Azamattyq forýmda Nazarbaev aıtqan 19 oı

Keshe, 2018 jylǵy 28 qarasha kúni Elbasymyz N.Á. Nazarbaevtyń Astanadaǵy Táýelsizdik saraıynda Qazaqstannyń VIII Azamattyq forýmyna qatysqanyn elimizdiń barlyq jetekshi buqaralyq aqparat quraldary jedel túrde habarlap, jazyp jatyr.

Qazaqstan Respýblıkasynyń Qoǵamdyq damý mınıstrligi men Qazaqstannyń Azamattyq Alıansynyń arnaıy shaqyrýymen Prezıdentimizdiń azamattyq qoǵam belsendilerimen ótkizgen arnaıy kezdesýinde biz de boldyq.

Osy oraıda, Elbasymyzben osynaý júzdesýden alǵan áserimizben qysqasha bóliskendi jón kórip otyrmyn.

Prezıdentimiz Nursultan Nazarbaevtyń azamattyq qoǵam belsendilerimen arnaıy kezdesýi kezinde aıtqan sózderiniń meniń óz basyma aıryqsha unaǵan tustary mynalar:

- Halqymyzdyń birligin nyǵaıtý jáne elimizdi ornyqty damytý jolynda memleket pen qoǵam arasynda ashyq dıalog ornatý asa mańyzdy;

- Osy forým úkimettik emes sektorǵa tyń serpin berip, azamattyq qoǵamnyń odan ári damýyna jol ashýǵa tıis;

- Elbasymyz áleýmettik mańyzy bar jobalardy iske asyrý isimen aınalysyp jatqan úkimettik emes uıymdarǵa óziniń rızashylyq bildirdi;

- Memleket basshysy úkimettik emes sektordy áleýmettik saıasattyń basty baǵyttaryna tartý kerektigin aıtty;

- Elbasymyz Úkimetke úkimettik emes uıymdardyń jobalaryn qarjylandyrý isiniń ashyq júrgizilýin qamtamasyz etý jóninde sharalar qabyldaýdy mindettedi;

- Prezıdentimiz osy baǵytta Úkimetke sıfrlandyrý úderisiniń aıasynda Úkimettik emes uıymdardy tekserýdiń biryńǵaı elektrondy reestrin jasaýdy tapsyrdy;

- Biryńǵaı elektrondy reestrde úkimettik emes uıymdar óz erkimen tirkelip, tıisti materıaldaryn ornalastyra alady;

- Bul biryńǵaı elektrondy reestr úkimettik emes uıymdardyń reıtıngin qalyptastyryp, olardyń qarjylandyrý kózine qol jetkizýine múmkindik beredi;

- Elbasymyz azamattyq baqylaý júrgizýdiń tıimdi tetigin qurý qajet ekenin aıtty;

- Prezıdentimiz úkimettik emes uıymdarǵa memlekettik qyzmetterdi berý jónindegi jumystardy odan ári jalǵastyrǵan jón dedi;

- Elbasymyz úkimettik emes uıymdarǵa memlekettik qyzmetterdi berý baǵytynyń aıasynda ekologııa, áleýmettik jumys, balalardyń quqyǵyn qorǵaý jáne basqa da salalar boıynsha jobalar júzege asyrylýy múmkin ekenin jetkizdi;

- Memleket basshysy Úkimet pen Qoǵamdyq damý mınıstrligine barlyq aıtylǵan usynystardy muqııat zerttep, onyń is júzinde júzege asyrylýyn qarastyrýdy usyndy;

- Elbasymyz memlekettik baǵdarlamalardyń iske asyrylýyn baǵalaý úderisine jáne qoǵamdyq baqylaýdy qamtamasyz etýge úkimettik emes uıymdardyń belsendi atsalysýy kerek ekenin erekshe atap kórsetti;

- Elbasymyz Úkimetke Azamattyq qoǵamdy damytýdyń 2025 jylǵa deıingi tujyrymdamasyn ázirleýdi tapsyrdy;

