Nyǵmatýllın neni meńzedi?

Keıde osy joǵarydan aıtylǵan qaısibir pikirler adamnyń esine árneni salady. Máselen kúni keshe ǵana Májilis tóraǵasy Nurlan Nyǵmatýllın zań qyzmetindegi ońbaı turǵan bir máseleniń betin ashty. Spıkerdiń sózine senseńiz, jetekshiler ýaqytynda aýysyp tursa, jumys sapasy artady eken. Bylaı qarasańyz, óte oryndy tujyrym. Biraq ol nege advokattar alqasyna ǵana qatysty bolýy kerek? Mine, qarapaıym halyqqa osy jaǵy ǵana uǵynyqsyz.

N.Nyǵmatýllın mundaı sózdi Májilistiń plenarlyq otyrysynda aıtqanǵa uqsaıdy. «Azattyqtyń» habarlaýynsha, ol aımaqtardaǵy advokattar alqasy prezıdıýmdaryn ondaǵan jyldar boıy bir ǵana adamdardyń basqarýynan zań qyzmeti men zań kómeginiń sapasy nasharlap ketkenin aıta kelip bylaı degen: «Mańǵystaý oblysynda oblystyq advokattar alqasy prezıdıýmynyń tóraǵasy uıymdy 25 jyldan beri basqaryp otyr, Almaty oblysynda 27 jyl, Atyraý oblysynda 31 jyl. Bul jaıt munymen bitpeıdi, Aqtóbede 33 jyldan beri basqaryp otyr. Bul neni kórsetedi? Bul azamattarǵa zań kómegin kórsetý salasynda múldem básekelestik joǵyn bildiredi. Bálkim, ol adamdar kásibı mamandar shyǵar, olardyń tájirıbeli ekenine kúmán joq, biraq ýaqyt ózgerdi. Qazir barlyǵyn básekelestik sheshedi jáne zań kómegin kórsetý salasynda da durys básekelestik bolýy tıis».

Qaı qyrynan qarasańyz da, esh mini joq, óte oryndy ári nanymdy sóz. Bir orynda jalpaıyp otyryp alǵan qaı jaqsylyq deısiz, merzimi kelgen soń árkim de qyzmetin ózgege berýi kerek. Osyndaıda oı keledi, advokattar alqasynda shalqaıyp 25-30 jyl otyrǵan shirkinderdiń qylyǵy saıası álemdegi syrqattyń syqpytynan syr ańdatpaı ma eken ózi?! Mine, osy turǵydan kelgende spıker aıtqan «ýaqyttyń ózgergenine» kúdikpen qaraıtyndar kóp qazir.

Nege? Nege derińiz bar ma, bılik eshalonyndaǵy burynǵy basshylardyń deni áli sol mańaıda júr. Keshe ákim bolǵan, búgin – mınıstr, erteń – senator. Nemese kerisinshe. Árıne, joǵary bılikke jastardyń kelip jatqanyn joqqa shyǵarýdan aýlaqpyz. Biraq solardyń túbin «qoparyp» kórseń, keminde teń jartysy  bıliktegilerdiń birdeme-sirdemesi bolyp shyǵady. Osydan keıin shynaıy básekelestiktiń bar ekenine kimdi sendire alǵandaısyz?!

Jaraıdy, aryǵa barmaı-aq, parlamentti tóńirektep kóreıikshi. Májilistegi qansha depýtat birneshe saılanym boıy orynyn bosatpaı kele jatyr? Kóp emes shyǵar, biraq az da emes. Olardyń aldy qazir seksenge taıady. Sonda qarttyq meńdegen osyndaı shal-shabyrdyń orynyn basatyn ózge adam tabylmaǵan ba? Álde bul shynaıy básekelestiktiń jemisi me? Eger solaı desek, onda osy qartań kisiler halyqtyń qamy úshin shyr-pyry shyǵyp, parlamenttiń tórinde aıǵaı salyp jatýy kerek edi ǵoı. Ásirese, el men jerdiń taǵdyry tartysqa túsken ondaǵan oqıǵalar tusynda.

Árıne, depýtattardy tóraǵa tańdamaıtyny ras. Olar partııanyń belgileýimen iriktelip, «halyqtyń qalaýymen» parlamentke barady. Demek Májilismenderdiń «tııanaq tabý» máselesin spıkerge japsyrýdyń esh jóni joq. Alaıda «Nurlan Nyǵmatýllın advokattar alqasy tóraǵalarynyń sol uıymdy neshe jyl basqarǵanyn nege sonsha táptishtedi eken?» degen suraq qazir árkimniń kókeıinde tur. О́ıtkeni Nurlandiki bir qaraǵanda durys bolǵanymen jáne bir úńilseń, qıys sekildi kórine beredi. Sebebin Siz de sezetin shyǵarsyz, «Túıeniń soqyrlyǵyn aıtsań, Qunanbaıǵa tıedi» demeýshi me edi, qazaq atam. 

Sansyzbaı Nurbaba