Qazaqtyń kishkentaı Maıkl Djeksony – Ermek Baljigit nege kórinbeı ketti?

Bes jasynda úlken sahnaǵa shyǵyp, jeti jasynda jeke konsertin bergen, qazaqtyń kishkentaı Maıkl Djeksony atanǵan kishkentaı Ermek búginde mekteppen qosh aıtysyp, Almaty qalasyndaǵy P.Chaıkovskıı atyndaǵy mýzykalyq kolledjdiń gıtara bóliminde bilim alyp jatqan stýdent. Sońǵy kezde sahnada kóp kórinbeı ketýiniń bir sebebi – daýysynyń ótpeli kezeńnen ótip, ózgeriske ushyrap jatqandyǵy. Mundaı kezeńde daýysqa qatty kúsh túsirýge bolmaıdy. Kópshilikke kórinbeı ketken stýdent Ermek Baljigitpen áńgimelesken edik. Endeshe, marhabat...

–Sonymen, stýdent bolǵan qalaı eken?!.

–Stýdent bolýdyń ózi bir erekshe kezeń eken. Ata-ananyń moınyndaǵy jaýapkershiligin azaıtyp, óz betińshe bolashaǵyńdy baǵdarlap, jańa adamdarmen tanysyp, dostaryń kóbeıip, jańa bir ortaǵa tap bolý sııaqty jaıttardyń barlyǵy - ózińdi úlken bir azamat sezindirip, ómirge degen kózqarasyńdy ózgertpeı qoımaıdy eken.

Əzirge ózimniń qandaı stýdent ekenimdi bilmeımin, alaıda qandaı stýdent bolǵanymdy bolashaq aıtar... Degenmen, bala kúnimnen armandaǵan ónerdiń naǵyz qaınaǵan ortasyna tústim. Árkim óz qalaǵan isimen aınalysqanǵa ne jetsin! Bəlkim, meni baqytty stýdent deı berseńiz bolatyn shyǵar...

–Ákeń - Qanat Ibragımov aǵamyz da kompozıtor, óner adamy ekeni kópshilikke málim. Jalpy otbasyń qandaı? Ákeń qatal ma, anań qatal ma? Kimge jaqynsyń?

–Biz otbasymyzda úsheýmiz: Əkem – Qanat, anam – Ləılə jəne Men.

Əkem buryn men týraly bergen suhbatynyń birinde: «Men qatal əkemin. Olaı aıtqan sebebim: Ermekti kópshilik tanıtyn bolǵandyqtan, ony kórgen adamdardyń bəri kóbine oǵan rızashylyǵyn bildirip, qoshemet kórsetip jatady. Demek, eldiń erkesi bolǵan bala, úıde de erke bolsa, ony bolashaqta er azamat retinde elesteýdiń ózi qıyn ǵoı» – degen edi. Sol kisiniń qataldyǵynyń arqasynda mýzykanyń da qyr-syryn tereń meńgerdim dep aıta alam. Əkem ónerge atústi qaraı salatyn adam emes. Meni de soǵan əbden tárbıelegen. Meniń ər basqan izime muqııat qaraıdy, ıaǵnı ákem qatal adam. О́zi qatal kisige syryńdy aıtý da qıyn ǵoı. Kóbinese aıtarymdy anam arqyly jetkizem...

–Úsh jyl buryn «Bala daýysy» baıqaýyna qatysqanyńnan habardarmyz. Basqa qandaı aýyz toltyryp aıtarlyqtaı baıqaýlarǵa qatystyń?

–Alǵash bes jasymda Astanda ótken respýblıkalyq "Aıgólek" balalar baıqaýynda birinshi oryn ıegeri; "Taı jarys" respýblıkalyq ənshiler baıqaýynyń bas júldegeri;  2011 jyly (2011, 2012 jyl ma edi, anyq esimde qalmapty) KTK telearnasynda ótken respýblıkalyq "Talant-shoý" tele-jobasynyń bas júldegeri; "Juldyzdy sət" respýblıkalyq baıqaýynyń birinshi oryn ıegeri atandym.  

