Dına Imambaı – 500 000 teńgelik maqalanyń avtory

13 jeltoqsan kúni Almatyda qasqaıyp turǵan «Qazaqstan» qonaqúıiniń «Grand Palace» zalynda «Túrkitildes jýrnalıster qory» Qoǵamdyq qorynyń 16 jeltoqsan – Qazaqstan Respýblıkasy Táýelsizdik kúni men 15 qarasha – Qarjygerler kúnine oraı buqaralyq aqparat quraldary arasynda ótkizgen «Erkin sóz» shyǵarmashylyq baıqaýy jeńimpazdaryn marapattaý keshi ótti. Júzden asyp jyǵylatyn jýrnalısttiń basyn qosyp, ekonomıkalyq taqyrypta materıal jazatyn áriptester rýhyn, ál-qýatyn kóterýdi nıet etken Názııa Joıamergenqyzyna alǵys bildirip jatqandardyń qarasy zalda kóp boldy. Sertıfıkat, aq konvert, qyzyl gúl jáne ár túrli syılyq/sertıfıkat  alyp, máz-meıram bolǵan jýrnalıster de az bolmady. 

«Ǵylymı jańalyqty nege jatyrqaımyz?» degen materıalymen baıqaýdyń Bas júldesi men 500 000 teńgesin qanjyǵasyna baılaǵan Dına Imambaımen "Qamshy" tilshisi kishigirim suhbat qurǵan bolatyn. "Qamshy" oqyrmandaryn alda kele jatqan Táýelsizdik kúnimen quttyqtap ótken Dına Imambaı qýana-qýana qupııasymen bólisti.

– Dına hanym, áleýmettanýshysyz ba? Jýrnalıstsiz be?

–Jýrnalıst emespin. Áleýmettaný ǵylymynyń magıstrimin. Qoǵamdaǵy túrli máselelerdi zertteıtin áleýmettanýdy ǵylymı jýrnalıstıka der edim. Sol sebepti óz sferamda júrmin dep aıta alamyn. «Ana tili» gazetinde bólim redaktory bolyp qyzmet atqardym. Búgingi tańda «Aqıqat» jýrnalynyń bólim redaktorymyn.

–Jýrnalıstıkaǵa bet burǵanyńyzǵa qansha jyl?

–2-3 jyldyń kólemi.

–«Erkin sózde» birinshi ret baq synadyńyz ba? Bul baıqaý nesimen erekshe?

–Iá, birinshi ret qatysyp, birinshi atandym. Jalpy, baıqaýlarǵa osyǵan deıin qatysqan emespin. «Erkin sózdiń» negizgi taqyryby – ekonomıka, qarjy máseleleri ǵoı. Bul bizdiń turmys-tirshiligimiz, ál-aýqatymyz, kúnkóris kúnimiz, bylaısha aıtqanda. Osyndaı baıqaýdy ótkizgen uıymdastyrýshylarǵa alǵys aıtqym keledi.

–Baıqaý bolatyndyǵyn qaıdan estip bildińiz?

–Jýrnalısterdiń vatsaptaǵy chatynan.

–500 000 teńgelik maqalanyń ataýy qandaı? Oqyrman onymen qalaı tanysa alady?

–«Ǵylymı jańalyqty nege jatyrqaımyz?» dep atalady. Bul maqala «Ana tilinde» 2018 jyldyń 18 qańtarynda jarııalanǵan bolatyn. «Qamshynyń» oqyrmandary úshin saıttaryńyzda jarııalaýǵa daıynmyn.

♦Ǵylymı jańalyqty nege jatyrqaımyz?

Jalpy, bul meniń magıstrlik dıssertasııamnyń taqyrybymnyń mazmunyna, ıdeıasyna sáıkes keledi. Ári qaraı damytyp, maqalaǵa aınaldyrǵanym. Kez kelgen dúnıeni zerttep, zerdelemesem, qolyma qalam almaıtyn janmyn. Bul maqalany oılanyp, tolǵanyp, sarapshylardan pikir alyp, 2-3 aı jazdym. Bir aıta keterligi, ǵalymdardyń ıdeıasyn óndiriske engizý bizdiń elde tym baıaý júrgiziledi.

–Arnaıy «Erkin sóz» úshin jazdyńyz ba?

–Joq, qys kezinde maqalam gazet betinde shyǵyp qoıǵan bolatyn. Baıqaý týraly estigende jaı ǵana jibere saldym.

–500 000 teńgeni qalaı jumsamaqshysyz?

–Asa bir úlken soma emes jospar quratyndaı, Jalpy, otbasyma jumsaımyn. Negizi jeńiske jetemin degen oı bolmady. Birinshiden, baıqaýdyń ádilqazysy ádette telejurgizýshiler bolady. Men olardan deńgeı kútpeımin. Ekinshiden, "jýrfak" bitirgender menen myqty jazady dep kúttim. Sóıtsem, men jeńdim.