Memlekettik Týǵa – aıyppul, ...KSRO-nyń jalaýyn jaıyp tur

Taıaýda bizdiń redaksııamyzǵa Ábdimálik Alshynbaev atty Astana qalasynyń turǵyny habarlasty. Onyń aıtýynsha, Ilııas Esenberlın kóshesi, 21-úıdiń búıirinde ornalasqan "Romanov" dúkeniniń ıesi shovınıstik pıǵyl tanytyp, esiginiń aldyna kelmeske ketken KSRO-nyń jalaýyn jelbiretip ilip qoıǵan.

Reti kelgende, biz shaǵymdanýshynyń ózimen jolyǵyp, onymen birge 1960 jyly salynǵan 3 qabatty úılerdiń birindegi atalmysh dúkenge bas suqtyq. Syrtynda "antıkvarnaıa lavka" degen jazýy bar eken. О́zin tanystyrýdy qup kórmegen satýshy bul dúkende aty aıtyp turǵandaı, tek sırek kezdesetin buıymdar, kóne jádigerler satylatynyn, álgi qyzyl jalaýdy solardyń biri retinde jarnamalap ilip qoıǵandyǵyn alǵa tartyp, aqtaldy. Biraq, ol úshin jergilikti bılikten ruqsat almaǵan.

Eske sala ketsek, 2015 jyly elordanyń Jandos Qurmanbaev atty turǵynyna balkonǵa ózimizdiń kók baıraqty ilip qoıǵany úshin 396 myń 400 teńge aıyppul salynǵany málim. Al Ábdimálik Alshynbaev kelmeske ketken Keńes ókimetiniń myna qyzyl jalaýyn jıi kóretinin aıtyp otyr. Onyń ıesine "áı deıtin aja, qoı deıtin qoja joq" sııaqty. Sondyqtan syrtqa kúnde tańerteń ilip qoıyp, keshke dúken jabylatyn kezde bir-aq jınap alatyn kórinedi. Kireberiske qarsy terezege sondaıdyń taǵy birin menmundalatyp tutyp qoıǵan. Satýshy ózge ult ókili onyń da sebebin túsindirmesten, dúkendi jaýyp, kóligine otyryp alyp, taıyp turdy.

– Eger kóne jádigerler satatyn dúkenine jarnama qajet bolsa, onyń syrtyna memlekettik rámizden basqa buıymdy qoıýyna bolar edi ǵoı. Men satýshynyń bunysyn Keńes ókimetin kóksegen kórgensizdik, shovınıstik pıǵyl dep qana qabyldaımyn. Jalǵyz men emes, myna eski jalaýdy kórgen kez kelgen otandasymyz sóıtedi dep oılaımyn, – dep ashynýda Ábdimálik Alshynbaev.

Shaǵym ıesi Astanaǵa Shymkent qalasynan 14 jyl buryn kóship kelgen eken. О́ziniń aıtýynsha, sodan beri kórer kózge ersi kórinetin mynadaı soraqylyqtardy sýretke túsirip alyp, ony Astana qalalyq tilderdi damytý basqarmasyna aparyp kórsetken. Alaıda, ol áreketinen esh nátıje shyqpapty. Basqarma mamandary "zań boıynsha solaı ǵoı, bylaı ǵoı" dep sıpaı qamshylap, artyn sıyrquıymshaqtatyp, shyǵaryp salatyn kórinedi.

Sonda deımiz-aý, quzyrly orǵandar nege óz patrıottyǵyn pash etip, kók baıraǵymyzdy balkonǵa ilgen jigitke "Týdy qorladyń" dep aıyppul salyp, kádimgi oraq pen balǵa bederlengen keńestik jalaýdyń tutas eldigimizdi qorlaý ekenin bilmeı qalýy kerek?! Sondaı kóńiljyqpas jaltaqtyǵymyzdyń taǵy bir kórinisi – Arqalyq pen Derjavın qalalarynyń arasyndaǵy Jańadala aýylynyń syrtyndaǵy oraq pen balǵa bolyp tur. Keshe Arqalyq qalasyna jolymyz túskende, Keńes dáýirinen qalǵan oıyq jolda sekeńdep kele jatyp, ony da sýretke túsirip aldyq...

Erkeǵalı BOLATULY