Dımash ataq-dańq týraly: Jankúıerlerim meni minsiz adam retinde kóredi, biraq... (vıdeo)

Dımash Qudaıbergenov qyrǵyzstandyq BBC baǵdarlamasyna suhbat berdi dep jazady Qamshy.kz aqparat agenttigi. Atalmysh suhbatta Dımash Qudaıbergenov Londonda ótken konsert týraly, óziniń shyǵarmashylyǵyna men tanymaldylyǵyna qatysty birqatar suraqtarǵa jaýap berdi. 

— Qytaıda ótken baıqaý sahnada birneshe jyl óner kórsetken 30-40 jas aralyǵyndaǵy tanymal, kásibı ánshilerdiń qatysýymen ótti. Alǵashynda bul baıqaýda meniń ǵana ataq-dańqym bolmady. Meni eshkim tanymady. "Kim? Qaıdan keldi?" degen sekildi suraqtar jıi qoıyldy. Shyny kerek, bul baıqaýǵa meni tájirıbe retinde shaqyrǵan bolatyn. Uıymdastyrýshylardyń biri meni baıqap qalyp, óz usynysyn aıtty. Buǵan deıingi men qatysqan baıqaýlar "I am singer" jobasyna jol ashsa, Qytaıdaǵy baıqaý qazirgi tanymaldylyǵyma oń áserin tıgizdi. Bári óz kezegimen, bir Jaratýshynyń qalaýymen boldy, - deıdi Dımash. 

Sondaı-aq Dımash jýrnalıstiń "ne úshin óz tyńdarmandaryńdy "qymbattylarym" dep atadyń?" degen suraǵyna da jaýap berdi. 

— Jankúıerlerdiń ártiske "juldyz" degen ataq beretini bar. Meniń tyńdarmandarym da meni juldyz dep baǵalap, qurmettep jatady. Sol sebepten olar men úshin qymbat, janyma jaqyn. Jankúıerlerim otbasymnyń bir múshesi bolǵandyqtan, men úshin qymbat bolǵandyqtan olardy "qymbattylarym" dep ataımyn. 

Qyrǵyz jýrnalısi álemdik ataqty qalaı qabyldaǵanyn suraǵan kezde Dımash Omar Haıamnyń sózin tilge tıek etti. 

— "Baqytty ári baı adamǵa qyzyqpańyz. Sebebi, atqan tańnyń batar sáti bolady". Bul - Omar Haıamnyń sózi. Árbir jaqsylyq nemese jamandyq — ótkinshi dúnıe. Mysaly, adamnyń rýhanı qundylyǵy men úshin kásibıliginen joǵary turady. Sebebi biz ómirge adam bolý úshin keldik. Ánshi, muǵalim, ártis bolý úshin emes. Sol sebepti adamgershilik qasıetti, rýhanı qundylyqtardy saqtap qalý - bizdiń eń basty paryzymyz.  Ata-anam "Dımashqa durys tárbıe bermegen", - degen jaman atqa qalmaý úshin óz-ózimdi barynsha jerge túsirip, esep berip júremin. "Juldyz aýrýy kez kelgen ánshide bolady, ýaqyt óte kele basylady" degen pikir qalyptasqan. Alaıda juldyz aýrýy eshqashan basylmaıdy. Eger ánshi, ártis óziniń shyǵarmashylyǵyna belgili bir kásip retinde qaraıtyn bolsa, azdap sabyrlylyq tanytsa, barlyǵy óz ornynda bolar edi. Árıne men óz tyńdarmandaryma alǵys aıtamyn. Biraq olar keı kezderi tym ásirelep, meni minsiz adam retinde kóredi. Dese de meniń de ashýlanatyn kezderim bolady, meniń de dostarymmen qydyryp, kóńil kóteretin kezderim bolady. Jalpy aıtqanda men qarapaıym adammyn.