Qytaıda qalǵan ákesin 8 aı kórmegen balalar Elbasydan járdem suraıdy

Analaryn jer qoınyna tapsyryp, ákesi men baýyrynan tirideı kóz jazyp qalǵan balalar Elbasydan járdem suraıdy, dep jazady Qamshy.kz aqparat agenttigi.

Bul týraly Qytaıdaǵy qandastarymyzdyń máselesine jiti nazar aýdaryp júrgen Sáýle Ábildahanqyzy óziniń Facebook paraqshasynda jarııalady.

Álı Sylqymbaıuly segiz aı buryn qart áke-sheshesin Almaty oblysy Eńbekshiqazaq aýdany Shelek aýylyna kóshirip ákelip, 20 jastaǵy ulymen kóshi-qon máselesin aıaqtaý úshin Qytaıǵa qaıta ketken. Sodan qaıta oralmaǵan.

Sáýle Ábildahanqyzynyń aıtýynsha ekeýiniń de qujatyn Qytaı bıligi tartyp alǵan. О́zdiginen júrip tura almaıtyn qos qarııany segiz aıdan beri kelini Kerimhan Namazhanqyzy baǵyp qalǵan. Al, búgin qusadan qaıǵy jutqan kelinshek oıda joqta kóz jumdy. Artynda 16 jastaǵy Qaırat esimdi uly, 13 jastaǵy Búldirshin esimdi 13 qyzy qaldy.

«Eń qıyny jáne ókinishtisi - bul kisilerdiń eshqaısysy Qazaqstan azamattyǵyn alyp úlgermegen. Bizdiń bıýrokrattar otyrǵanda bir jylda azamattyq alý múmkin de emes. Tipti, yqtııar hattyń ózin eki jyldap ala almaı júretinder bar...
Odan da aýyry - kishi uldyń qytaılyq pasport merzimi bitip ketken. Ol ákesi janynda bolmasa, ózdiginen qujat jasaı almaıdy...
Al qyzdyń jeke yqtııar haty joq, búgin qaıtys bolǵan anasynyń qujatyna tirkelgen”,-deıdi Shelek aýylyna arnaıy barǵan Sáýle Ábedınova.

Sáýle Ábildahanqyzynyń sózinshe el úkimeti kámeletke tolmaǵan balalardy tek ata-anasynyń qujatyna tirkeıdi.  Qapııada kelininen aırylyp, uly men úlken nemeresine tirideı jete almaı, qaıǵydan qan jutyp otyrǵan Sylqymbaı qarııa men jary Sháken Kásenqyzynyń qujatsyz qalǵan nemereleriniń jaǵdaıyn oılap alańdaıdy. Qart kisilerdiń qujat jasatyp, tabanynan taýsylyp júrýge densaýlyqtary múlde jaramaıdy.

«Bizdiń qudaı bere salǵan ókimet kámeletke tolmaǵan balalardy ata-anasynyń qujatyna tirkegeni durys shyǵar, biraq ózderine de jeke-jeke bir japyraq qaǵaz berse bolmaı ma? Jaman aıtpaı, jaqsy joq demekshi, mynadaı jaǵdaıda (ata-anasynan aıyrylǵan jaǵdaıda) onsyz da qan jutyp otyrǵanda, onsyz da azamattyq ala almaı sarylyp kútip júrgende, qujat merzimi degen másele t.b. qaǵazstandyq problemalar shash etekten bolǵan qoǵamda másele onan saıyn kúrdelenbes úshin yqtııarhatty úlken-kishige birdeı jeke-jeke jazyp berý qıyn ba?», - dep ashynady qoǵam belsendisi.

Qandastarymyzdyń bir japyraq yhtııar hat alý úshin aı aryltyp, jyldar sanap, qaǵazbastylyqtyń qurbany bolyp júrgeni jasyryn emes. Ákesi men baýyrynan tirideı aıyrylyp, anasyn qara jer qoınyna tapsyrǵan qos búldirshin Elbasydan, QR SIM-nen, halyqaralyq quqyq qorǵaý uıymdarynan kómek suraıdy.

"Endi bul eki bala Qytaı azamaty retinde arǵy bettiń adamy da, qazaq balasy retinde bizdiń balamyz. Osy elde oqımyn, ósip-ónemin dep armandap, qazaqstandyq kelesheginiń kemel ekenine senip kelgen jaýtańkózder...", - deıdi Sáýle Ábildahanqyzy.

Esterińizge salsaq, Qamshy.kz aqparat agenttigi osyǵan deıin Qytaıdaǵy qandastarymyzdyń máseleleri boıynsha quzyrly organdarǵa saýal joldap, bolǵan jaǵdaılardyń mán-jaıyn oqyrman nazaryna usynyp keldi.