Qazaq mektepterinde "Orys ádebıeti" páni oqytylmaýy tıis (saýalnama qortyndysy)

QR Bilim jáne ǵylym mınıstri

A.Sárinjipovtiń nazaryna!

Búginde QR bilim berý salasynda túıini tarqamaı júrgen túıtkildi máseleler az emes. Solardyń ishinde óziniń ózektiligi men mańyzdylyǵyn joǵaltpaıtyn bir másele - qazaq mektepterindegi "orys ádebıeti" pániniń BǴM bekitken standartty mektep baǵdarlamasynan túspeı kelýi. Bul másele áleýmettik jeli qoldanýshylary men birqatar  BAQ betterinde qyzý talqylanyp keledi. 

Qazaq oqýshylary arnaıy "Orys ádebıetin" oqýǵa mindetti me? Olar ne úshin orys ádebıetin arnaıy saǵattar alyp oqýy kerek?

Osy saýalǵa jaýap izdeý úshin "Qamshy" portaly Qazaq mektepterinde "Orys ádebıeti" oqytylǵany durys pa? degen saýalnama jarııalaǵan bolatyn.

Saýalnamaǵa barlyǵy 1000-ǵa jýyq adam qatysqan. Saýalnama shynaıy bolýy maqsatynda bir kompıýter arqyly (IP meken-jaıy) tek bir ǵana adam daýys bergen. Saýalnama qortyndysy kórsetkendeı daýys berýshilerdiń  400-den astamy ıaǵnı 40 paıyzy "orys ádebıeti" pániniń ornyna "Álem ádebıeti" pánin engizý kerek dep esepteıdi. Sondaı-aq, 400-ge jýyq daýys berýshi(39 paıyz) qazaq mektepterinde "Orys ádebıetin" oqytýdy múldem doǵarý kerek degen pikirde. Al 180 oqyrman(20 paıyz) BǴM-nyń standartty baǵdarlamasyndaǵy "Orys ádebıeti" páni orta mektep qabyrǵasynda oqytylǵany durys dep esepteıdi eken.

Sóıtip, myń adamnyń pikiri mynaǵan saıdy. Qazaq mektepterinde  "Orys ádebıetin" aıryqshalap oqytý durys emes, onyń orynyna "Álem ádebıeti" pánin engizip, álem ádebıetiniń altyn jaýharlarynyń arasyna orys klassıkteriniń de shyǵarmalaryn engizý kerek.

Aıtpaqshy, 2 mıllıonǵa jýyq qazaq turatyn kórshi Reseıde "Qazaq ádebıeti" páni túgili Qazaq mektebi joq.

Nurgeldi Ábdiǵanıuly