- Qazaqstan Prezıdenti jastar saıasatyn iske asyrý isinde úkimettik emes sektordyń rólin kúsheıtý qajettigin aıtyp, 2019 jyldyń Jastar jyly dep jarııalanǵanyn eskeretin bolsaq, bul másele óte mańyzdy dedi;

- Nursultan Nazarbaev eriktiler qozǵalysyna qoldaý kórsetý baǵdarlamasyn keńeıtý úshin sharalar qabyldaýdy tapsyrdy;

- Memleket basshysy «Rýhanı jańǵyrý» baǵdarlamasyn odan ári júzege asyryp, «Uly dalanyń jeti qyry» atty jańa maqalada belgilengen basymdyqtar aıasynda atqarylatyn jumystarǵa, munda kórsetilgen baǵyttar men jobalardy iske asyrý úderisine úkimettik emes uıymdardy tartý qajettigin aıtty;

- Elbasymyz qalalardyń, aýdandardyń ákimderine sıfrlyq tehnologııany qoldana otyryp, bir tereze qaǵıdaty boıynsha halyqqa kedergisiz ashyq keńistik qyzmetin usyný júıesin engizý mindetin júktedi;

- Qazaqstan Prezıdenti Úkimetke Azamattyq forým barysynda aıtylǵan usynystar negizinde naqty is-qımyl josparyn ázirleýdi jáne onda barlyq múddeli memlekettik organdardy qamtý kerektigin tapsyrdy.

Iá, Elbasymyzdyń azamattyq qoǵam belsendilerimen ótkizgen osynaý arnaıy kezdesýindegi ózimizge erekshe áser etken jáne bizdi aıryqsha jigerlendirgen sózderin qysqasha túıindesek, mine, osyndaı.

Prezıdentimizben ótken jyly shyraıly bul kezdesýden Elbasymyzdyń keıbir mınıstrlikter men jergilikti jerlerdegi sheneýnikter onsha unata qoımaıtyn azamattyq qoǵam belsendilerine degen iltıpat-qurmeti men senimi aıqyn ańǵarylyp turdy.

Memleketimizdiń basshysy minbege shyǵyp sóılegen úkimettik emes uıymdardyń árbir múshesiniń aıtqan sózderin óte muqııat tyńdap, ózi mańyzdy dep sanaǵan tustaryn qaǵazǵa jazyp alyp otyrdy.

Elbasymyzben kezdesýge kelgen azamattyq qoǵam belsendileriniń árqaısysyna ol óziniń ákelik meıirimin tógip, nurly dıdarymen shýaq syılap otyrǵanyn osynaý júzdesýge qatysqan úkimettik emes uıymdar basshylarynyń barlyǵy aıryqsha sezindi desek, artyq aıtqanymyz emes.

Mine, Elbasymyz úkimettik emes uıymdarǵa óziniń úlken senimin kórsetip, qurmetin bildirip otyr!

Endi Úkimet pen jergilikti jerlerdegi bılik, ıaǵnı oblystardyń, aýdandar men qalalardyń ákimderi de Prezıdentimizden úlgi-ónege alyp, azamattyq qoǵam belsendilerin keýdelerinen ıterip, syrtqa teppeı, kerisinshe, jaqyn tartyp, birge jumys isteýi tıis.

Sózimizdi túıindesek, Qazaqstan Respýblıkasynyń Qoǵamdyq damý mınıstrligi men Qazaqstannyń Azamattyq Alıansynyń arnaıy shaqyrýymen ózimiz qatysqan Prezıdentimizdiń azamattyq qoǵam belsendilerimen ótkizgen osynaý arnaıy kezdesýinen alǵan áserimiz, qysqasha aıtsaq, osyndaı.

 

Myrzantaı Qojabaıuly Jaqyp,

L.N. Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýlteti Teleradıo jáne qoǵammen baılanys kafedrasynyń dosenti (of Associate Professor), fılologııa ǵylymdarynyń kandıdaty (PhD), «Zertteýshi» Respýblıkalyq ǵylymı-bilim berý ortalyǵy» mekemesiniń dırektory.