Atyshýly Ilıas Kar oqıǵa ornynan ne sebepti qashyp ketkenin túsindirdi

Ilıas Kar búgingi sotta jol apatynyń qalaı bolǵanyn aıtyp berdi dep habarlaıdy Qamshy.kz aqparat agenttigi. 

— "Grand operadan" áıelimmen urysyp shyqqan edim. Keıin Naýryzbaı batyr kóshesimen joǵary kóterilip, Abaı kóshesine jetip ońǵa buryldym. Sol kezde baǵdarshamda jasyl tús janyp turǵan bolatyn. "О́tip úlgerem" dep oıladym da, jyldamdyqty kóbeıttim. Keıin qyzyl tús janǵan kezde toqtap úlgere almaıtynymdy bildim. "Sosyn avtobýsty aınalyp ótip úlgeremin" dep oılaǵan edim. Biraq onyń arǵy jaǵyndaǵy Mıtsýbısı kóligin kórmedim. Sodan keıin qatty jyldamdyqpen kelip jeńil kólikke soǵystym. Dál orta tusynan soǵyppyn, kólik aınalyp ketti. Dereý kóligimnen túsip jańaǵy kólikke qaraı bardym. Rýlde bir er adam qasynda bir áıel men artqy oryndyqta eki áıel otyr eken. Bári de es -tússiz boldy, deıdi kúdikti.

Sondaı-aq Ilıas Kar oqıǵa ornynda bolǵanyn aıtty. 

— Sálden soń adamdar jınalyp qaldy. Jan-jaqtan kelip jeńil kóliktegi adamdardy shyǵaryp, jedel járdem shaqyryp jatty. Keıin birnesheýi meniń kóligime qaraı baryp "júrgizýshi qaıda?" dep túrli bylapyt sózder aıtty. Olar "Gelendvagen" kóliginiń júrgizýshisi men ekenimdi bilmedi. "Kóshedegi kómektesip jatqan adam" dep oılady.  Men de "Gelendvagenniń" júrgizýshisi ekenimdi aıtpadym. Sodan Abaı kóshesinen ótip, Seıfýllın kóshesiniń boıymen tómen qaraı júrdim de, úılerdiń arasynda biraz ýaqyt otyrdym. Biraz ýaqyt ótken soń, Masanchı kóshesinen taksı ustap ózime syrt kıim men aıaq kıim alýǵa baraxolkaǵa bardym. Syrt kıimim kólikte qalǵan bolatyn. Al aıaǵymda jazdyq aıaq kıim boldy.
Baraxolkada júrip bir tanysyma habarlastym, - deıdi Ilıas Kar.  

Sonymen qatar aıyptalýshynyń 16 jyldyq júrgizýshilik tájirıbesi bar eken. Osy ýaqytqa deıin birde bir ret jol apatyna ushyramaǵan. 

Sondaı-aq Ilıas Kar prokýrordyń suraqtaryna jaýap berý barysynda 6 jyldan beri ishpeıtinin aıtty. 

— Men ishimdik iship kólik júrgizdi degen aıypty moıyndamaımyn. Men 6 jyldan beri ishimdik ishpeımin", deıdi Ilıas Kar. 

Ilıas Kar óziniń ne sebepti oqıǵa ornynan qashyp ketkenin túsindirdi. 

— Jol apaty bolǵannan soń adamdar kóptep jınala bastady. "Sol jerdegi adamdardyń ózderi meni jazalaıdy" - dep qoryqtym. Sebebi kópshiligi meni izdep jatqan edi", - deıdi aıyptalýshy. 

Usynǵan: Ásel Bolatqyzy