Keıin ózińiz aıtqan "Bala daýysy" baıqaýyna qatystym. Bul baıqaýdyń men úshin orny erekshe. Ol jerde ózime kerekti kóp dúnıelerdi úırendim. «Bala daýysy» jobasymen elimizdiń birqatar qalalaryn araladym, elimizge belgili óner juldyzdary: Álı Oqapov, Janar Dugalova, Farıda Nııazova sekildi ənshilermen juptasyp, ən shyrqadym.

Tipti keıin ózim kezinde úmitker bolyp qatysqan osy jobanyń Almaty oblysynda uıymdastyrylǵan irikteýinde ədilqazylardyń qatarynda bolyp, talantty ənshilerdi irikteýge úlesimdi qostym. Qazirgi tańda əli de "Bala daýysy" jobasymen birgemin. Meniń P.Chaıkovskıı atyndaǵy mýzykalyq kolledjge túsýime baǵyt baǵdar bergen de osy "Bala daýysy" jobasy jəne onyń dırektory - Murat Isahanov myrza bolatyn.

–Eger óner jolyn tańdamasań, basqa qaı salany tańdar ediń? Iаǵnı, ánshi bolmasań, kim bolýyń múmkin edi?

 –Bul endi men úshin óte qorqynyshty suraq. Ázilim ǵoı. Eger ənshi bolmaǵanda, múmkin sportty qýalap keter me edim... Alaıda, ənsiz ózimdi eleste de almaımyn.

–Sen úshin ómirde eń mańyzdy ne?

–Adam bolý. Adam degen atqa laıyqty ómir súrý...

–Jigitke jeti óner az degendeı, án aıtýdan basqa biz bilmeıtin qandaı óneriń bar?

–О́te durys aıtasyz. Er azamat bolǵan soń, jan-jaqty bolýy kerek dep oılaımyn. Burynǵy ótken Balýan sholaq babalarymyz, jańaǵy siz aıtqan sózdiń dəleli dep aıtar edim...

Men qazirgi kezde "GOLDEN TEAM" atty  MMA CLUB-ta erejesiz jekpe-jekke qatysyp júrmin. Maqsatym - er azamat bolǵan soń, óz namysymdy jigitshe qorǵaı alatyndaı dárejede eti tiri, naǵyz qazaqtyń batyry sekildi jigit bolý. «Qazaqtyń jigitteri batyr bolýy kerek» degen túsinik bala kezimnen qanyma sińip qalǵan. Bəlkim, sonyń da əseri shyǵar - sport dese ishken asymdy jerge qoıatyndyǵym. Aqyry, maqtanǵan ekenmin, sýǵa da əjeptəýir júzetinimdi aıta keteıin.

–О́mirlik ustanymyń qandaı? Iаǵnı, únemi jadyńda júretin súıikti maqal-mátel nemese áldebir qanatty sóziń bar ma?

–"Qanmen daryǵandy qasıettemeseń, qadiriń bolmaıdy" degendi ákem maǵan jıi aıtady...

–О́ziń qatarlas jasóspirimderdiń saǵan qandaı qylyqtary, ádetteri unamaıdy? Olarǵa aıtaryń bar ma?

–Eger jigitterge qatysty aıtar bolsam, ózimmen qatarlas jasóspirimder elimizdiń bolashaq tiregi ǵoı. Alaıda sol jigitter qazirden beti-basyn boıap, syrǵa taǵyp syzylyp júrse, olardy elimizdiń qorǵany dep, el qalaı aıtady? Keıbir sondaı jigitterge qarap qarnym ashady. Ərbir qazaǵymyzdyń azamaty jigit  degen atqa laıyqty bolsa eken dep tileımin!

–Kitappen dossyń ba?

–Iá. Qazirgi tańda Səbıt Muqanovtyń "Balýan sholaǵyn" oqyp júrmin.

–Ermek,  áńgimeńe kóp rahmet!  Eńbegiń jansyn!