Almatydaǵy Opera jáne balet teatrynda Astananyń 20 jyldyǵyna oraı konsert ótedi

2018 jyldyń 13 maýsym kúni Almaty turǵyndary men qala qonaqtaryna arnap  QR Tuńǵysh Prezıdent Qorynyń Laýreattary jyl saıynǵy «Júrektegi armanmen, shyńdarǵa shyǵý jolynda!» atty konsertin ótkizedi. Klassıka mýzykasynyń juldyzdary dástúrli túrde Abaı atyndaǵy Qazaq memlekettik akademııalyq opera jáne balet teatrynda jınalady, dep habarlaıdy Qamshy.kz

Astananyń 20-jyldyǵyn merekeleýge oraı Eýrazııadaǵy eń úlken teatrlardyń birinde eń tanymal mýzkalyq týyndylar oryndalady. Olardyń ishinde «Abaı» operasynan Abaıdyń arııasy, «Strana ýlybok» operasynan Lıza jáne Sý Chongtiń dýeti, «Karmen» operasynan popýrrı, «Taıs» operasynan «Medıtasııa» bar. Álemge áıgili bul týyndylardy otandyq mádenıet jáne óner salasyndaǵy jańa tanymal ókilderi - QR Tuńǵysh Prezıdent qorynyń Laýreattary oryndaıdy.

Mýzyka keshinde Qazaqstan Respýblıkasynyń eńbek sińirgen qaıratkerleri, respýblıkalyq jáne halyqaralyq shyǵarmashylyq konkýrstar men festıvalderdiń jeńimpazdary: Medet Shotabaev, Talǵat Musabaev, Tatıana Vısınskaıa, Gaýhar Tasbergenova, Ermek Qurmanaev, Bıbigúl Januzaq, QR memlekettik trıosy - «Forte trio» jáne basqa óner maıtalmandary óz sheberligin kórsetedi.

Opera jáne balettiń has sheberleri «Úlken Opera» taqyrybyna arnalǵan konserttik baǵdarlamamen sahnaǵa shyǵady. Búgingi kúni «Úlken opera» - álemdik zamanaýı mýzykalyq baǵyttar sııaqty tanymal halyqaralyq trend. «Júrektegi armanmen, shyńdarǵa shyǵý jolynda!» atty konsertin ótkizýdiń basty maqsaty ár túrli tyńdarmandarǵa akademııalyq mýzykaǵa degen qyzyǵýshylyǵy men súıispenshiligin arttyrý bolyp tabylady.

- Mádenıet - memlekettiń rýhanı negizi. Qoǵam ulttyq ónerdi saqtaý úshin shyǵarmashylyq tulǵany damytýǵa jaǵdaı jasaý kerek. Osy oraıda Qazaqstan Respýblıkasy Tuńǵysh Prezıdenti - Elbasy Qorynyń qyzmeti óte mańyzdy. On jyl boıy biz talantty jastardy qoldap kele jatyrmyz. Qor Laýreattarynyń konserti – klassıka mýzykasynyń maıtalmandaryn elimizge tanystyrý bolyp tabylady. Bul keshte óz talanttaryn kórsetetin juldyzdarymyz shyǵarmashylyq jolynda eshqandaı kedergi bolmaýy tıis ekenin dáleldeıtinine senimdimin, - dep atap ótti QR Tuńǵysh Prezıdent Qorynyń Almaty qalasyndaǵy ókildiginiń dırektory Sergeı Tohtarov.

QR Tuńǵysh Prezıdent Qorynyń jas, daryndy jáne shyǵarmashyl jastarǵa qoldaý kórsetý dástúri 10 jyl buryn týdy. Kóptegen ártister úshin bul qoldaý kásibı salada tabysqa jetýge alǵashqy qadamdardyń biri boldy. Qordyń Laýreattarǵa arnalǵan jyl saıynǵy konserti olardyń sheberligin halyqqa kórsetýdiń tamasha múmkindikteriniń biri bolýda.Qazir Qor Laýreattarynyń esimderi tek Qazaqstanda ǵana emes, sonymen qatar shetelde  de belgili. Olar halyqaralyq konkýrstar men festıvaldarda óz ónerlerin kórsete otyryp, Qazaqstanymyzdyń daryndy óner ıelerine baı ekendigin dáleldeýde. Konsertke Qazaqstan, Reseı men Eýropaǵa keńinen tanymal otandyq opera juldyzy Súndet Baıǵojın de qatysady. Bıylǵy jyly Laýreattardyń konsertiniń taǵy bir ereksheligi - Astanamyzǵa arnalǵan fotokórmeniń ótýi. «Astana - Uly dala jaýhary» atty fotokórme elordanyń jetistikterin kórsetip, zamanaýı Qazaqstanǵa jańa kózqaraspen qaraýǵa múmkindik beredi. Konsert Nurjan Baıbosynovtyń jetekshiligimen QR Memlekettik akademııalyq sımfonııalyq orkestriniń mýzykalyq súıemeldeýimen ótedi. Sonymen qatar, konsert barysynda tyńdarmandarǵa mýltımedııalyq tehnologııalardyń kómegimen este qalar shoý qoıylmaq deıdi uıymdastyrýshylar.