21 Jeltoqsan, 2018 Oqıǵalar
Ajalǵa aıaq basqandardy aman alyp qalǵan aq paraqtar
Osy jazýlardy baıqap qalyp, tiri qalǵandardyń resmı rastalǵandary – 6 adam.
Ulybrıtanııadaǵy Sanderlend qalasyndaǵy Ýırmýt kópiri qaıtalanbas arhıtektýralyq kórkemdiligimen birden kózge túsedi. Bul kópirdiń ataǵyn arttyryp júrgen taǵy bir fakt bar. Ne deısiz ǵoı? О́mirmen qosh aıtqysy kelgender osy kópirden sekirgendi qup kóredi eken.
Muny jaqsy bilgen 18 jastaǵy Peıdj Hanter qaıǵyǵa dýshar bolyp, júrekteri jaralanyp, ólimnen basqasyn oılaı almaı qalǵan beıbaqtarǵa qol ushyn sozýdy jón sanaıdy.
Peıdj Hanterdiń tańdaǵan tásili qandaı deseńiz, tań qalýǵa daıyn bolyńyz. Sebebi Peıdj túrli-tústi flomasterlerdi qoldana otyryp, jigerlendiretin, rýhtandyratyn sózderdi aq paraqqa jazyp, lamınattap, kópirdiń aınalasyndaǵy 40 jerge ilip qoıǵan.
«Shynaıy nıetimdi baıqatý úshin osy sózderdi ádeıi qoldan jazdym» depti Peıdj ınstagramynda. О́lemin dep kelgen adam Peıdjdiń jazǵandaryna kóz túsip, bastapqy oılarynan aınyǵan. Onymen qoımaı boıjetken shuǵyl psıhologııalyq kómek kórsetý ortalyǵynyń telefon nómirin de qosa jazǵan.
18 jastaǵy qyzdyń aq paraqqa jazǵandary:
- «Myqty bol! Sebebi bári jaqsy bolady. Dál qazir basyńa qara bult úıirilgen shyǵar. Maǵan senshi, erteń-aq kún shyǵady jarqyrap»
- «Tereń tynys al. Artqa qadam jasa. Oıyńnan aıny. Bizge báribir emes»
- «Erteń keremet kún týady. О́tinish, moıymashy!»
- «Kishkentaı kúresker! Kórer qyzyǵyń men qýanyshyń áli alda»
- «Qozǵalma. Toqta. Dem al. Tyǵyryqtan shyǵar jol bar. Bul álemde seni jaqsy kóretin adamdar bar»
Osy jazýlardy baıqap qalyp, tiri qalǵandardyń resmı rastalǵandary – 6 adam. Sebebi 6 adam Peıdj qaldyrǵan nómirge qońyraý shalyp, psıhologııalyq kómek alǵan. Úndemeı, teris burylyp ketkender qanshama!?
Peıdjdiń bul áreketi jergilikti polısııanyń nazarynan tys qalmady. Sanderlendtiń polısııasy ony qurmet gramotasymen marapattapty. Sonymen qatar tvıtterdegi ózderiniń resmı akkaýntynda Peıdjge alǵys aıta otyryp, bul jazbalardy «úmit otyn jaǵatyn joldaýlar» dep atap ótti.
Búgingi tańda Peıdj Hanter Sanderlend qalasynan jaqyn mańda ornalasqan Ist Dıýrrem kolledjinde oqıdy. Adamgershiligi mol, júregi meıirimdilikke toly qyz sheteldik BAQ-qa bergen suhbatynda bylaı depti: «Otbasym meni maqtan tutady. Gramotamdy qabyrǵaǵa ilip qoımaqshymyn. Men jaı ǵana adamdarǵa kómekteskim keldi».
Ol munymen toqtap qalǵysy kelmeıdi. Búgingi tańda jigerlendiretin jańa jazbalardyń mátinin oılastyrý ústinde. Olardy Ýırmýt kópiriniń aınalasyna ilip tastamaq.
Derekkóz: Paige Hunter's Notes on Wearmouth Bridge in England Help Save Lives
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir