Balasy jemqor adam Májiliske laıyq pa?

Bul taqyrypty buǵan deıin qozǵamaı kelýimizdiń óz sebebi bar. О́ıtkeni atyshýly Qýandyq Bıshimbaevtyń isine sońǵy núkte qoıylmaǵan edi. Keshe sot úkimi jarııa boldy, «Báıterek DEVELOPMENT» AQ top-menedjerleri túrli merzimge bas bostandyqtarynan aıryldy. Onyń ishinde Májilis depýtaty Qabıbolla Jaqypovtyń uly – Aslan Jaqypov ta bar. Demek depýtattyń balasynyń aram aqshaǵa qyzyǵyp, ardan attaǵany tolyǵymen dáleldendi degen sóz. Endeshe ondaı balany tárbıelegen ákeniń Májiliste shalqaıyp otyrýy qanshalyqty qısyndy?

Ádette depýtattar ózderin «halyq qalaýlysy» dep ataǵandy unatady. Bálkim ózderin ishteı solaı sezinýi de múmkin. Biraq qandaı kisiniń depýtat bola alatyny, májiliske kimderdiń baratyny bylaıǵy jurtqa asa qupııa emes. Alaıda sonyń ózinde, halyqtyń esebinen qomaqty jalaqy alyp, Májiliste qonjıyp otyrǵannan keıin ár depýtat kópke úlgi bolatyndaı deńgeıden tómendemeýi kerek qoı, jurt úshin ot pen sýǵa túsip jatpasa da.

Onyń ústine Qabıbolla Jaqypov eki depýtattyń biri emes. Májilis tarıhyna engen sanaýly tóraǵanyń sanatyndaǵy kisi. Kezinde Májiliske bas-kóz bolyp júrgeninde úkimettiń eki aıaǵyn bir etikke tyqpasa da, shendilerdiń keteýi ketken tirligin anda-sanda synap turatyn. Onysy tóraǵa retinde ózine jarasýshy edi. Búgingi kúni de sondaı minez tanytam dese, quqy bar. О́ıtkeni – depýtat.

Biraq endigi jerde Qabıbolla Jaqypovtyń «qaharyna minetinine» kúmán kóp. О́ıtkeni óz balasy aranyn tııa almaı, sottalyp jatqan depýtattyń ózgege birdeme aıtatyndaı jóni bar ma? Eger aıtatyn jerde aıtyp, deıtin jerde demese, ondaı adam Májiliske ne úshin kerek? Mynadaı jaǵdaıdan keıin «halyq qalaýlysy» bolyp júrgen kisi halyqtyń betine qaraı ala ma?

Ras, Aslan Jaqypovtyń jazasy ózge jemqorlardan jeńildeý. Máselen Q.Bıshimbaev 10 jylǵa sottaldy. Sýdıa kezinde óz kinásin moıyndap, burynǵy bastyǵyna qarsy kýálik etkenin eskerdi me, álde ózge sebepteri boldy ma, áıteýir A.Jaqypovty 2,5 jylǵa bas bostandyǵynan aıyrdy. Bylaı qarasańyz, taýyq urlaǵan adamnyń ózi 3-4 jylǵa sottalyp jatqanda, 2,5 jyl degenińiz túk te emes. Áıtsede bul elge belgili depýtatty «jemqordyń ákesi» degen attan qutqara almaıdy ǵoı.

Bir qyzyǵy, ınternetke úńilseńiz, Qabıbolla Jaqypov týraly derekter tek 2015 jyldan ary qaraı ǵana «sóıleıdi». Odan bergi ýaqytta bul kisiniń ne istep, ne qoıǵany BAQ nazaryna ilikpegen. Ilikkeni – kishi Jaqypovtyń isimen baılanysty tustary ǵana. Parlamentten ketip tyndy ma deıin desek, altynshy saılanymdaǵy Májilis depýtattarynyń tiziminde áli júr. Soǵan qaraǵanda, úlken Jaqypov úırengen jerinde «basbuǵyp» jatqanǵa uqsaıdy.

Árıne, Qabekeńdi de túsinýge bolady. Ilgeride bir emes, eki birdeı ulynyń esimi «Panama qujattary» bazasynan jyltyń etip kóringen. Sonda jurt oısha bolsa da, Jaqypovtardy elimizdegi eń dáýletti otbasylardyń qataryna qosyp qoıǵan edi. Ánekı, sol balanyń biri basqa jer tappaı qalǵandaı, «Nurly joldyń» qarjysyna aýyz salam dep tutylyp otyr. Ári ákeniń de abyroıyna óshpesteı etip daq túsirdi. Bul ońaı ma? Árıne, aýyr.

Biraq «A komý chas legko?» dep orys aǵaıyndar aıtpaqshy, qazir kimge jeńil bop jatyr deısiz?! Ishten shyqqan shubar jylannyń «basyna aq tamyzyp», týra jolǵa sala almaǵan adamnyń halyqqa qalaýly bolyp Májiliste otyrǵany qarashaǵa jeńil dep, káne, qaısysyńyz aıta alasyz?! 

Sansyzbaı Nurbaba