Qostanaı oblysy ákiminiń orynbasary "osyrdy" (vıdeo)

Jastar jylynyń aıasynda Qostanaıda "Zhas project" jobasy óz jumysyn bastady. Qostanaı oblysynyń ákim orynbasary Marat Júndibaev Elbasynyń sózderin arqaý ete otyryp, tobyldyq jastarǵa arnap sóz sóılegen kezde yńǵaısyz jaǵdaı oryn alypty.

"Jastar bizdiń úmitimiz, erteńgi tiregimiz. Sizderge úlken mindet júkteldi. Qazaqstannyń bedelin osyryp... ósirip, zor tabystarǵa jetýge tilektespiz" dep qaldy minberden Júndibaev myrza.

Osy bir qysqa ǵana vıdeo tez arada áleýmettik jelide sharlap, qatty talqyǵa ushyrady. Ákim orynbasaryn synap, aıybyn betine basyp, tipti mazaq qylǵandar barshylyq. Degenmen myńnyń arasynan Marat Júndibaevqa qoldaý tanytqandar da kózge tústi.

Myna bir pikirdi oqyrman nazaryna usynamyz: "Qazaq Balasy: Bundaıǵa kúlmeıdi , qaıta úırenip jatqanyna demeý bolyp týralap jiberý kerek. Ár qatesine kúle berseńder, erteń eshqaısysy úırenbeı qoıady uıalyp. Odan keıin kúlgen adamdar ózderiń týa sala taza sóılep kettińder me ? Olar adasyp, basqa tilde sóılesip, endi ana tilin úıreneıip júrgende demeý berińder. Joǵarydaǵy komentterdi oqysań, bári sýdan taza, sútten aq . Jyǵylǵan adamǵa kúlmeı, qaıta ornyna kóterip, turǵyzyp jiberetin qazaq edik. О́kinishti, maıdalanyp baramyz".

Talaı Alash qaıratkerin dúnıege ákelgen qasıetti Tobyl-Torǵaı óńiri búginde ábden orystanyp ketken deýden aýlaqpyz. Sebebi sońǵy jyldarda Qostanaı óńiriniń belsendiligi artqan. Memlekettik tildiń mártebesin ósirýge arnalǵan sharalar kóptep uıymdastyrylyp jatyr. Dese de atqarylǵannan buryn atqarylatyn sharýalar shash-etekten.

Bir aıta keterligi, Marat Qonysbaıuly 1974 jyly dúnıege kelgen azamat. 1997 jyly A.Baıtursynov atyndaǵy Qostanaı memlekettik ýnıversıtetinde tarıh mamandyǵy boıynsha bilim alǵan. Sodan soń 2002 jyly Qazaq quqyqtaný jáne halyqaralyq qatynastar ınstıtýtyn quqyqtaný mamandyǵy boıynsha, 2009 jyly Halyqaralyq bıznes ýnıversıtetin «memlekettik jáne jergilikti basqarý» mamandyǵy boıynsha támamdaǵan. Saıası ǵylymdar kandıdaty. Qostanaı oblysynyń ákimi Arhımed Muhambetovtyń orynbasary bolmas buryn Lısakovsk qalasyn basqarǵan.

Marat Júndibaev myrza myna bir keleńsiz jaǵdaıdan keıin el-jurt jaǵamnan aldy demeı, munymyzdy qamshylaý dep túsinse qandaı ǵanıbet bolar edi. Sebebi ózge jurttyń tilinde saıraý, árıne, keremet, alaıda óz ana tilińdi bilý ne bilmeý azamattyqqa syn.