Ázerbaıjandaǵy kóteriliske prezıdenttiń áıeli kináli me? (vıdeo)

19 qańtarda Ázerbaıjannyń astanasy Bakýde mıtıng bolyp, túrmede ashtyq jarııalaǵan bloger Mehman Gýseınovty qoldaý sharasy ótti dep  jazady Qamshy.kz aqparat agenttigi. Atalmysh aksııa Demokratııalyq kúshterdiń ulttyq keńesiniń uıymdastyrýymen ótken. 

Mıtıngke qatysýshylar bloger Gýseınovpen qatar basqa da saıası tutqyndarǵa bostandyq berýdi talap etti. Resmı derekterge súıensek, mıtıngke shamamen 2800 adam qatysqan. Al narazylyq bildirýshilerdiń sózinshe, mıtıngke qatysqandardyń sany - 20 myń.

Eskerte keteıik, 26 jastaǵy Mehman Gýseınov bılikke qatysty óz kózqarasyn ashyq aıtyp júrgen tanymal bloger. Gýseınov ózin polısııa qyzmetkerleri uryp-soqqanyn aıtqany úshin 2017 jyly "jala jabý" baby boıynsha 2 jylǵa bas bostandyǵynan aıyrylǵan. Keıin  bostandyqqa shyǵýyna 2 aı qalǵan kezde blogerdiń ústinen taǵy da bir is qozǵalǵan. Gýseınov túrmeniń kúzetshisin soqqyǵa jyǵypty-mys. Onyń ústinen qozǵalǵan is boıynsha Gýseınov 5-7 jyl bas bostandyǵynan aıyrylýy múmkin. 

Onyń bostandyqqa shyǵýyn talap etkenderdiń qarasy óte kóp. Tipti Gýseınovty qoldaýshylar Fransııanyń SIM, Evroparlamentke, Eýropalyq Keńeske, amerıkalyq kongressmenge hat jazǵan.

Al Gýseınov bolsa, óz kezeginde bılikke qarsylyq retinde 25 jeltoqsanda  as-sý ishýden bas tartyp, ashtyq jarııalady. Alaıda 30 jeltoqsanda onyń densaýlyǵy kúrt nasharlap, esinen tanyp qaldy. Osy jaıttan keıin ol sý ishe bastaǵanymen, birneshe kún boıy tamaqtan bas tartty. Onyń jaqtaýshylarynyń birqatary da ashtyq jarııalap, Gýseınovke qoldaý bildirdi. Al 7 qańtarda Gýseınovtiń ashtyq jarııalaýdan bas tartqany jóninde aqparat tarady. Bul týraly adam quqyqtary jónindegi resmı ókil málimdegen bolatyn. Onyń aıtýy boıynsha, bloger dárigerdiń qatań baqylaýynda jáne qazir densaýlyǵy jaqsarǵan.

Alaıda Gýseınovtyń advokaty men ákesi qazir bul aqparatty rastamaı otyr. Ulymen kezdesken áke: 

— Mehman ashtyq jarııalaǵan. Ony toqtatpady. Ol óte álsiz kórindi. Men oǵan jemis-jıdek pen basqa da as-aýqat berip, jeýin ótindim. Alaıda ol meniń aıtqan keńesime qulaq asty ma, bilmedim, — deıdi.

 

2012 jyldan beri Mehman Gýseınovtyń ústinen birneshe ret is qozǵalǵany belgili. Alaıda ony tutqyndaýǵa túrtki bolǵan sońǵy jaıt týraly ázerbaıjandyq jýrnalıst Hadıdja Ismaılova currenttime.tv tilshisine aıtyp berdi. Onyń aıtýynsha, Gýseınov sońǵy ret 2017 jyly Baký qalasynda saýalnama júrgizgen. Bloger halyqtan "eger siz bir mekemeniń basshysy bolsańyz, óz áıelińizdi ózińizden keıingi basshy, orynbasaryńyz etip qoıar ma edińiz?", - dep suraǵan. Osy saýalnamasy úshin ol bas bostandyǵynan aıyrylyp, bıliktiń qas jaýyna aınalǵanyn aıta keteıik. 

Aqıqatyna kelsek, bloger Gýseınovtyń suraǵynyń astary bar. Bul saýalnamanyń Ázerbaıjan prezıdentiniń jarlyǵyna qatysty ekenin turǵyndardyń barlyǵy bildi, túsindi. 

Aıta ketsek, 2017 jyly 21 aqpanda prezıdenttiń buıryǵymen Ázerbaıjannyń vıse-prezıdenti bolyp onyń áıeli, Mehrıban Alıeva taǵaıyndaldy. Al prezıdenttiń ózi 2003 jyldan beri el basqaryp otyr. Al qazir oppazısııalyq kózqarastaǵy ázerbaıjandar, halyqtyń kópten beri bılikke ashýly ekenin, bul oqıǵa jaı ǵana sebep bolǵanyn aıtyp, pikir bildirip jatyr. Sondaı-aq mıtıngke shyqqan ázerbaıjandyqtar prezıdenttiń óz áıelin vıse-prezıdent etip taǵaıyndaýy halyqty basynǵandyqtyń belgisi dep esepteıdi. 

Beıresmı derekter boıynsha 26 qańtarda taǵy da qarsylyq aksııasy ótedi.