy 28 jeltoqsandaǵy № 208-VI Qazaqstan Respýblıkasynyń Zańy negizinde «Mindetti áleýmettik medısınalyq saqtandyrý týraly» Qazaqstan Respýblıkasynyń Zańyna birqatar ózgerister engizildi.

Jarna mólsheri týraly aıtar bolsaq, elordalyq jumys berýshiler 2019 jyly óz qarajaty esebinen jumysker úshin onyń tabysynyń 1,5% mólsherinde, 2020 jyldan bastap 2% mólsherinde (+jumysker qarajaty esebinen onyń tabysynyń  1% mólsherinde) jarna aýdarady.  

Jeke kásipkerler ózi úshin 2020 jyldan bastap, tıisti qarjylyq jyldaǵy eń tómengi jalaqynyń 1,4 ese mólsherinen 5% jarna tóleıdi.

Memleket esebinen 2020 jyldan bastap halyqtyń 13 sanaty úshin jarna aýdarylady. Olar: balalar, zeınetkerler, onyń ishinde Uly Otan soǵysynyń qatysýshylary men múgedekteri, kóp balaly analar, jumys istemeıtin júkti áıelder, bala kútimine baılanysty demalystaǵy analar, múgedekter jáne múgedek balalarǵa kútim jasaıtyn adamdar, tirkelgen jumyssyzdar, jumys istemeıtin oralmandar, stýdentter, ınternat tárbıelenýshileri, tergeý ızolıatorlaryndaǵylar men túrmede jazasyn óteýshiler.

Medısınalyq saqtandyrý qoryna kelip túsken qarjy, óz kezeginde Astana qalasyndaǵy emdeý mekemeleri kórsetken medısınalyq qyzmetter aqysyn tóleýge jumsalady. Al halyqqa kórsetiletin medısınalyq qyzmet sapasy Qor baqylaýynda bolady.

 Usynǵan: Jazıra Baıdaly