Tanymal tulǵalardyń qyzyqty ádetteri

«Adamǵa tán nárseniń bári maǵan da jat emes» dep qaba saqal Karl Marks aıtqandaı, ataqty adamdardyń da boıynda  ersi, ádepke qaıshy  deýge bolatyn oǵash qylyqtary men ómirlik daǵdylary, ózindik erekshe ádetteri bolǵan. 

On toǵyzynshy ǵasyrda Arqada ómir súrgen Pań Nurmaǵambet degen ataqty baı qolynan qysy-jazy aq bııalaıyn tastamaǵan. Halyq mańǵazdyǵyna oraı «Pań» degen ataq bergen. Sol Pań tóre bol, qara bol, kimmen bolsyn amandasqanda, qolynan aq bııalaıyn sheshpeıtin kórinedi.

Aqan Seri  qymyz bergen úıdiń aıaǵy kir bolsa, dastarhanyn tastap júre bergen, kir jastyqtan qashyp, er-toqymyn jastanyp, qula dúzge baryp qonatyn bolǵan.

Kúsh atasy Qajymuqan tıtimdeı tyshqannan qatty qorqatyn bolǵan. Sony jaqsy biletin aqyn Isa Baızaqov alyp balýanǵa shynashaqtaı boıymen  aıtqanyn istetedi eken.

Baýyrjan Momyshuly jazý ústelindegi haosty, qaǵaz, kitaptardyń qalaı bolsa solaı shashylyp jatqanyn unatqan. «Moı porıadok – eto moı besporıadok» deıdi eken.

Jazýshy Táken Álimqulov qaqaǵan qystan jalańbas shyǵatyn bolǵan. Aıtýynsha, munyń qan qysymyn tómendetýge kómegi tıedi.

Jazýshy Asqar Súleımenov kúndiz uıyqtap, túni boıy kitap oqyp, jazýyn jazatyn bolǵan. 

Aqyn Jumeken Nájimedenov jyr jazyp otyrǵanda sirińkeniń taldaryn bir-birlep maıdalap syndyryp otyrǵan.

Halqymyzdyń qaharman uly  Qasym Qaısenov rıza bolǵan adamyna  qolyndaǵy taıaǵynyń arnaıy qaqpaǵy bar jýandaý kelgen tusynan  elý gramm  konıak tattyratyn  bolǵan. Ol jerge tup-týra bir bótelke konıak sııady eken. Bul taıaqty oǵan Rahymjan Qoshqarbaev jasatyp, syıǵa tartypty.  

Jazýshy Dúkenbaı Dosjan shyǵarmalaryn ómir boıy etpettep jatyp jazatyn bolǵan.

Kózi tiri jazýshy Tynymbaı Nurmaǵambetov úırengen avtoqalamyn qashan synyp qalǵansha qolynan tastamaı, ishin ǵana aýystyryp otyrady. Jazýdy bastaǵaly beri avtoqalamyn eki-aq ret, asyp ketse úsh ret qana aýystyrǵan. Qyryq jylǵa jýyq ýaqyt ishinde ustaǵany – úsh-aq qalam. Senseńiz de, senbeseńiz de osy. Yrym. Senim.

Jazýshy Muhtar Maǵaýın jazýǵa qazy-qartaǵa toıyp alyp bir-aq otyratynyn aıtady.

Akademık Asqar Jumadildaevtyń eshqashan uıaly telefon ustamaıtynyn jýrnalıster jaqsy biledi. 

Tarazda turatyn  belgili jazýshy Nesipbaı Dáýtaıuly qysy-jazy basynan shlápisin tastamaıdy. Ol bul jaǵynan orystyń  halyq ártisi Mıhaıl Boıarskııge uqsaıdy. Boıarskııde tek Dáýtaıulynykindeı uzyn shash joq.

Kompozıtor Bákir Tájibaev túnde jalǵyz ózi syrtqa dáretke shyǵýǵa  qorqady eken. Áıelin, bolmasa enesin ertip shyǵatyn kórinedi.

Osylaı tere bersek, qazaqtyń belgili adamdarynyń talaıynyń boıynan ómirlik daǵdylaryn tabýǵa ábden bolady. Biletinderińiz bolsa,  ózderińiz jalǵastyra otyryńyzdar.

 

Tóreǵalı Táshenov