Qazaq bıliginiń paradoksy nemese Anderson-Qaraǵusova Gúljan shyǵarǵan ertegiler

Basqany qaıdam, óz basym sheneýnikterdiń arsyz ótirikterine toıyp kettim...
Jaqynda kezekti bir ańyzǵa kózim tústi: «Úsh jyldan beri turǵyndardyń naqty kirisi azaıyp barady...» – depti...
Qaıdaǵy úsh jyl? Otyz jyl boldy ǵoı: qymbatshylyqtyń aspanǵa úzdiksiz shapshyp jatqanyna...
Árıne, mıllıondap-mıllıardtap, teńgelep-dınarlap, dollarlap-evrolap, puldap-fýnttap urlaǵan iri ury-qary, ákim-qararlardy esepke almaǵanda... Dáp sol barymtashylardyń naqty kiristeri toqtaýsyz, tejeýsiz ósip jatyr...
Al, qarapaıym halyq qara sý men qara shámbige tańylyp otyr...
Dese de, Ulttyq ekonomıka mınıstrligi «Qazaqstan azamattarynyń ortasha jalaqysy 168 220 teńge boldy» – dep málimdepti, «betteri» bylsh etpeı...
Qalaı eseptep, qanshama qısapqa salsań da, qyp-qyzyl ótirik!

О́ıtkeni, bizde mysaly, balabaqshalar men medısınalyq mekemelerde jáne jekemenshik sektorda 18-20 myń teńgelik jumystar da bar... Sonymen qatar, 10 mıllıon teńgeden de asatyn jalaqylar da bar...
Sonda bul ótirikten kimge paıda? Kim utady?..
Árıne, memleket basshylary men ımansyz baılar eki attap, utysqa shyǵady...

Sońǵy jyldary atqaminerler myń ertegisiniń bireýin brendke aınaldaryp aldy. Anderson-Qaraǵusova Gúljannyń mınıstr laýazymy kezindegi murasy, bul. Erteginiń aty – «О́zin-ózi jumyspen qamtamasyz etý» dep atalady. Kezinde aýyl qazaqtarynyń qoralaryndaǵy qorazdardy túgendep, jumyrtqalardy sanaǵan mınıstr-«skazochnık» Anderson-Qaraǵusova ««О́zin-ózi jumyspen qamtamasyz etýshi» qazaqstandyqtar jalpy halyqtyń 25 paıyzyn quraıdy» – dep soqty...
Anderson-Qaraǵusova apaıǵa «zor alǵys»! Kópirip, túkirik shashqan aýyzymen ár qazaqtyń shańyraǵyn «jarylqap», «baıytyp» jibergen...

Qazaq bıliginiń paradoksy mynaý:
1. Munaıdyń álemdik baǵasy ósedi – Qazaqstanda janar-jaǵar maı men barlyq taýarlardyń baǵalary jáne AQSh dollarynyń baǵamy ósedi.
2. Munaıdyń álemdik baǵasy túsedi – Qazaqstanda janar-jaǵar maı men barlyq taýarlardyń baǵalary jáne AQSh dollarynyń baǵamy ósedi.
3. Qazaqstanda «zeınetaqy kólemine bolmashy ǵana tıyn-teben qosylady» degen aqparat taraı salysymen, ınflıasııa aspandap ósip, «ustatpaı» ketedi.

Qysqasy, qazirgi qazaqtyń kúıi: «Bul jalǵanda – sháıǵa jetse, aqyrette – maı da jermiz...» – degen dámeniń dáp ózi. «Úp» etip, úmit úzilip ketpese eken deımiz...

Qajymuqan Ǵabdolla