Shavkat Mırzııoev: Aýyldy kótermesek, halyq bizge eshqashan senbeıdi

Taqqa mingenine bir jyldan jańa asqan Shavkat Mırzııoev ózbek jurtyn ǵana emes, Ortalyq Azııa elderin de jıi-jıi aýzyna qaratyp kele jatyr. Aýzyna qaratqanda, dámdi sóz aıtyp, kósemsip júrgen joq. Islam Karımovtyń kezindegi qatqan seńdi buzyp, buqarany basqarýdyń ózindik arnasyn saldy. Ári sol arnaǵa quıatyn úkimet tirliginiń bárin halyqtyń qalaýy tóńireginen taýyp keledi.

Kesheli beri TMD aýmaǵyndaǵy birqatar basylymdar О́zbekstan prezıdentiniń pármenimen qaıta túlegen Manas aýyly týraly jańalyqty jarysa jarııalap jatyr. Jańalyqtyń tóresi sol, ıt baılasa, turǵysyz qıyrdaǵy qańyraǵan aýyl 45 kúnniń ishinde jarqyrap shyǵa kelgen. Onda da, aǵashyn áktep, jolynyń oı-shuqyryn bútindeıtin kózboıaýshylyq emes, irgesi 60-shy jyldary qalanyp, keıin qaraýsyz qalǵan eldi-mekendi súrip tastap, jańazamanǵa laıyq, múlde ózgeshe qalashyq turǵyzǵan. Qosqabatty kóppáterli úıler, emhana, balabaqsha, sport kesheni sekildi áleýmettik nysandardy bylaı qoıǵanda, teri men jún óńdeıtin shaǵyn óndiris oryndary da tusaýyn kesken. Tipti túıe sútinen dárilik preparat jasaıtyn seh ta ashylypty.

Aqparatqa qaraǵanda, О́zbekstan basshysy bul aýylǵa aqpan aıynda kelip, tıisti tapsyrmalar bergenge uqsaıdy. Mine, sodan 1,5 aı ǵana ýaqyt ótkende prezıdentttiń tapsyrmasy tap-tuınaqtaı etip oryndalǵan. Jańaryp, qaıta túlegen aýylǵa ekinshi márte kelgen Shavkat Mırzııoev qýanyshy qoınyna syımaǵan kópshilikke «qutty bolsyn» aıta otyryp, nókerlerine búı depti: «Halqymyzdyń qandaı jaǵdaıda turmys keship jatqanyn kórseń, janyń aýyrady. Bizdiń aldymyzda nendeı maqsattar men mindetter turǵanyn men osy Manas aýylyn mysalǵa keltire otyryp túsindireıin. Árıne, ońaı emes, sharýa shashetekten. Biraq órleýdi aýyldy túletýden, onda da, talqany shyqqan, jaǵdaıy múshkil aýyldardan bastamasaq, halyq bizge senbeıdi. Eshqashan senbeıdi!».

Bylaı qarasańyz, О́zbekstan basshysynyń áreketi bir oqpen eki qoıan atqanmen teń. Sebebi 6,5 myń halyq turatyn Manas aýylynda negizinen etnıkalyq qyrǵyzdar turady. Karımovtyń kezinde ózbek-qyrǵyz qatynasy tym shıelenisip ketkeni este. Endi mynadaı jaǵdaıdan keıin áriptesine Sooronbaı Jeenbekovtiń de ishi jylyp turary belgili. Qyrǵyz ben ózbek jurtynyń da bir-birine degen yqylas-peıili bekı túsedi. Munyń barlyǵy Tashkenttiń kórshilermen ári týystas eldermen qarym-qatynasty qalpyna keltirý saıasatymen úndes.

Al bastysy, ózbek basshysynyń aýyldy kóterýge qatysty bastamasy. О́zi aıtpaqshy, bul sharýanyń ońaı bolmaıtyny da ras. Degenmen nıet bar. Sol nıetti júzege asyratyn kúsh Mırzııoevtyń qolynda. Mırzııoev shendi-shekpendilerdiń eki aıaǵyn bir etikke tyǵyp, halyqqa basyn ıdirgen saıyn buqaranyń da bılikke degen senimi artyp kele jatyr. Al bul degenińiz, Mırzııoevtyń kókeıindegi eń basty maqsat. О́ıtkeni halyq bılikke senbegen jerde eshqashan bereke bolmaıdy. Árbirden soń, ekonomıkany damytyp, memleketti alǵa súıreıtin qýat bıliktiń emes, halyqtyń boıynda. Áleýmet ál jıǵan saıyn onyń bereri de arta túsedi. Al eger bılik bardy baýyryna basyp alyp, halyqty aldarqatýǵa kóshse, onyń arty mindetti túrde bir bálege aparyp tireıdi. I.Karımov oqystan kóz jumbaǵanda, О́zbekstan da osyndaı bir qaterge urynýy ábden múmkin edi. О́zbek jurtynyń baǵyna qaraı, bılikke Mırzııoev keldi. Qyzyǵasyń. Qyzyqpaý múmkin be?

Sansyzbaı Nurbaba