Zımbabve prezıdenti Qazaqstannyń tájirıbesimen bóliskisi keletinin aıtty

Búgin Zımbabve prezıdenti Emmerson Mnangagva Qazaqstanǵa keldi. Elbasy Nursultan Nazarbaev Prezıdent Mnangagvany qarsy alyp, kelissóz barysynda keleli áńgime qurdy dep habarlaıdy Qamshy.kz aqparat agenttigi. 

Aqordadaǵy kezdesýde eki eldiń yntymaqtastyǵy kelesi baǵyttar boıynsha talqylandy: óndiris, tyńaıtqyshtar men munaı hımııasy, bilim berý jáne oqytý.

Naqtyraq aıtsaq, Afrıkadaǵy memleket sıtrýs jemisterin, kofe, shaı jáne temeki ónimderin Qazaqstanǵa eksporttamaq. 
Al Qazaqstan zımbabvelik stýdentter úshin medısına, mashına jasaý jáne aýyl sharýashylyǵy salasynda stıpendııa usynýǵa nıetti.

Esterińizde bolsa, Zımbabveni 1980 jyldan beri basqaryp kelgen Robert Gabrıel Mýgabe el ekonomıkasyn ábden quldyratyp,  Afrıka qurlyǵynda eń kedeı memleketter qatarynda qaldyrǵany belgili. 2017 jyly 93 jastaǵy Mýgabe taqtan taıǵannan keıin jańadan saılanǵan prezıdent Mnangagva Batys álemimen jáne halyqaralyq qarjy ınstıtýttarymen baılanysty nyǵaıtýǵa jáne qarym-qatynasty qalpyna keltirýge barynsha kúsh saldy.

Kezdesý barysynda Zımbabve prezıdenti óz eliniń qazirgi axýalyn 20 jyl burynǵy Qazaqstanǵa teńedi. Sonymen qatar, ol Qazaqstannyń ekonomıkalyq reformasynan sabaq alyp, tájirıbesimen bóliskisi keletinin aǵynan jaryla aıtty. Elbasy Nursultan Nazarbaev Zımbabve prezıdentine barynsha qoldaý kórsetetinin jetkizip, yntymaqtastyq pen senim  úshin alǵysyn bildirdi.  Munan keıin Mnangagva  Eýropanyń tórt eline saparyn jalǵastyrmaq.

Argentına Aıbolatqyzy